	Veðurstofa Íslands Jarðeðlissvið

Jarðskjálftar 20191007 - 20191013, vika 41

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 210 jarðskjálftar voru staðsettir með SIL-mælakerfi Veðurstofu Íslands, sem er svipaður fjöldi og í síðustu þegar um 220 skjálftar voru staðsettir. Stærsti skjálfti vikunnar var 3,1 að stærð og varð við Eystri Skaftárketilinn í vestanverðum Vatnajökli kl. 17:44 sunnudaginn 13. október. Fjórtán skjálftar voru staðsettir í Heklu í vikunni sem eru heldur fleiri en vanalega. Þrír stærstu skjálftarnir í Heklu voru 1,3-1,5 að stærð, en aðrir minni en 1,0. Meiri hluti þessarra fjórtán skjálfta urðu þriðjudaginn 8. október. Veðurstofunni barst ein tilkynning um að jarðskjálfti af stærð 2,3 sem varð um 10 km VSV af Kópaskeri hefði fundist þar.

Suðurland

Á suðurlandsbrotabeltinu mældust 8 jarðskjálftar, allir undir 1,0 að stærð, og einn skjálfti af stærð 1,1 var staðsettur á landgrunninu fyrir sunnan ósa Þjórsár. Fimm jarðskjálftar mældust víðsvegar um Hengilssvæðið, þar sem sá stærsti var 1,3 að stærð.Virkni á þessu svæði var svipuð og í vikunni á undan. Fjórtán skjálftar voru staðsettir í Heklu í vikunni sem eru heldur fleiri en vanalega. Þrír stærstu skjálftarnir í Heklu voru 1,3-1,5 að stærð, en aðrir minni en 1,0. Meiri hluti þessarra fjórtán skjálfta urðu þriðjudaginn 8. október. Stakur smáskjálfti var staðsettur í Vatnafjöllum sunnan Heklu.

Reykjanesskagi

Tæplega 30 jarðskjálftar mældust á Reykjanesskaga í vikunni sem er svipaður fjöldi og í vikunni á undan. Stærsti skjálftinn á svæðinu var 2,3 að stærð við Fagradalsfjall NV af Grindavík. Mesta virknin deildist niður á svæðin við Fagradalsfjall og Kleifarvatn. Einn skjálfti af stærð 1,3 var staðsettur úti á Reykjaneshrygg, um 30 km SV af Reykjanestá.

Norðurland

Tæplega 30 jarðskjálftar mældust á Tjörnesbrotabeltinu í þessarri viku, aðeins fleiri en í vikunni á undan þegar þeir voru um 20. Tveir stærstu skjálftarnir þar voru 2,3 að stærð, annar rúmlega 20 km SA af Grímsey og hinn um 10 km VSV af Kópaskeri. Veðurstofunni barst ein tilkynning um að skjálftinn VSV af Kópaskeri hefði fundist í byggð. Annars skiptust þessir tæplega 30 skjálftar nokkuð jafnt niður á Grímseyjarbeltið og Húsavíkur-Flateyjarmisgengið. Sex smáskjálftar urðu við Þeistareyki í vikunni, allir undir 1,0 að stærð. Ellefu smáskjálftar mældust á Kröflusvæðinu, aðeins fleiri en í síðustu viku þegar þeir voru sex. Allir skjálftarnir þar voru einnig undir 1,0 að stærð.

Hálendið

Undir Vatnajökli mældust um 40 jarðskjálftar sem eru aðeins færri en í síðustu viku þegar þeir voru tæplega 50. Stærsti skjálftinn á svæðinu, og jafnframt á landinu í þessarri viku var 3,1 að stærð við Eystri Skaftárketilinn þann 13. október. Tveir smáskjálftar mældust auk þess við Eystri Skaftárketilinn í vikunni. Þrettán jarðskjálftar mældust í Bárðarbunguöskjunni, sá stærsti 2,8 að stærð. Auk þess mældust tíu jarðskjálftar, allir undir 1,0 að stærð, í bergganginum undir Dyngjujökli. Virknin í Bárðarbungu og bergganginum var svipuð og í síðustu viku.

Við og í nágrenni Grímsvatna mældust átta jarðskjálftar í vikunni, fimm þeirra við öskjuna og þrír þeirra nokkuð sunnan við hana. Það er svipaður fjöldi og í síðustu viku. Stærsti skjálftinn á svæðinu var 1,6 að stærð í suðurenda öskjunnar í Grímsvötnum. Enginn jarðskjálfti mældist í öskju Öræfajökuls en einn smáskjálfti mældist í Kvíárjökli, sem skríður niður úr Öræfajökli. Þrír smáskjálftar, í ofanverðum Skeiðarárjökli, Breiðamerkujökli og sunnan við Kverkfjöll, voru staðsettir í vikunni. Í og norðan við Tungnafellsjökul voru staðsettir tíu jarðskjálftar, á 4-10 km dýpi, milli kl. 12 og 14 þann 13. október. Allir þessi skjálftar voru undir 1,0 að stærð. Stakur skjálfti af stærð 0,6, á 24 km dýpi, mældist í Trölladyngju norðan Dyngjujökuls.

Í og við Öskju mældust rúmlega 20 jarðskjálftar í þessarri viku, nokkuð færri en í síðustu viku þegar þeir voru 35. Flestir skjálftanna voru staðsettir við austurenda Öskjuvatns, þar sem stærsti skjálftinn var 1,6 að stærð. Níu smáskjálftar voru staðsettir á milli Öskju og Herðubreiðartagla og aðrir sex skjálftar við Herðubreið.

Þrír skjálftar mældust um 20-30 km norðvestan við Hofsjökul. Stærstur þeirra var 2,3 að stærð þann 10. október, hinir tveir voru 1,6 og 1,3 stærð, nokkuð vestar en sá stærsti. Tveir skjálftar, af stærð 1,4 og 0,6 mældust í Langjökli og einn stakur sunnan við jökulinn að stærð 1,2. Stakur smáskjálfti mældist við Skjaldbreið.

Mýrdalsjökull

Þrettán jarðskjálftar voru staðsettir í Mýrdalsjökli í vikunni sem er svipaður fjöldi og í síðustu viku. Meirihluti skjálftanna voru í nágrenni við Goðabungu, þar sem stærsti skjálftinn var 1,3 að stærð. Aðrir skjálftar á svæðinu voru dreifðir í og við öskjuna. Fjórir jarðskjálftar voru staðsettir á víð og dreif um Torfajökulsöskjuna, sem er aðeins færri en í síðustu viku þegar þeir voru níu.

Jarðvakt