	Veðurstofa Íslands Jarðeðlissvið

Jarðskjálftar 20191118 - 20191124, vika 47

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Suðurland

Rúmlega Tuttugu jarðskjálftar mældust á víð og dreif um suðurlandið í vikunni, svipaður fjöldi og í síðustu viku. Virknin dreyfðist jafnt yfir Suðurlandsbrotarbeltið og mældust þar tíu smáskjálftar. Sjö skjálftar mældust á Hengilsvæðinu, sá stærsti 1,0 að stærð þann 18. nóvember kl. 15:47. Tveir skjálftar mældist í Heklu 21. og 22. nóvember og voru þeir báðir undir 1,0 að stærð.

Reykjanesskagi

Fjórtán jarðskjálftar voru staðsettir á Reykjanesskaga í vikunni og var virknin svipuð og vikuna á undan. Stærsti skjálftinn mældist 1,8 að stærð þann 19. nóvember í Stampahrauni á suðvesturhorni skagans. Skjálfti af stærð 1,6 mældist þann 18. nóvember austan við Kleifarvatn. Við Bláfjöll mældust tveir smáskjálftar. Rúmlega tuttugu jarðskjálftar voru staðsettir út á Reykjaneshrygg í vikunni, sá stærsti 2,6 að stærð þann 18. nóvember kl.10:13. Virknin var töluvert minni en vikuna á undan þegar um 150 skjálftar voru mældir í jarðskjálftahrinu sem hófst 16. nóvember og stóð yfir í tvo sólahringa.

Norðurland

Um 65 jarðskjálftar mældust á Tjörnesbrotabeltinu í vikunni eða um helmingi fleiri en vikuna á undan. Þar voru um 40 á Grímseyjarbeltinu og tæplega tuttugu á Húsavíkur-Flateyjar misgenginu. Stærsti skjálftinn mældist 2,4 að stærð um 14 km norður af Grímsey þann 24. nóvember kl.11:32. Þá voru þrír smáskjálftar staðsettir við Kröflu, einn við Þeistareyki og einn við Skuggadyngju, allir undir 1,0 að stærð.

Hálendið

Tæplega 400 jarðskjálftar mældust á hálendinu í vikunni, þar voru um helmingur skjálftanna staðsettir við Öskju þar sem að stærsti skjálftinn mældist 2,3 að stærð þann 19. nóvember kl 02:09. Töluvert hefir dregið úr jarðskjálftahrinunni sem hófst 7. nóvember, þar sem að rúmlega 210 jarðaskjálftar mældust í vikunni, en vikuna á undan voru þeir um 930 talsins. Við Herðubreið og Herðurbreiðartögl mældust 27 skjálftar í vikunni og voru þeir allir undir 1,0 að stærð. Austan við Kollóttudyngju voru um 70 jarðskjálftar mældir dagana 19. til 22. nóvember, sá stærsti 2,8 að stærð þann 19. nóvember kl. 08:23. Um 70 jarðskjálftar mældust undir Vatnajökli í vikunni, svipaður fjöldi og vikuna áður. Í Bárðarbungu mældust um tuttugu skjálftar og var þar jafnframt stærsti skjálfti vikunnar, 4,0 að stærð, staðsettur í suðaustanverðri öskjunni og fylgdu nokkrir eftirskjálftar í kjölfarið, þeir stærstu af stærð 3,5 og 2,8. Í berggangnum mældust fimmtán skjálftar þar sem að hann beygir til norðurs og undir Dyngjujökli og við Holuhraun mældust átta skjálftar, voru þeir allir undir 1,0 að stærð. Við Grímsvötn voru sex smáskjálftar staðsettir og við Vestari Skaftárketil mældust þrír skjálftar, sá stærsti 1,5 að stærð þann 24. nóvember. Fimm smáskjálftar urðu í Öræfajökli en þar mældist enginn skjálfti í vikunni á undan. Þrír skjálftar mældust vestan við Esjufjöll og var stærsti 1,6 að stærð. Örfáir smáskjálftar voru svo staðsettir í Síðujökli, norðan við Skaftafellsfjöll og á Svínafellsjökli. Við Langjökul mældust sautján jarðskjálftar í vikunni, töluvert fleiri en vikuna á undan þegar að þeir voru fimm talsins. Rétt austan við Jarlhettur mældust átta skjálftar, stærstu skjálftarnir mældust 2,6 að stærð með nokkura sekúntu millibili þann 19. nóvember kl. 16:41. Þrír jarðskjálftar mældust norðvestan við Þórisjökul, sá stærsti 2.1 að stærð og sunnan við Hafrafell voru þrír skjálftar staðsettir af stærð 2,0 ¿ 2,5.

Mýrdalsjökull

Sjö jarðskjálftar mældust undir Mýrdalsjökli í vikunni, fleiri en í síðustu viku þegar að þeir voru fjórir talsins. Stærstur var 1,7 að stærð í öskjunni þann 18. nóvember og einn smáskjálfti af stærð 0,5 mældist í Sólheimajökli þann 22. nóvember.

Jarðvakt