	Veðurstofa Íslands Jarðeðlissvið

Jarðskjálftar 20191125 - 20191201, vika 48

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 570 jarðskjálftar voru staðsettir með SIL-mælakerfi Veðurstofu Íslands í vikunni, aðeins fleiri en í síðustu viku þegar þeir voru um 530. Stærsti skjálfti vikunnar var 3,8 að stærð í norðaustanverðri Bárðarbunguöskjunni. Skjálftinn varð kl. 22:22 að kvöldi 1. desember, mínútunni áður urðu tveir skjálftar að stærð 3,0 á sama stað með um 20 sekúndna millibili, það voru jafnframt næst stærstu skjálftar vikunnar. Jarðskjálftavirkni við Öskju fer hægt minnkandi, en um 130 jarðskjálftar mældust þar í vikunni, samanborið við um 215 í síðustu viku.

Suðurland

Á Suðurlandsbrotabeltinu mældust 24 smáskjálftar í vikunni, allir undir 1,0 að stærð, sem er aðeins meira en í síðustu viku. Skjálftarnir voru staðsettir á víð og dreif yfir brotabeltið. Nokkuð meiri virkni var á Hengilssvæðinu samanborið við síðustu viku, en nú mældust tæplega 70 skjálftar þar en sjö í síðustu viku. Meirihluti skjálftanna varð við Húsmúla, eða um 40, og þar varð einnig stærsti skjálftinn á svæðinu í þessarri viku 1,8 að stærð. Virknin við Húsmúla var mest þann 30. nóvember. Tíu skjálftar urðu við Gráuhnúka þann 26. nóvember og var sá stærsti 1,7 að stærð. Að auki mældust nokkrir smáskjálftar í nágrenni við Ölkelduháls og vestan við Dyrafjöll. Þrír smáskjálftar urðu í vikunni í nágrenni Heklu. Smáskjálfti að stærð 0,2 varð um 2 km SA við Heklu þann 26. nóvember og 28. nóvember urðu tveir skjálftar að stærð 1,1 og 1,0 við Litlu-Heklu um 2 km NV við topp Heklu.

Reykjanesskagi

Um 20 jarðskjálftar voru staðsettir á Reykjaneshrygg í vikunni, sem er svipaður fjöldi og í síðustu viku. Flestir skjálftanna voru staðsettir um 35 km SV af Reykjanestá. Tveir stærstu skjálftarnir voru 2,5 og 2,6 að stærð. Alls mældust 85 skjálftar á Reykjanesskaga í vikunni, sem er töluvert meiri virkni en í síðustu viku þegar 14 skjálftar mældust þar. Í vikunni var virknin mest við Fagradalsfjall rétt NA við Grindavík en rúmlega 30 smáskjálftar urðu þar þann 28. nóvember, og alls urðu þar um 50 skjálftar í vikunni. Stærsti skjálfti vikunnar á Reykjanesskaga var 2,3 að stærð og varð skammt SV við Kleifarvatn. Níu smáskjálftar voru staðsettir á og við Reykjanes og einn skjálfti af stærð 1,7 í Bláfjöllum. Einnig mældust fimmtán smáskjálftar í nágrenni Trölladyngju þann 26. nóvember.

Norðurland

Svipaður fjöldi jarðskjálfta mældist á Tjörnesbrotabeltinu í vikunni miðað við þá síðustu. Nú voru þeir 68 samanborið við 65 í síðustu viku. Flestir skjálftarnir röðuðu sér á Grímseyjarbeltið og þar af flestir skammt NA við Grímsey. Þar var stærsti skjálfti vikunnar á svæðinu 2,7 að stærð. Einnig urðu nokkrir smáskjálftar á Húsavíkur-Flateyjarmisgenginu og í Eyjafjarðarál en þar var stærsti skjálftinn 2,4 að stærð. Sjö smáskjálftar urðu á Kröflusvæðinu og þrír við Þeistareyki, allir undir 1,0 að stærð.

Hálendið

Jarðskjálftavirkni við Öskju og Herðubreið er áfram nokkur en í vikunni mældust þar 155 jarðskjálftar, samanborið við um 320 í síðustu viku. Stærsti skjálfti vikunnar á svæðinu var 2,0 að stærð. Frá því að jarðskjálftahrina hófst þar 7. nóvember hafa rúmlega 1900 jarðskjálftar mælst þar og hefur virknin verið mest skammt austan við Öskju.

Rúmlega 90 jarðskjálftar mældust undir Vatnajökli í vikunni, aðeins fleiri en í síðustu viku þegar þeir voru um 70. Stærsti skjálfti vikunnar þar og jafnframt á öllu landinu í vikunni varð í Bárðarbunguöskjunni að kvöldi 1. desember og var 3,8 að stærð. Á mínútunni fyrir þann skjálfta urðu tveir skjálftar að stærð 3,0 á sama stað sem eru næst stærstu skjálftar vikunnar. Alls mældust 27 skjálftar í Bárðarbunguöskjunni í vikunni og 17 smáskjálftar austan við öskjuna og í bergganginum sem liggur að Holuhrauni.

Sjö smáskjálftar mældust í og við Grímsvötn sem er svipuð virkni og í síðustu viku. Í og við Öræfajökul mældust 14 smáskjálftar, aðeins fleiri en í síðustu viku þegar þeir voru fimm. Um tíu jarðskjálftar urðu á Lokahrygg, sá stærsti 2,4. Einnig voru nokkrir jarðskjálftar SA við Grímsvötn, þar sem stærsti skjálftinn var 1,7 að stærð og og smærri skjálftar N við Öræfajökul.

Átta skjálftar voru staðsettir við Jarlhettur SA við Langjökul, þar sem stærsti skjálftinn var 2,1 að stærð og þrír skjálftar SV við Langjökul í nágrenni Þórisjökuls. Tveir skjálftar af stærð 1,8 og 2,0 voru staðsettir í Austurdal um 30 km N við Hofsjökul.

Mýrdalsjökull

Fjórtán skjálftar urðu í Mýrdalsjökli í vikunni, tvöfalt fleiri en í síðustu viku, sá stærsti 2,0 að stærð í austanverðri Kötluöskjunni. Flestir skjálftanna voru undir 1,0 að stærð. Einn smáskjálfti mældist sunnan við Eyjafjallajökul og sautján smáskjálftar urðu á víð og dreif í Torfajökulsöskjunni sá stærsti 1,4 að stærð.

Jarðvakt