	Veðurstofa Íslands Jarðeðlissvið

Jarðskjálftar 20200323 - 20200329, vika 13

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 1200 jarðskjálftar voru staðsettir með SIL mælakerfi Veðurstofu Íslands í vikunni, færri en í síðustu viku þegar tæplega 1500 jarðskjálftar voru staðsettir. Enn er mikil virkni á Reykjanesskaga eftir að jarðskjálftahrina hófst þar þann 12. mars, en virkni hefur verið viðvarandi þar á árinu. Tæplega 800 jarðskjálftar mældust þar í vikunni, þar af einn 3,3 að stærð 25. mars sem fannst á Reykjanesi og á Höfuðborgarsvæðinu, en þrír jarðskjálftar sem voru undir þremur að stærð fundust að auki í Grindavík. Stærstu skjálftar vikunnar voru tveir, báðir 3,5 að stærð í hrinu á Reykjaneshrygg rétt norðan við Eldey sem hófst 28. mars. Þrír aðrir skjálftar yfir 3 að stærð mældust í hrinunni. Hrina hófst í Öxarfirði um 8 km suðvestur af Kópaskeri 27. mars. Stærsti skjálfti hrinunnar var 3,1 að stærð og fannst hann á Kópaskeri. Alls mældust sjö skjálftar yfir þremur að stærð í vikunni. Einn smáskjálfti mældist í Heklu.

Suðurland

Fremur rólegt var á Suðurlandi í vikunni, en 8 smáskjálftar mældust á Suðurlandsbrotabeltinu, miklu færri en í síðustu viku þegar tæplega 50 skjálftar mældust þar. Skjálftarnir voru flestir undir einum að stærð og voru dreifðir um beltið. 13 jarðskjálftar mældust á Hengilssvæðinu, af þeim voru fimm við Nesjavelli en þar var smá hrina í síðustu viku. Einn smáskjálfti mældist í Heklu, 0,1 að stærð.

Reykjanesskagi

Um 790 jarðskjálftar mældust á Reykjanesskaga í vikunni en mikil virkni hefur verið á skaganum síðustu vikur. Stærsti skjálftinn var 3,3 að stærð þann 25. mars kl 09:44 rúmlega 3 km NNA af Grindavík og fannst hann í Grindavík og á Höfuðborgarsvæðinu. Þann 28. mars mældust tveir skjálftar 2,9 og 2,8 að stærð með 15 sek millibili kl 11:47 á svipuðum slóðum og fundust þeir einnig í Grindavík. Auk þess mældist skjálfti 2,5 að stærð 24. mars kl 16:55 sem einnig fannst í Grindavík. Langflestir skjálftarnir mældust umhverfis fjallið Þorbjörn þar sem landris hefur verið að undanförnu. Sjö skjálftar mældust nærri Kleifarvatni, sá stærsti 2,5 að stærð 28. mars. Aðrir skjálftar voru dreifðir um skagann.

Rúmlega 130 jarðskjálftar mældust á Reykjaneshrygg, langflestir í hrinu sem hófst 28. mars rétt norðan við Eldey og stóð í rúman sólarhring. Tveir stærstu skjálftar hrinunnar voru 3,5 að stærð kl 14:42 og 15:04 þann 28. mars. Þeir voru jafnframt stærstu skjálftar vikunnar. Þrír aðrir skjálftar yfir 3 að stærð mældust í hrinunni, einn sem var 3,3 að stærð og tveir sem voru 3,0 að stærð. Engar tilkynningar bárust Veðurstofunni um að þeir hafi fundist í byggð.

Norðurland

Rúmlega 90 jarðskjálftar mældust á Tjörnesbrotabeltinu í vikunni, mun fleiri en í vikunni á undan þegar 20 skjálftar mældust þar. Flestir skjálftarnir mældust á Grímseyjarbeltinu, en hrina hófst í Öxarfirði um 8 km SV af Kópaskeri þann 27. mars. Stærsti skjálfti hrinunnar var 3,1 að stærð kl 06:56 þann 27. mars og fannst á Kópaskeri. Alls mældust um 80 jarðskjálftar í hrinunni. Tólf jarðskjálftar mældust inni á Norðurlandi, þar af fimm smáskjálftar við Bæjarfjall og sex við Kröflu.

Hálendið

Um 120 jarðskjálftar mældust á hálendinu í vikunni. Rúmlega 60 jarðskjálftar mældust undir Vatnajökli, mun fleiri en í síðustu viku þegar þeir voru um 35. Fimmtán skjálftar mældust í Bárðarbungu, sá stærsti 1,3 að stærð. Rúmlega 20 skjálftar mældust í bergganginum sem liggur að Holuhrauni, þar af voru tíu á djúpa svæðinu suðaustur af Bárðarbungu þar sem gangurinn beygir til norðausturs. Um tugur skjálfta mældist í Grímsvötnum, sá stærsti 2 að stærð. Sjö skjálftar mældust við Hamarinn, sá stærsti 1,7 að stærð. Tveir smáskjálftar mældust í Öræfajökli. Einn skjálfti mældist í Kverkfjöllum.

Tæplega 60 jarðskjálftar mældust fyrir norðan Vatnajökul. 17 smáskjálftar mældust við Öskju, rúmlega 20 við Herðubreið og Herðubreiðartögl og 18 við Dyngjufjöll ytri.

Mýrdalsjökull

Fjórir jarðskjálftar mældust undir Mýrdalsjökli í vikunni, sá stærsti 1,8 að stærð. Tveir smáskjálftar mældust í Eyjafjallajökli. Enginn skjálfti mældist á Torfajökulssvæðinu.

Jarðvakt