	Veðurstofa Íslands Jarðeðlissvið

Jarðskjálftar 20200629 - 20200705, vika 27

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 4300 jarðskjálftar voru staðsettir með SIL-mælakerfi Veðurstofu Íslands í vikunni, mun færri en vikuna á undan þegar um 7200 jarðskjálftar voru staðsettir. Ekki hefur unnist tími til að yfirfara alla skjálftana en um 1170 jarðskjálftar eru yfirfarnir. Langflestir skjálftarnir eða um 3000 voru í hrinunni við mynni Eyjafjarðar sem hófst þann 19. júní og er enn yfirstandandi. Þrír skjálftar yfir 3,0 að stærð mældust í vikunni, allir í hrinunni fyrir norðan. Stærsti skjálftinn var 3,7 að stærð 2. júlí kl 19:20. Tveir aðrir skjálftar 3,0 að stærð mældust 2. og 4. júlí kl 04:15 og 20:30. Skjálftarnir fundust víða í byggð. Jarðskjálftavirkni heldur einnig áfram á Reykjanesskaga, en rúmlega 1060 jarðskjálftar mældust þar í vikunni. Stærsti skjálftinn þar var 2,9 að stærð um 3 km NNA af Grindavík þann 5. júlí kl 20:36 og fannst hann á svæðinu. Tveir smáskjálftar mældust í Heklu í vikunni og þrír við Grímsvötn.

Suðurland

Sautján smáskjálftar mældust vítt og breytt á Suðurlandsbrotabeltinu í vikunni, mun færri en í vikunni á undan þegar þeir voru tæplega 30. Fimm smáskjálftar mældust á Hengilssvæðinu. Tveir skjálftar mældust í Heklu, báðir undir 0,5 að stærð.

Reykjanesskagi

Rúmlega 1060 jarðskjálftar mældust á Reykjanesskaga í vikunni, af þeim eru 320 yfirfarnir. Í síðustu viku mældust um 1200 jarðskjálftar á svæðinu. Stærsti skjálftinn var 2,9 að stærð um 3 km NNA af Grindavík þann 5. júlí kl 20:36 og fannst hann á svæðinu. Skjálftavirknin var dreifð um skagann, en langmesta virknin var í nágrenni við Grindavík. Jarðskjálftavirknin á Reykjanesi er áframhaldandi frá fyrri vikum og orsakast af kvikuinnskotum undir jarðskorpunni með miðju rétt vestan við fjallið Þorbjörn. Tæplega 20 jarðskjálftar mældust á Reykjaneshrygg, færri en í síðustu viku þegar um 30 skjálftar mældust. Stærsti skjálftinn var 1,8 að stærð.

Norðurland

Jarðskjálftahrinan sem hófst við mynni Eyjafjarðar þann 19. júní er enn yfirstandandi, en aðeins hefur dregið úr henni. Rúmlega 3030 jarðskálftar hafa mælst á svæðinu í vikunni og búið er að fara yfir rúmlega 660 af þeim. Flestir skjálftarnir eru vestast á Húsavíkur-Flateyjar misgenginu, eða um 2800 skjálftar. Þrír þeirra voru yfir 3,0 að stærð, sá stærsti var 3,7 að stærð 2. júlí kl 19:20 og var hann jafnframt stærsti skjálfti vikunnar. Tveir aðrir skjálftar 3,0 að stærð mældust 2. og 4. júlí kl 04:15 og 20:30. Skjálftarnir fundust víða í byggð. Rúmlega 150 skjálftar mældust í Eyjafjarðarál, sá stærsti 2,9 að stærð. Tæplega 20 skjálftar mældust á Gímseyjarbeltinu, sá stærsti 2,0 að stærð.

Hálendið

Tæplega 140 jarðskjálftar mældust á Hálendinu í vikunni, mun fleiri en í síðustu viku þegar um 80 skjálftar mældust. Undir Vatnajökli mældust tæplega 30 skjálftar, svipaður fjöldi og í síðustu viku. Enginn skjálfti mældist við Bárðarbungu, en tólf djúpir skjálftar mældust við djúpa svæðið í ganginum út frá Bárðarbungu. Fjórir smáskjálftar mældust í ganginum. Tveir smáskjálftar mældust í Kverkfjöllum. Þrír skjálftar mældust við Grímsvötn, allir undir einum að stærð. Einn smáskjálfti mældist í Öræfajökli.

Rúmlega 20 smáskjálftar mældust við Öskju í vikunni, allir undir 1,4 að stærð. Fjórtán smáskjálftar mældust í þyrpingu um 14 km vestan við Öskju. Rúmlega 50 skjálftar mældust við Herðubreið og Herðubreiðartögl, allir undir 2 að stærð. Sjö skjálftar mældust suðvestur af Svartárvatni, þeir stærstu 1,4 að stærð. Tæplega 30 jarðskjálftar mældust vestan við Bæjarfjall.

Einn smáskjálfti mældist í Langjökli, einn í Þórisjökli og einn um 6 km vestur af Þórisjökli. Einn skjálfti mældist við Skjaldbreiður, 1,7 að stærð.

Mýrdalsjökull

Átján skjálftar mældust undir Mýrdalsjökli í vikunni, mun fleiri en í síðustu viku þegar fjórir skjálftar mældust. Stærsti skjálftinn var 2,9 að stærð þann 5. júlí. Skjálftarnir voru flestir innan eða í kringum Kötluöskjuna. Einn smáskjálfti mældist í Eyjafjallajökli. Fjórir skjálftar mældust á Torfajökulssvæðinu, sá stærsti 1,8 að stærð.

Jarðvakt