	Veðurstofa Íslands Jarðeðlissvið

Jarðskjálftar 20201012 - 20201018, vika 42

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 750 jarðskjálftar voru mældir með sjálfvirka SIL mælakerfi Veðurstofu Íslands í vikunni, um helmingi færri en í síðustu viku þegar um 1200 jarðskjálftar mældust. Stærsti skjálfti vikunnar var 3,3 að stærð kl. 22:02 þann 17. október, 1,5 km. NNV af Húsavík. Skjálftinn fannst í byggð. Minni virkni var á flestum svæðum samanborið við síðustu viku. Einn skjálfti mældist í Heklu og sex smáskjálftar mældust við Grímsvötn, sá stærsti 0,9 að stærð. Áframhaldandi smáskjálftavirkni er á djúpa svæðinu SA við Bárðarbungu.

Suðurland

Tæplega 50 jarðskjálftar voru staðsettir á Suðurlandsbrotabeltinu í vikunni, um helmingi færri en í síðustu viku. Skjálftarnir voru staðsettir vítt og breitt á beltinu. Stærsti skjálftinn var 2,3 að stærð þann 18. Október, við Nesjavellir. Um 25 jarðskjálftar mældust á Hengilssvæðinu, af þeim mældust flestir við Nesjavelli. Einn skjálfti mældist í Heklu, 1,2 að stærð.

Reykjanesskagi

Tæplega 200 jarðskjálftar voru staðsettir á Reykjanesskaga í vikunni, álíka margir og í síðustu viku þegar 200 skjálftar voru staðsettir þar. Flestir skjálftarnir mældust við Vigdísarvelli og Kleifarvatn, en aðrir dreifðust um skagann. Stærsti skjálftinn var 2,5 að stærð við Vigdísarvelli, þann 14. október kl 20:59. Um 12 skjálftar mældust á Reykjaneshrygg, sá stærsti 1,7 að stærð.

Norðurland

Um 360 jarðskjálftar mældust úti fyrir Norðurlandi í vikunni, miklu færri en í síðustu viku þegar um 670 skjálftar mældust. Langflestir skjálftarnir eða rúmlega 280 mældust vestast á Húsavíkur-Flateyjar misgenginu þar sem virkni hefur verið einna mest í sumar. Tæplega 30 jarðskjálftar mældust í þyrpingu austar á misgenginu, um 7 km SA af Flatey, sá stærsti 1,0 að stærð. 12 jarðskjálftar mældust 1,5 km NNV af Húsavík þann 17. og 18. október. Stærsti skjálftinn var 3,3 að stærð kl. 22:02 þann 17. október og var líka stærsti skjálfti vikunnar. Skjálftinn fannst í byggð. Tæplega 20 smáskjálftar mældust í Axarfirði og um tíu á Grímseyjarbeltinu, sá stærsti 1,2 að stærð. Einn smáskjálfti mældist á Kröflusvæðinu, tveir við Bæjarfjall og nokkrir við Gæsafjöll.

Hálendið

Um 110 jarðskjálftar mældust á hálendinu í vikunni. Sex smáskjálftar mældust við Grímsvötn, sá stærsti 0,9 að stærð. Tæplega 15 smáskjálftar mældust á djúpa svæðinu SA við Bárðarbungu, sá stærsti 1,6 að stærð. Engir skjálftar mældust í Bárðarbungu. Átta skjálftar mældust við og austur af Hamrinum, sá stærsti 2,2 að stærð. Fjórir smáskjálftar mældust við Öræfajökul. Tæplega 20 smáskjálftar mældust við Öskju og rúmlega 30 skjálftar mældust við Herðubreið og Herðubreiðartögl, sá stærsti þar 2,5 að stærð, þann 12. október. Einn skjálfti 1,5 að stærð mældist í Hofsjökli þann 12. október. Sex jarðskjálftar mældust í Geitlandsjökli, sá stærsti 2,9 að stærð og tíu skjálftar mældust suður af Langjökli, stærsti skjálftinn þar var 1,7 að stærð.

Mýrdalsjökull

Rúmlega 20 jarðskjálftar mældust undir Mýrdalsjökli í vikunni, sá stærsti 1,1 að stærð, flestir innan öskjunnar. Einn smáskjálfti mældist í Eyjafjallajökli og einn skjálfti mældist á Torfajökulsvæðinu, sá stærsti 1,6 að stærð 17 október.

Jarðvakt