	Veðurstofa Íslands Jarðeðlissvið

Jarðskjálftar 20210329 - 20210404, vika 13

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 2000 jarðskjálftar mældust með SIL-mælakerfi Veðurstofu Íslands í vikunni. Af þeim hafa tæplega 900 verið yfirfarnir, aðrir eru smáskjálftar á Reykjanesi og við Grímsey sem verður farið yfir þegar tími gefst til. Mesta virknin var á Reykjanesskaga. Skjálftahrina var við Grímsey og við Lambafell í Þrengslum. Stærsi skjálfti vikunnar var 1. apríl kl. 20:11 við Grímsey, 3,8 að stærð.

Suðurland

Tæplega 20 smáskjálftar urðu skammt norðan við Raufarhólshelli. Svipaður fjöldi varð á Hengilssvæðinu, þar sem stærsti skjálftinn var 30. mars kl. 00:51, 2,7 skammt austan við Kattatjarnir. Nokkrir skjálftar voru á Hellisheiði, tveir um og yfir tveimur stigum aðrir mun minni. Nokkrir smáskjálftar voru á Suðurlandsundirlendinu. Stakur skjálftir varð í Heklu 2. apríl kl. 14:44, 1,2 að stærð.

Reykjanesskagi

Yfir 500 skjálftar voru staðsettir á Reykjanesskaga í vikunni af um 1500 í heildina. Við Reykjanestá voru rúmlega 20 skjálftar. Stærsti skjálftinn var 2,9 að stærð þann 29. mars kl. 04:05. Tæplega 70 jarðskjálftar urðu skammt norðaustan og norðvestan við Gríndavík. Stærsti skjálftinn, á því svæði, var rétt austan við fjallið Þorbjörn, 29. mars kl. 02:11, 2,9 að stærð. Nokkrir skjálftar voru á Reykjaneshrygg.
Rúmlega 100 skjálftar voru við Fagradalsfjall, syðst í ganginum við Nátthaga. Tveir skjálftar voru yfir tveimur stigum, báðir 1. apríl með nokkura mínútna millibili. Sá fyrri var kl. 03:42, 2,4 að stærð og sá síðari kl. 03:50, 2,5 að stærð. Tæplega 200 jarðskjálftar voru suður af Keili og við Litla-Hrút. Stærsti skjálftinn var 3,0 að stærð, 2. apríl kl. 02:05 um 1,0 km suðvestur af Keili. Nokkrar tilkynningar bárust, um að hann hefði fundist, á höfuðborgarsvæðinu, upp í Borgarfjörð og austur í Bláskógabyggð.
Við Núpshlíðarháls og á svæðinu austur að Sveifluhálsi voru 30 skjálftar staðsettir. Stærsti var 2,9 þann 30. mars kl. 19:12, um 1,6km norðaustur af Hrútafelli. Tilkynningar bárust frá Hafnarfirði um að hann hefði fundist þar. Við Krýsuvík og Kleifarvatn voru rúmlega 20 skjálftar, stærstu um tvö stig.
Um 20 skjálftar voru í Brennisteinsfjöllum. Stærsti skjálftinn var 2,8 að stærð, 31. mars kl. 19:28, um 7km suðaustur af Helgafelli. Smáskjálfti varð á sama stað nokkrum mínútum síðar. Þann 29. mars kl. 04:45 hófst skjálftahrina við Lambafell í Þrengslum. Hrinan stóð til um kl. 08 næsta morgun en þá höfðu 45 skjálftar mælst. Stærsti skjálftinn var 2,9 að stærð kl. 04:49. Tveir aðrir skjálftar voru um og rétt yfir tveimur stigum, aðrir mun minni. Nokkrir skjálftar voru í Bláfjöllum.

Norðurland

Rúmlega 130 skjálftar voru staðsettir úti fyrir Norðurlandi af tæplega 300 í heildina. Af þessum 130 voru um 90 (230 í heildina) norðaustan við Grímsey en þar hófst skjálftahrina um kvöldmatarleytið 1. apríl. Hrinan stóð fram eftir nóttu en virknin stóð út vikuna. Nokkrir skjálftar voru yfir þremur stigum, sá stærsti var 3,8 þann 1. apríl kl. 20:11 og var það jafnframt stærsti skjálfti vikunnar. Annar skjálfti af stærð 3,6 varð nokkru síðar. Ein tilkynning barst frá Grímsey um að stærsti skjálftinn hefði fundist þar. Um 20 skjálftar voru staðsettir í Eyjafjarðaráli, allir um og innan við tvö stig. Aðrir skjálftar voru í Öxarfirði og á Skjálftanda. Fáeinir smáskjálftar voru við Kröflu.

Hálendið

Tæplega 50 skjálftar mældust í Vatnajökli heldur fleiri en í síðustu viku þegar þeir voru 30. Nokkrir skjálftar voru við Bárðarbungu, stærsti 1,5 að stærð. Fimmtán smáskjálftar voru á djúpa svæðinu suðaustur af Bárðarbungu, flestir urðu 29. mars. Tæplega 10 skjálftar urðu Í Öræfajökli, stærsti var 3. apríl kl. 12:14, 1,9 að stærð. Aðrir voru smáskjálftar. Rólegt var í Grímsvötnum. Fimm skjálftar urðu við Skaftárkatlana, stærsti 1,7 að stærð. Tæplega 40 jarðskjálftar urðu við Öskju, miðað við 10 í fyrri viku. Stærsti skjálftinn var 2,5, 31. mars kl. 23:42, aðrir mun minni. Tæplega 20 smáskjáfltar voru við Herðubreið og Herðubreiðartögl. Stakur smáskjálfti var í Hofsjökli og annar í Langjökli.

Mýrdalsjökull

Rólegt var í Mýrdalsjökli.

Jarðvakt