	Veðurstofa Íslands Jarðeðlissvið

Jarðskjálftar 20210412 - 20210418, vika 15

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 960 jarðskjálftar mældust með sjálfvirka SIL-mælakerfi Veðurstofu Íslands í liðinni viku, talsvert færri en í fyrri viku þegar um 1400 jarðskjálftar mældust. Búið er að yfirfara um 770 skjálfta liðinnar viku. Stærsti skjálfti vikunnar var 2,8 að stærð þann 16. apríl kl. 06:00 við Litla-Hrút. Einnig mældust nokkrir skjálftar norður á Kolbeinseyjarhrygg sem voru yfir 3 að stærð. Um 15 skjálftar mældist í Mýrdalsjökli í vikunni, fimm skjálftar í Grímsvötnum og fimm í Öræfajökli. Um 60 djúpir smáskjálftar mældust austan við Bárðarbungu.

Suðurland

Rúmlega 80 jarðskjálftar voru staðsettir á Suðurlandi í vikunni og var stærsti skjálftinn 2,4 að stærð þann 15. apríl kl. 13:47 í mynni Þjórsárdals. Flestir skjálftanna voru í hrinu við Nesjavallaveg, vestan Dyrafjalla. Einnig mældust nokkrir skjálftar á Hengilssvæðinu og í Þrengslunum. Stöku skjálftar mældust á Suðurlandsbrotabeltinu og einn rétt suðvestan Heklu.

Reykjanesskagi

Um 420 skjálftar mældust á Reykjanesskaga í liðinni viku. Stærsti skjálftinn mældist 2,8 að stærð þann 16. apríl kl. 06:00 við Litla-Hrút. Þetta var jafnframt stærsti skjálfti vikunnar. Mesta virknin var í bergganginum á milli Keilis og Litla-Hrúts þar sem um 250 skjálftar mældust. Aðrir skjálftar dreifðust frá Reykjanestá austur að Suðurlandsvegi. Ein þyrping skjálfta var sunnan við Bláfjöll á þekktu misgengi.

Um 40 skjálftar mældust á Reykjaneshrygg, nokkra kílómetra frá landi. Stærsti skjálftinn var 2,5 að stærð.

Norðurland

Um 60 jarðskjálftar mældust á Norðurlandi í vikunni, um helmingur þeirra var á Húsavíkur-Flateyjarmisgenginu. Stærsti skjálftinn á Norðurlandi var 2,2 að stærð í Öxarfirði. Nokkrir skjálftar mældust rétt norðan við Hrísey.

Þrír skjálftar mældust við Kröflu og einn við Þeistareyki. Einn skjálfti mældist í Blönduhlíðarfjöllum í Skagafirði. Þessum til viðbótar mældust nokkrir skjálftar norður á Kolbeinseyjarhrygg.

Hálendið

Um 130 skjálftar mældust á hálendinu í liðinni viku. Undir Vatnajökli mældust um 85 skjálftar. Þrír skjálftar mældust í Bárðarbunguöskjunni en rúmlega 60 skjálftar mældust austan Bárðarbungu þar sem oft mælast djúpir skjálftar. Tveir skjálftar mældust á Lokahrygg. Við Grímsvötn mældust fimm skjálftar og fimm í Öræfajökli. Norðan Vatnajökuls mældust tæplega 50 skjálftar, sá stæsti var 2,0 að stærð. Virknin var bundin við nágrenni Öskju og Herðubreiðar. Einn skjálfti mældist í Tungnafellsjökli.

Tveir skjálftar mældust í Skjaldbreið og þrír á Torfajökulssvæðinu.

Mýrdalsjökull

Um 15 skjálftar mældust í Mýrdalsjökli í liðinni viku og var sá stærsti 2,5 að stærð. Flestir skjálftanna mældust innan Kötluöskjunnar en einn skjálfti mældist í Goðalandsjökli.

Jarðvakt