	Veðurstofa Íslands Jarðeðlissvið

Jarðskjálftar 20210426 - 20210502, vika 17

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 1400 jarðskjálftar mældust með sjálfvirka SIL-mælakerfi Veðurstofu Íslands í liðinni viku, heldur fleiri en í fyrri viku þegar um 1200 jarðskjálftar mældust. Búið er að yfirfara um 550 skjálfta. Stærsti skjálftinn mældist 3,8 að stærð þann 29. apríl kl. 11:38 um 2,6 km SA af Eiturhól við Nesjavallaveg. Skjálftinn fannst á Höfuðborgarsvæðinu og víðar. Hrina hefur verið á sama svæði og hefur um 400 skjálftar mælst þar, þar af rúmlega 100 yfirfarnir. Við Grímsvötn mældust 8 skjálftar, flestir um 6 km SV af Grímsfjall, sá stærsti 1,4 að stærð. 20 smáskjálftar mældust í Öræfajökli og nokkrir djúpir smáskjálftar mældust austan við Bárðarbungu. Ekki mældist skjálftar við Heklu.

Suðurland

Yfir 500 jarðskjálftar mældust á Suðurlandi í vikunni, þar af hafa um 150 verið yfirfarnir, stærsti skjálftinn mældist 3,8 að stærð þann 29. apríl kl. 11:38 um 2,6 km SA af Eiturhól við Nesjavallaveg. Skjálftinn fannst á Höfuðborgarsvæðinu og víðar. Hrina hefur verið á sama svæði og hafa um 400 skjálftar mælst þar, þar af rúmlega 100 yfirfarnir. Einnig mældust skjálftar á Hengilssvæðinu og í Þrengslunum. Stöku skjálftar mældust á Suðurlandsbrotabeltinu. Enginn skjálfti mældist við Heklu í vikunni.

Reykjanesskagi

Rúmlega 500 skjálftar mældust á Reykjanesskaga í liðinni viku, þar af hafa um 250 verið yfirfarnir. Stærsti skjálftinn mældist 3,2 að stærð þann 27. apríl kl. 04:57, rétt SV af Keili. Mesta virknin var á svæðinu milli Litla-Hrúts og Keilis, eða yfir 100 jarðskjálftar. Annars var smá virkni við Borgarfjall, NA af Sundhnúki og vestur af Kleifarvatni. Um 15 skjálftar mældust á Reykjaneshrygg, nokkra kílómetra frá landi. Stærsti skjálftinn var 2,1 að stærð.

Norðurland

Um 140 jarðskjálftar mældust á Norðurlandi í vikunni, þar af um 75 yfirfarnir, flestir á Grímseyarbeltinu. Stærsti skjálftinn á Norðurlandi var 2,0 að stærð, þann 30 apríl kl. 21:01, um 17 km norðnorðaustur af Ólafsfirði. Rúmlega 10 jarðskjálftar mældust í Öxarfirði. Tæplega 20 smáskjálftar mældust við Kröflu og Bæjarfjall.

Hálendið

Rúmlega 140 jarðskjálftar mældust á hálendinu í liðinni viku, þar af um 60 yfirfarnir. Undir Vatnajökli mældust um 80 skjálftar. Um 20 skjálftar mældust í Bárðarbunguöskjunni, sá stærsti 1,6 að stærð. Nokkrir smáskjálftar mældust austan Bárðarbungu þar sem oft mælast djúpir skjálftar. Nokkrir smáskjálftar mældust í Dyngjujökli. Við Grímsvötn mældust 8 skjálftar, flestir um 6 km SV af Grímsfjall, sá stærsti 1,4 að stærð. 20 smáskjálftar mældust við Öræfajökli. Norðan Vatnajökuls mældust tæplega 60 smáskjálftar, sá stærsti 1,8 að stærð, við Öskju. Mesta virknin var bundin við Öskju, Herðubreið og Herðubreiðartögl. Tveir smáskjálftar mældust austur af Hamrinum. Tveir smáskjálftar mældust í Langjökli.

Mýrdalsjökull

Um 30 smáskjálftar mældust í Mýrdalsjökli í liðinni viku og var sá stærsti 2,3 að stærð, þann 29. apríl kl. 14:43. Flestir skjálftanna mældust innan Kötluöskjunnar (austur enda) og í Kötlujökli. Tíu smáskjálftar mældust í Eyjafjallajökli, sá stærsti 1,4 að stærð og þrír á Torfajökulssvæðinu, sá stærsti 1,9 að stærð.

Jarðvakt