	Veðurstofa Íslands Jarðeðlissvið

Jarðskjálftar 20210503 - 20210509, vika 18

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 800 jarðskjálftar mældust með sjálfvirka SIL-mælakerfi Veðurstofu Íslands í liðinni viku, heldur færri en í fyrri viku þegar um 1400 jarðskjálftar mældust. Stærsti skjálftinn mældist 3,2 að stærð þann 3. maí kl. 03:04 í Móhálsadal vestan Kleifarvatn og fylgdi annar á svipuðum slóðum kl. 15:49. Skjálftarnir fundust á höfuðborgarsvæðinu og víðar. Nokkur virkni var norðan við gosstöðvarnar og við Kleifarvatn en einnig á djúpa svæðinu austan Bárðarbungu þar sem rúmlega 30 smáskjálftar mældust í vikunni. Að kvöldi 9. maí mældist skjálfti af stærð M2,9 um 12 km NNA við Grímsey.

Grímsvötn mældust 5 skjálftar, flestir á eða rétt norðan við Grímsfjall, sá stærsti M1,7 að stærð. Tíu smáskjálftar mældust í Öræfajökli og tveir við Þórðarhyrnu. Fjórir skjálftar mældust í Langjökli í vikunni sá stærsti M2,4. Ekki mældist skjálftar við Heklu en einn í Trippafjöllum sunnan hennar.

Suðurland

Yfir 150 jarðskjálftar mældust á Suðurlandi í vikunni, mun færri en í fyrri viku þegar þeir voru rúmlega 500 talsins. Hrinan við Eiturhól við Nesjavallaveg hélt áfram þó verulega hafi dregið úr henni í vikunni. Sá stærsti M2,5 að stærð þann 7. maí kl. 03:25.

Einnig mældust skjálftar á Hengilssvæðinu og í Þrengslunum. Tveir skjálftar mældust á Suðurlandsbrotabeltinu. Einn smáskjálfti mældist rétt austan við Trippafjöll en enginn skjálfti mældist við Heklu í vikunni.

Reykjanesskagi

Rúmlega 600 skjálftar mældust á Reykjanesskaga í liðinni viku, þar af hafa um 360 verið yfirfarnir. Stærsti skjálftinn mældist 3,2 að stærð þann 3. maí kl. 03:04 og annar af svipaðri stærð kl. 15:49, í Móhálsadal. Fundust þeir báðir í byggð. Mesta virknin var á svæðinu milli Litla-Hrúts og Keilis, tæplega 100 jarðskjálftar. Og einnig í Móhálsadal vestan við Kleifarvatn. Þann 8. maí kl. 20:02 mældist skjálfti af stærð M2,6 við sunnanvert Kleifarvatn. Nokkur virkni var í Brennisteinsfjöllum og Bláfjöllum og kl. 04:47 þann 8. maí varð skjálfti af stærð M2,7 í norðanverðum Húsfellsbruna í Heiðmörk. Annars var smá virkni NA af Sundhnúki og við Reykjanestá.

Fjórir skjálftar mældust á Reykjaneshrygg, nokkra kílómetra frá landi. Stærsti skjálftinn var M1,3 að stærð.

Norðurland

Rúmlega 100 jarðskjálftar mældust á Norðurlandi í vikunni nokkuð færri en í fyrir viku þegar um 140 skjálftar mældust. Flestir skjálftarnir á Grímseyarbeltinu en einnig var nokkur virkni á Húsavíkur-Flateyjarmisgenginu og í Eyjafjarðarál. Stærsti skjálftinn á Norðurlandi var M2,9 að stærð, þann 9. maí kl. 22:45, um 12 km norðnorðaustur af Grímsey. Tæplega 20 smáskjálftar mældust suðaustan við Flatey og um tíu skjálftar mældust í Öxarfirði. Tveir smáskjálftar mældust við Kröflu og Bæjarfjall. Einn smáskjálfti mældist í Mývatnssveit og annar í Kelduhverfi.

Hálendið

Um 130 jarðskjálftar mældust á hálendinu í liðinni viku sem er svipaður fjöldi og í fyrri viku. Undir Vatnajökli mældust tæplega 90 skjálftar. Átta skjálftar mældust í Bárðarbunguöskjunni, sá stærsti 1,9 að stærð. Rúmlega 30 smáskjálftar mældust austan Bárðarbungu þar sem oft mælast djúpir skjálftar mun meiri virkni en verið hefur undanfarið. Mældist stærsti skjálftinn M1,9 að stærð. Fjórir skjálftar mældust í Kverkfjöllum, stærsti M2,6 að stærð þann 5. maí kl. 13:18. Einn smáskjálfti mældist í Dyngjujökli. Við Grímsvötn mældust fimm skjálftar, flestir á eða norðan við Grímsfjall, sá stærsti M1,7 að stærð þann 4. maí. Tveir smáskjálftar mældust við Þórðarhyrnu, þrír í Esjufjöllum og tíu smáskjálftar við Öræfajökul. Norðan Vatnajökuls mældust rúmlega 30 smáskjálftar, helmingi færri en í fyrri viku. Sá stærsti mældist M1,8 að stærð, við Öskju. Mesta virknin var bundin við Öskju, Herðubreið og Herðubreiðartögl en tveir smáskjálftar mældust á Mývatnsöræfum. Tveir smáskjálftar mældust austur af Hamrinum. Sjö skjálftar mældust í Langjökli, sá stærsti M2,4 þann 6. maí og þrír smáskjálftar austantil í Skjaldbreið.

Mýrdalsjökull

Rúmlega 10 skjálftar mældust í Mýrdalsjökli í liðinni viku mun færri en í fyrri viku þegar um 30 skjálftar mældust. Mældist sá stærsti M2,7 að stærð, þann 7. maí kl. 20:46 og þann 3. maí mældust tveir skjálftar yfir M2,5 að stærð. Flestir skjálftanna mældust í norðausturenda Kötluöskjunnar og í Kötlujökli. Tveir smáskjálftar mældust á Torfajökulssvæðinu.

Jarðvakt