	Veðurstofa Íslands Jarðeðlissvið

Jarðskjálftar 20210510 - 20210516, vika 19

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 600 jarðskjálftar mældust með sjálfvirka SIL-mælakerfi Veðurstofu Íslands í liðinni viku, heldur færri en í fyrri viku þegar um 800 jarðskjálftar mældust. Stærsti skjálftinn mældist 3,5 að stærð þann 12. maí kl. 15:47 í Bárðarbungu. Virkni á Suðurlandi og á Reykjanesskaga hefur minkað talsvert, sérstakleaga við gosstöðvarnar. Skjálftavirkni hefur aftur á móti aukist á norðurlandi.

Suðurland

Yfir 50 jarðskjálftar mældust á Suðurlandi í vikunni, mun færri en í fyrri viku þegar þeir voru rúmlega 150 talsins. Sá stærsti M2,3 að stærð þann 14. maí kl. 04:47 við Nesjavallaveg undir Dyrafjöllum. Nokkrir skjálftar mældust við Raufarhólshelli og einn í Heklu M0,95 að stærð.

Reykjanesskagi

Rúmlega 250 skjálftar mældust á Reykjanesskaga í liðinni viku, þar af hafa um 220 verið yfirfarnir. Í síðustu viku mældust rúmlega 600 skjálftar á sama svæði. Stærsti skjálftinn mældist 2,8 að stærð þann 16. maí kl. 05:40 við Reykjanesvirkjun. Virkni við gosstöðvarnar hafa dottið talsvert niður og mældust einungis um 70 skjálftar á svæðinu í síðustu viku. Einhver skjálftavirkni var við Grindavík og við Trölladyngju en í litlu magni. Tæplega 30 skjálftar mældust á Reykjaneshrygg. Stærsti skjálftinn var M3,2 að stærð, rúmlega 50km SV af Reykjanestá.

Norðurland

Um 130 jarðskjálftar mældust á Norðurlandi í vikunni örlítið fleiri en í fyrri viku þegar um 100 skjálftar mældust. Flestir skjálftarnir voru á Grímseyjarbeltinu en einnig var nokkur virkni á Húsavíkur-Flateyjarmisgenginu og í Eyjafjarðarál. Nokkrir skjálftar mældust sunnan Flateyjar og í Flateyjardal um 14 talsins. Stærsti skjálftinn á Norðurlandi var M1,9 að stærð, þann 15. maí kl. 07:37, innarlega í Öxarfirði. Níu skjálftar mældust við Kröflu og sex við Bæjarfjall.

Hálendið

Tæplega 130 jarðskjálftar mældust á hálendinu í liðinni viku, svipaður fjöldi og í fyrri viku. Tæplega 30 skjálftar mældust í Bárðarbunguöskjunni, sá stærsti 3,5 að stærð 12. maí. Um 10 smáskjálftar mældust austan Bárðarbungu þar sem oft mælast djúpir skjálftar sem er minni virkni en í síðustu viku. Við Grímsvötn mældust átta skjálftar, flestir á eða sunnan við Grímsfjall, stærsti M1,9 að stærð þann 10. maí rétt austan við Grímsfjall. Fjórir smáskjálftar mældust við Öræfajökul. Norðan Vatnajökuls mældust rúmlega 50 smáskjálftar, fleiri en í fyrri viku. Sá stærsti mældist M1,3 að stærð, við Herðubreið. Mesta virknin var bundin við Öskju, Herðubreið og Herðubreiðartögl. Einn smáskjálfti mældist austur af Hamrinum. Einn skjálfti mældist í Langjökli og einn vestur af Þórisjökli.

Mýrdalsjökull

Um 20 skjálftar mældust í Mýrdalsjökli í liðinni viku um 10 fleiri en í fyrri viku. Mældist sá stærsti M1,8 að stærð, þann 11. maí kl. 08:54. Flestir skjálftanna mældust í Kötluöskjunni. Fjórir skjálftar mældust í Eyjafjallajökli, sá stærsti M1,8 þann 14. maí. Einn smáskjálfti mældist á Torfajökulssvæðinu.

Jarðvakt