	Veðurstofa Íslands Jarðeðlissvið

Jarðskjálftar 20210517 - 20210523, vika 20

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 270 jarðskjálftar mældust með sjálfvirka SIL-mælakerfi Veðurstofu Íslands í síðustu viku, töluvert færri en í vikunni á undan þegar rúmlega 600 skjálftar mældust. Stærsti skjálfti á landinu í síðustu viku mældist 2,8 að stærð í Kröflu þann 20. maí. Tveir skjálftar af stærð 2,7 mældust einnig, einn í Mýrdalsjökli þann 19. maí og annar í Kleifarvatni þann 17. maí. Áfram dregur úr skjálftavirkni á Reykjanesskaga og við gosstöðvarnar í Geldingadölum, en í vikunni mældust þar tæplega eitt hundrað skjálftar m.v. um 220 í vikunni á undan og 360 í vikunni þar áður.

Suðurland

Lítil virkni var á Suðurlandsbrotabeltinu í vikunni, en þar mældust ellefu smáskjálftar. Á Hengilssvæðinu mældust átta skjálftar, sá stærsti 2,5 þann 17. maí NV við Ölkelduháls. Enginn skjálfti mældist í nágrenni Eiturhóls við Nesjavallaveg en þar hafði verið nokkur virkni vikurnar áður. Tveir smáskjálftar voru staðsettir um 4-5 km V og NV af Heklu í vikunni en enginn skjálfti í eldfjallinu sjálfu.

Reykjanesskagi

Tæplega eitt hundrað skjálftar mældust á Reykjanesskaga í liðinni viku, töluvert færri en vikurnar áður þegar á bilinu 220 til 360 skjálftar hafa mælst. Stærsti skjálfti vikunnar á svæðinu var 2,7 að stærð í Kleifarvatni að kvöldi 17. maí. Virknin á skaganum var í þremur þyrpingum, við Reykjanestá, á svæðinu milli Litla-Hrúts og Keilis og svæðið við Kleifarvatn og Trölladyngju. Stakur skjálfti að stærð 2,2 mældist við Selfjall ofan Heiðmerkur.

Stakur skjálfti af stærð 1,0 mældist um 20 km SSA af Reykjanestá og annar stakur skjálfti af stærð 3,4 mældist á Reykjaneshrygg rúma 200 km SV af Reykjanestá.

Norðurland

Um 40 jarðskjálftar mældust á Tjörnesbrotabeltinu í vikunni, nokkuð færri en í síðustu vikur þegar þar mældust tæplega 100 skjálftar. Allir skjálftarnir voru undir 2,0 að stærð og dreifðust nokkuð jafnt á milli Grímseyjarbeltisins og Húsavíkur-Flateyjarmisgengisins.

Stakur smáskjálfti mældist við Þeistareyki og tveir skjálftar mældust við Kröflu. Stærri skjálftinn við Kröflu mældist 2,8 að stærð þann 20. maí og var stærsti skjálftinn á landinu í síðustu viku.

Hálendið

Um 40 skjálftar mældust undir Vatnajökli í vikunni, sem er svipaður fjöldi og í síðustu viku þegar um 50 skjálftar mældust þar. Tólf skjálftar voru staðsettir í Bárðarbunguöskjunni, stærsti skjálftinn var 2,4 að stærð en auk hans urðu tveir skjálftar 2,0 að stærð í vikunni. Þrír smáskjálftar voru staðsettir á Dyngjusandi norðan Dyngjujökuls. Sjö skjálftar mældust í og við Grímsvötn, sá stærsti 1,8 að stærð rúma 4 km SV við Grímsfjall. Tíu smáskjálftar mældust í Öræfajökli, allir undir 1,0 að stærð. Þrír smáskjálftar voru staðsettir við Skaftárkatlana en einnig mældust þrír skjálftar í Kverkfjöllum. Stakur smáskjálfti mældist við Þórðarhyrnu.

Átján skjálftar voru staðsettir í Öskju, sá stærsti 2,2 að stærð þann 17. maí. Fjórtan smáskjálftar mældust við Herðubreið og Herðubreiðartögl, sem er svipuð virkni og síðustu vikur.

Þrír skjálftar mældust vestan við Geitlandsjökul þann 22. maí, sá stærsti 2,1 að stærð. Einn skjálfti af stærð 2,1 mældist í Þórisjökli og annar sömu stærðar sunnan við Skjaldbreið.

Mýrdalsjökull

Í vikunni mældust 25 skjálftar í Mýrdalsjökli, sá stærsti 2,7 að stærð þann 19. maí í norðanverðri Kötluöskjunni. Það er svipuð virkni og í síðustu viku þegar um 20 skjálftar mældust. Í Torfajökli voru þrír skjálftar staðsettir, sá stærsti 1,7 að stærð.

Jarðvakt