	Veðurstofa Íslands Jarðeðlissvið

Jarðskjálftar 20210531 - 20210606, vika 22

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 300 jarðskjálftar mældust í liðinni viku með SIL-mælakerfi Veðurstofu Íslands, aðeins fleiri en í fyrri viku þegar rúmlega 230 skjálftar mældust. Stærsti skjálfti vikunnar var 2,5 að stærð þann 31. maí við vestanvert Kleifarvatn. Eldgosið í Fagradalsfjalli stendur enn yfir með púlsavirkni og þann 2. júní mældist flatarmál hraunsins 2,67 km2 og flæðið 12,4 m3/s. Einn skjálfti mældist í Heklu. Tæplega 20 skjálftar mældust í Mýrdalsjökli og tæplega 10 í Bárðarbungu. Um tugur skjálftar mældust við Grímsvötn.

Suðurland

Rúmlega 30 jarðskjálftar mældust á Suðurlandi í liðinni viku, allir undir 2 að stærð. Flestir skjálftanna voru á Hengilssvæðinu, aðallega í Húsmúla og nokkrum kílómetrum vestan við Dyrafjöll. Nokkrir skjálftar mældust í Ölfusi og nokkrir á Suðurlandsbrotabeltinu. Einn skjálfti mældist í Heklu.

Reykjanesskagi

Um 90 skjálftar mældust á Reykjanesskaga í liðinni viku og var sá stærsti 2,5 að stærð við vestanvert Kleifarvatn. Hann var jafnframt stærsti skjálfti vikunnar. Um 35 skjálftar dreifðust frá Reykjanestá að Fagradalsfjalli. Eldgosið í Fagradalsfjalli stendur enn yfir með púlsavirkni og þann 2. júní mældist flatarmál hraunsins 2,67 km2 og flæðið 12,4 m3/s. Tæplega 30 skjálftar mældust í kvikuganginum undir Fagradalsfjalli, frá Nátthaga að Keili. Um tugur skjálfta mældust undir Brennisteins- og Bláfjöllum.

Tæplega tugur skjálfta mældust á Reykjaneshrygg, flestir voru mjög nálægt landi en einn var langt suður á hrygg, sá mældist 3,6 að stærð þann 6. júní kl. 20:35.

Norðurland

Á Norðurlandi mældust rúmlega 64 skjálftar, allir undir 2 að stærð. Flestir skjálftanna mældust á Grímseyjarbeltinu og Húsavíkur-Flateyjarmisgenginu en um 5 skjálftar mældust við Kröflu.

Hálendið

Rúmlega 80 skjálftar mældust á hálendinu í liðinni viku. Um 50 skjálftar mældust í Vatnajökli, allir undir 2 að stærð. Þar af voru tæplega 10 í Bárðarbungu og rúmlega 10 djúpir skjálftar austan við Bárðarbungu. Við Grímsvötn mældust tæplega 10 skjálftar og tveir á Lokahrygg. Fjórir skjálftar mældust við Kverkfjöll og fimm í Öræfajökli. Norðan Vatnajökuls mældust rúmlega 30 skjálftar, allir undir 2 að stærð. Við Öskju mældust tæplega 15 skjálftar og tæplega 20 í nágrenni Herðubreiðar og Herðubreiðartagla.

Nokkrir skjálftar mældust í Háleiksmúla austan Grjótárvatns.

Mýrdalsjökull

Tæplega 20 skjáfltar mældust í Mýrdalsjökli í vikunni, sá stærsti var 2,0 að stærð þann 2. júní í norðanverðri Kötluöskjunni. Um helmingur þeirra voru smáskjálftar sem mældust í Kötlujökli.

Jarðvakt