	Veðurstofa Íslands Jarðeðlissvið

Jarðskjálftar 20210621 - 20210627, vika 25

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 400 jarðskjálftar mældust í liðinni viku með SIL-mælakerfi Veðurstofu Íslands, sem eru nokkuð færri en í síðustu viku þegar rúmlega 500 skjálftar mældust. Stærsti skjálfti vikunnar mældist 4,0 að stærð á Kolbeinseyjarhrygg þann 24. júní kl. 15:58 en einnig mældist skjálfti 3,0 af stærð á Reykjaneshrygg þann 25. júní kl. 10:07. Að morgni 25. júní mældust um 15 skjálftar á sprungu suður af Heklu, nálægt Trippafjöllum. Stærsti skjálftinn mældist 1,7 að stærð kl. 06:56. Nokkur virkni var við Bárðarbungu þar sem um 30 skjálftar mældust, sá stærsti 2,6 að stærð en einnig á djúpa svæðinu austur af Bárðarbungu en þar mældust um 30 skjálftar. Heldur minni virkni mældist úti fyrir Norðurlandi en í fyrri viku, eða um 30 skjálftar í Öxarfirði og á Húsavíkur-Flateyjarmisgenginu. Lítil hrina hófst við Syðri-Eldborg austan við Bláfjöll þann 27. júní, sá stærsti 1,8 að stærð.

Suðurland

Rúmlega 100 jarðskjálftar mældust á Suðurlandi í liðinni viku mun fleiri en í fyrri viku þegar fjöldi skjálfta var um 30. Munar þar mestu um hrinu norður af Hveragerði og smáhrinu sunnan við Heklu. Mældust þeir allir undir 2,0 að stærð. Hrinan við Hveragerði hófst 26. júní og mældust um 60 skjálftar í henni, allir undir 2,0 að stærð. Að morgni 25. júní hófst smáhrina á þekktri jarðskjálftasprungu sunnan við Heklu, nálægt Trippafjöllum. Mældust um 15 skjálftar í hrinunni, sá stærsti mældist 1,7 að stærð kl. 06:52 og var hann jafnframt stærsti skjálfti vikunnar á Suðurlandi. Virknin dreifðist nokkuð um Suðurlandsundirlendið og nokkuð minni virkni í Henglinum en verið hefur.

Reykjanesskagi

Tæplega 100 skjálftar mældust á Reykjanesskaga í liðinni viku, töluvert fleiri en í síðustu þegar um 70 skjálftar mældust. Stærsti skjálftinn mældist 2,7 að stærð á Reykjanestá þann 25. júní kl. 11:06 í lítilli hrinu sem þar var þann daginn. Helmingi færri skjálftar mældust við gosstöðvarnar en í fyrri viku en 7 skjálftar mældust þar í vikunni, allir undir 2,0 að stærð. Einnig var nokkur virkni við Syðri-Eldborg austan við Bláfjöll í hrinu sem hófst 26. júní. Sá stærsti mældist 1,8 að stærð. Nokkur virkni var við Grindavík en alls mældust rúmlega 10 skjálftar þar og svipaður fjöldi mældist við Tjaldstæðagjá, sá stærsti mældist 2,6 að stærð.

Rúmlega 15 skjálftar mældust á Reykjaneshrygg í vikunni. Sá stærsti 3,0 að stærð þann 25. júní kl. 10:07. Honum fylgdu 5 aðrir skjálftar á sama svæði, allir yfir 2,3 að stærð.

Norðurland

Á Norðurlandi mældust rúmlega 60 skjálftar um helmingi færri en í fyrri viku þegar um 110 skjálftar mældust. Sjö skjálftar mældust í hrinu við Kolbeinseyjarhrygg, sá stærsti 4,0 að stærð þann 24. júní kl. 15:58 og var hann jafnframt stærsti skjálfti vikunnar. Þrír skjálftar mældust við Kröflu allir undir 1,5 að stærð. Þá mældist 1 skjálfti við Bæjarfjall. Um 15 skjálftar mældust í Öxarfirði, helmingi færri en í fyrri viku og mældist stærsti skjálftinn þar 1,7 að stærð þann 24. júní. Nokkur virkni var á Grímseyjarmisgenginu en um rúmlega 10 skjálftar mældust þar í vikunni, sá stærsti mældist 2,3 að stærð. Mun minni virkni var á Húsavíkur-Flateyjarmisgenginu og úti fyrir Eyjafirði en í fyrri viku en einungis tæplega 20 skjálftar mældust þar í vikunni, allir undir 1,2 að stærð.

Hálendið

Tæplega 120 skjálftar mældust á hálendinu í liðinni viku, töluvert færri en í fyrri viku þegar rúmlega 270 skjálftar mældust. Um 80 skjálftar mældust í Vatnajökli,svipaður fjöldi og í síðustu viku. Þar af voru um 30 jarðskjálftar í Bárðarbungu og mældist sá stærsti 2,6 að stærð þann 25. júní. Rúmlega 30 djúpir skjálftar mældust á djúpa svæðinu austan við Bárðarbungu, þrefalt fleiri en í fyrri viku. Mældist sá stærsti 1,6 að stærð. Við Grímsvötn mældust þrír skjálftar allir undir 1,0 að stærð. Tveir skjálftar mældust við Hamarinn, sá stærri mældist 1,5 að stærð og tveir smáskjálftar mældist á Lokahrygg. Níu smá skjálftar mældust í Öræfajökli og einn í Þórðarhyrnu. Norðan Vatnajökuls mældust tæplega 30 skjálftar, allir undir 2 að stærð. Mun færri en í fyrri viku þegar þeir rúmlega 50 skjálftar mældust. Við Öskju mældust um ellefu skjálftar, sá stærsti vika 1,8 og um 10 í nágrenni Herðubreiðar og Herðubreiðartagla.

Rúmlega 5 skjálftar mældust í og við Högnhöfða í Biskupstungum en þar hefur dregið úr jarðskjálftahrinunni sem hófst síðdegis þann 16. júní. Sá stærsti mældist 1,5 að stærð þann 21.júní Einn smáskjálfti mældist í Hagafelli sunnan Langjökuls og einn við Sandvatn.

Mýrdalsjökull

Rúmlega 10 skjáfltar mældust í Mýrdalsjökli í vikunni, svipaður fjöldi og í fyrri viku. Flestir mældust í Kötlujökli og í öskjunni en einn mældist við Krossárjökul. Allir mældust þeir undir 1,0 að stærð.

Jarðvakt