	Veðurstofa Íslands Jarðeðlissvið

Jarðskjálftar 20210705 - 20210711, vika 27

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 380 jarðskjálftar mældust í liðinni viku með SIL-mælakerfi Veðurstofu Íslands, svipað og vikuna á undan þegar um 400 skjálftar mældust. Um 170 skjálftar urðu á Reykjanesi og mældist þar jafnframt stærsti skjálfti vikunnar en hann var 2,5 að stærð og var staðsettur vestur af Þorbirni. Þá varð smá hrina norður af Bláfjöllum. Einn skjálfti mældist við Heklu þann 10.júlí og var hann 1,5 að stærð. Um sjö skjálftar mældust í Mýrdalsjökli í liðinni viku og um 40 skjálftar mældust í Vatnajökli, flestir í Bárðarbungu. Á Tjörnesbrotabeltinu mældust um 65 jarðskjálftar og þar dreifðist virknin mest um Grímseyjabeltið og í Eyjafjarðarál.

Suðurland

Um 20 jarðskjálftar mældust á Suðurlandi og á Hengilsvæðinu í liðinni viku, sem er svipað og í seinustu viku þegar um 30 skjálftar mældust. Einn skjálfti mældist við Heklu 1,5 að stærð og þrír vestur af Heklu, sá stærsti 1,5 að stærð. Tveir skjálftar mældust suðvestur af Hellisheiðahrauni, báðir undir 2 að stærð.

Reykjanesskagi

Um 170 jarðskjálftar mældust á Reykjanesskaga í vikunni, örlítið fleiri en í síðustu viku, þegar um 150 skjálftar mældust. Virknin dreifðist um Reykjanesið en um 50 skjálftar mældust norður af Bláfjöllum í hrinu dagana 8-10.júlí. Allir skjálftarnir voru undir 1,5 að stærð. Á gosstöðvunum mældust um 20 smáskjálftar, sem er svipað og í vikunni á undan. Þá mældust um 45 skjálftar í og vestur af Þorbirni og mældist stærsti skjálftinn í þeirri hrinu 2,5 að stærð sem er jafnframt stærsti skjálfti vikunnar. Þó nokkrir skjálftar mældust í kringum Kleifarvatn og við Reykjanestá.

Um 20 skjálftar mældust á Reykjaneshrygg í vikunni, sá stærsti 2,3 að stærð.

Norðurland

Á Norðurlandi mældust tæplega 65 skjálftar sem er helmingi færri en í vikunni þar áður. Mesta virknin var í Eyjafjarðarál, þar sem rúmlega 35 skjálftar mældust. Þá voru um 15 skjálftar í Öxarfirði og 10 skjálftar norður af Grímsey, stærsti skjálftinn mældist 2,1 að stærð og er hann jafnframt stærsti skjálftinn á Norðurlandi þessa vikuna. Um tíu smáskjálftar mældust á norðurhluta norðurgosbeltinsins, flestir vestur af Bæjarfjalli við Þeistareyki. Tveir skjálftar mældust norðvestur af Akureyri og einn skjálfti mældist í Hrolleifsdal, norðaustur af Hofsós.

Hálendið

Rúmlega 80 jarðskjálftar mældust á hálendinu í vikunni sem er svipað og í seinustu viku. Um 15 skjálftar mældust í Bárðarbungu öskjunni, sá stærsti 1,6 að stærð. Þá mældust um 4 skjálftar suður af Grímfjalli og 4 skjálftar í kringum vestri og eystri Skaftárkatla, stærsti skjálftinn var 2,4 að stærð. Þrír smáskjálftar urðu í Skeiðárjökli og tveir í Síðujökli. Einn skjálfti mældist í Langjökli 2,1 að stærð.

Rúmlega 40 jarðskjáftar mældust á svæðinu í kringum Herðubreið og Öskju sem er töluvert meira en í síðustu viku þegar um 10 skjálftar mældust. Stærsti skjálftinn var 1,6 að stærð og var hann norðvestur af Herðubreið.

Mýrdalsjökull

Sjö jarðskjálftar mældust í Mýrdalsjökli í vikunni, svipaður fjöldi og í fyrri viku. Stærsti skjálftinn mældist þann 7.júlí í norðanverði öskjunni og var hann 2,1 að stærð. Fjórir skjálftar mældust suður og suðvestur af Torfajökli. Þrír skjálftar mældust vestur af Landmannalaugum, sá stærsti 2,2 að stærð.

Jarðvakt