	Veðurstofa Íslands Jarðeðlissvið

Jarðskjálftar 20210712 - 20210718, vika 28

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 240 jarðskjálftar mældust í vikunni með SIL-mælakerfi Veðurstofu Íslands, talsvert færri en vikuna á undan þegar um 380 skjálftar mældust. Mesta virknin var á Norðurlandi. Engar jarðskjálftahrinur urðu. Stærsti skjálfti vikunnar var á Reykjaneshrygg, 2,9 að stærð og stærsti skjálfti á landinu var í Kötlu 2,6 að stærð.

Suðurland

Um 20 jarðskjálftar mældust á Suðurlandi og Hengilssvæðinu í vikunni og er það svipaður fjöldi og í fyrri viku. Tveir smáskjálftar mældust skammt sunnan og norðan við Heklu. Stærsti skjálftinn var á Hellisheiði 12. júlí, 2,2 að stærð.

Reykjanesskagi

Um 40 jarðskjálftar voru á Reykjanesskaganum í vikunni, mun færri en í liðinni viku þegar þeir voru um 170. Á gosstöðvunum mældust tæplega 10 smáskjálftar, mun færri en í fyrri viku þegar þeir voru um 20. Skjálftarnir voru allir staðsettir milli Litla-Hrúts og Meradala. Aðrir skjálftar dreifðust um skagann og voru allir um og innan við eitt stig.

Tæpur tugur skjálfta mældist á Reykjaneshrygg, stærsti skjálftinn var 2,9 að stærð.

Norðurland

Úti fyrir Norðurlandi mældust um 65 skjálftar, svipaður fjöldi og í síðustu viku. Um 20 skjálftar voru í Eyjafjarðaráli, tæpur tugur í Húsavíkur-Flateyjarmisgenginu, rúmlega 20 á Skjálfanda og um tugur í Öxarfirði. Rólegt var í Grímseyjarbeltinu. Stærsti skjálftinn var 2,2 að stærð, 12. júlí kl. 01:56 skammt norðaustur af Gjögurtá.

Hálendið

Um 45 skjálftar mældust undir Vatnajökli, þar af tæpur helmingur í Skeiðarárjökli. Fyrsti skjálftinn þar varð upp úr hádegi þann 16. júlí og sá síðasti um miðjan dag þann 18. júlí. Stærsti skjálftinn var 1,3 að stærð. Um tugur skjálfta varð við Bárðarbungu. Allir skjálftarnir voru undir tveimur stigum. Nokkrir litlir skjálftar urðu á Lokahrygg. Rólegt var við Grímsfjall og Öræfajökul.
Hátt í 20 smáskjálftar voru staðsettir við Herðubreið og Herðubreiðartögl og nokkrir við Öskju.
Nokkrir skjálftar mældust suður af Langjökli, allir innan við tvö stig.

Mýrdalsjökull

Heldur meiri virkni var í Mýrdalsjökli (25) þessa vikuna, miðað við tæplega 10 í síðustu viku. Flestir voru staðsettir í austanverðri Kötluöskjunni, nálægt sigkötlum 10 og 11. Stærsti skjálftinn var á þeim slóðum þann 16. júlí kl. 16:05, 2,6 að stærð og var það jafnframt stærsti skjálfti sem varð á landinu í vikunni. Tveir aðrir skjálftar, yfir tveimur stigum, urðu á sömu slóðum, sá fyrri kl. 16:43, 2,3 að stærð, og sá síðari mínútu seinna, 2,5 að stærð. Fáeinir smáskjálftar voru á Torfajökulssvæðinu.

Jarðvakt