	Veðurstofa Íslands Jarðeðlissvið

Jarðskjálftar 20210719 - 20210725, vika 29

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 370 jarðskjálftar mældust í vikunni með SIL-mælakerfi Veðurstofu Íslands, aðeins fleiri en vikuna á undan þegar um 240 skjálftar mældust. Virknin var frekar dreifð um landið. Smá hrina var í Mýrdalsjökli og mældist stærsti skjálfti vikunnar þar, 2,9 að stærð. Önnur smáhrina var á Mosfellsheiði, þar mældist stærsti skjálftinn 2,5 að stærð.

Suðurland

Tæplega 60 jarðskjálftar mældust á Suðurlandi og Hengilssvæðinu í vikunni og er það mun meira en í fyrri viku þegar 20 skjálftar mældust á þessum slóðum. Smá hrina var á Mosfellsheiði þar sem um 50 skjálftar mældust. Stærsti skjálftinn þar var 23. júlí, 2,5 að stærð. Einn smáskjálfti mældist í grennd við Heklu.

Reykjanesskagi

Um 70 jarðskjálftar voru á Reykjanesskaganum í vikunni, fleiri en í liðinni viku þegar þeir voru um 40. Á gosstöðvunum mældust tæplega 20 smáskjálftar, aðeins fleiri en í fyrri viku þegar þeir voru tæplega 10. Skjálftarnir voru allir staðsettir milli Keilis og Fagradalsfjalls. Aðrir skjálftar dreifðust um skagann og voru allir um og innan við eitt stig.

Tveir skjálftar mældust á Reykjaneshrygg, sá stærri var 2,5 að stærð.

Norðurland

Úti fyrir Norðurlandi mældust um 60 skjálftar, svipaður fjöldi og í síðustu viku. Rúmlega 20 skjálftar voru í Eyjafjarðaráli, um 20 á Grímeyjarbeltinu, tæplega 10 skjálftar mældust á Húsavíkur-Flateyjarmisgenginu. Stærsti skjálftinn var 1,9 að stærð um 20 km N af Hofsósi.
Fjórir skjálftar mældust við Kröflu.

Hálendið

Um 50 skjálftar mældust undir Vatnajökli, þar af tæpur helmingur í Skeiðarárjökli. Stærsti skjálftinn þar var 1,3 að stærð. Um tugur skjálfta varð við Bárðarbungu, allir skjálftarnir voru undir tveimur stigum. Fimm skjálftar mældust við Grímsfjall, stærsti 1,7 að stærð. Rólegt var í Öræfajökli.
Um 15 smáskjálftar voru staðsettir við Herðubreið og Herðubreiðartögl, sá stærsti 1,3 að stærð og um 12 skjálftar voru staðsettir við Öskju, sá stærsti 2,1 að stærð.
Tveir smáskjálftar mældust við Langasjó. Fjórir skjálftar mældust suður af Langjökli, allir innan við tvö stig.

Mýrdalsjökull

Rúmlega 70 skjálftar mældust í Mýrdalsjökli þessa vikuna, mun fleiri en í síðustu viku þegar um 25 skjálftar mældust þar. Allir voru staðsettir í og við Kötluöskjuna. Stærsti skjálfti vikunnar var í Kötlu öskjunni þann 23. júlí kl. 07:06, 2,9 að stærð. Sjö aðrir skjálftar, yfir tveimur stigum, urðu í öskjunni. Fáeinir smáskjálftar voru á Torfajökulssvæðinu.

Jarðvakt