	Veðurstofa Íslands Jarðeðlissvið

Jarðskjálftar 20210802 - 20210808, vika 31

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 420 jarðskjálftar mældust í vikunni með SIL-mælakerfi Veðurstofu Íslands, nokkrir færri en vikunni á undan þegar 480 skjálftar mældust. Virknin dreifðist um landið. Smáhrina varð SSA af Grímsey og í Skeiðarájökli . Stærsti sjálfti vikunnar mældist þann 5. ágúst á Reykjanestá og var 3,0 að stærð. Annar skjálfti 3,0 að stærð, mældist SSA af Grímsey, sama dag. Enginn skjálftí mældist í Heklu.

Suðurland

Tæplega 30 jarðskjálftar mældust á Suðurlandi og Hengilssvæðinu í vikunni og eru það aðeins færri en í fyrri viku þegar 40 skjálftar mældust á þessum slóðum. Virknin dreifði sér töluvert um svæðið. Stærsti skjálftinn varð þann 3. ágúst kl. 01:17, 10 km NNA af Hellu og var hann 1,2 að stærð. Ekki mældist skjálfti í Heklu.

Reykjanesskagi

Um 110 jarðskjálftar voru á Reykjanesskaganum í vikunni, aðeins færri en í liðinni viku þegar 130 mældust. Á gosstöðvunum mældust tæplega 15 skjálftar, mun færri en í fyrri viku þegar 40 skjálftar mældust. Þeir voru allir staðsettir milli Keilis og Langahryggs. Stærsti skjálftinn þar mældist 1,8 að stærð rétt SSV af Keili, þann 4. ágúst. Annars var virkni dreifð um skagann; við Krýsuvík, Þorbjörn og við Reykjanestá. Stærsti skjálftinn á Reykjanesskaganum mældist 3,0 að stærð þann 5. ágúst, kl.07:30 á Reykjanestá.

Rúmlega 10 skjálftar mældust á Reykjaneshrygg sem er töluvert færri en í síðustu viku þegar 50 skjálftar mældust í hrinu þann 1. ágúst.

Norðurland

Úti fyrir Norðurlandið mældust yfir 130 skjálftar, nokkuð fleiri en í síðustu viku, þegar 60 mældust. Um 60 skjálftar mældust á Grímeyjarbeltinu, þar af ríflega 40, um 20 km SSA af Grímsey, í smá hrinu þann 5. ágúst. Stærsti skjálfti þar mældist 3,0 að stærð, þann 5. ágúst kl. 02:12, hann var jafnframt stærsti skjálfti á Norðurlandi þessa viku. Tæplega 50 skjálftar mældust á Húsavíkur-Flateyjarmisgenginu. Nokkrir skjálftar mældust í Eyjafjarðaráli.

Rúmlega 20 smáskjálftar mældust í Öxarfirði og um 10 smáskjálftar mældust við Kröflu og Bæjarfjall, sá stærsti 1,5 að stærð.

Hálendið

Tæplega 110 skjálftar mældust á hálendinu í vikunni. Þar af mældust um 60 undir Vatnajökli, sem er um helmingi fleiri en í siðustu viku, þegar 35 skjálftar mældust. Einn smáskjálfti mældist í Bárðarbungu, einn á djúpa svæðinu SA af Bárðarbungu og nokkrir smáskjálftar mældust austur af Hamrinum. Átta skjálftar mældust við Grímsfjall, sá stærsti 2,2 að stærð, þann 4. ágúst kl. 21:42. Sá var líka stærsti skjálfti undir Vatnajökli í vikunni. Tveir smáskjálftar mældust við Skaftárkatlana. Tæplega 30 smáskjálftar mældust í Skeiðarárjökli, sem tengjast því að lítið hlaup hljóp úr jaðarlóni í Norðurdal, austan við Skeiðarárjökul.

Um 30 smáskjálftar voru staðsettir við Herðubreið, Herðubreiðartögl og Öskju.

Tveir skjálftar, sá stærri 1,6 að stærð, mældust í Hofsjökli og um 15 skjálftar mældust rétt suður af Þórisjökli, sá stærsti 2,9 að stærð, þann 2. ágúst kl. 18:08.

Mýrdalsjökull

Rúmlega 20 skjálftar mældust í Mýrdalsjökli þessa vikuna, sem er mun færri en í síðustu viku þegar 90 skjálftar mældust. Nánast allir voru staðsettir í og við Kötluöskjuna. Stærsti skjálftinn varð þann 2. ágúst og mældist 2,4 að stærð. Tveir smáskjálftar mældust á Torfajökulsvæðinu.

Jarðvakt