	Veðurstofa Íslands Jarðeðlissvið

Jarðskjálftar 20210913 - 20210919, vika 37

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 400 jarðskjálftar mældust í liðinni viku með SIL-mælakerfi Veðurstofu Íslands, aðeins færri en í fyrri viku þegar um 450 skjálftar mældust. Stærsti skjálfti vikunnar var 2,5 að stærð þann 17. september í norðanverðum Herðubreiðartöglum. Þó mældust stærri skjálftar norður á Kolbeinseyjarhrygg. Rúmlega 50 jarðskjálftar mældust í Öskju og landris þar mælist nú um 10 cm. Við Grímsvötn mældust fimm skjálftar og tveir skjálftar mældust í Heklu.

Suðurland

Tæplega 40 jarðskjálftar mældust á Suðurlandi í liðinni viku, sá stærsti var 2,4 að stærð á Hellisheiði. Flestir skjálftanna dreifðust yfir Hengilssvæðið, Hellisheiði og Þrengslin. Allnokkrir skjálftar mældust í Ölfusi og á Suðurlandsbrotabeltinu. Tveir skjálftar mældust í Heklu.

Reykjanesskagi

Rúmlega 100 skjálftar mældust á Reykjanesskaga í liðinni viku og var sá stærsti 2,2 rétt suðvestan við Keili. Um 45 skjálftar mældust í nágrenni Reykjanestáar, flestir í þyrpingu norðaustan við hana. Um 25 skjálftar mældust á milli gosstöðvanna í Fagradalsfjalli og Keilis. Tæplega tveir tugir skjálfta mældust í nágrenni Krýsuvíkur og Kleifarvatns. Eldgosið í Fagradalsfjalli stendur enn yfir, með hléum.

Tæpur tugur skjálfta mældust á Reykjaneshrygg, tveir þeirra voru 2,0 að stærð.

Norðurland

Á Norðurlandi mældust tæplega 50 skjálftar, sá stærsti var 2,2 að stærð á Kolbeinseyjarhrygg. Um 20 skjálftar mældust á Grímseyjarbeltinu og svipaður fjöldi á Húsavíkur-Flateyjarmisgenginu en 6 skjálftar mældust við Kröflu. Nokkrir stærri skjálftar mældust langt norður á Kolbeinseyjarhrygg.

Hálendið

Rúmlega 190 skjálftar mældust á hálendinu í liðinni viku, flestir norðan Vatnajökuls. Í Öskju mældust rúmlega 50 skjálftar, sá stærsti var 2,1 að stærð. Enn mælist landris í Öskju og mælist nú rúmlega 10 cm. Rúmlega 120 skjálftar mældust við Herðubreið og í Herðubreiðartöglum. Stærsti skjálftinn þar var 2,5 að stærð í norðanverðum Herðubreiðartöglum og var jafnframt stærsti skjálfti vikunnar. Um 15 skjálftar mældust í Vatnajökli, allir undir 2 að stærð. Fjórir skjálftar mældust í Bárðarbungu og tveir í ganginum undir Dyngjujökli. Við Grímsvötn mældust um fimm skjálftar. Einn skjálfti mældist í Kverkfjöllum, einn á Lokahrygg og einn í Öræfajökli.

Sex skjálftar mældust á Torfajökulssvæðinu. Einn skjálfti mældist í norðaustanverðum Langjökli og einn skjálfti í Háleiksmúla á Vesturlandi.

Mýrdalsjökull

Aðeins 7 skjálftar mældust í Mýrdalsjökli í vikunni, sá stærsti var 1,9 að stærð þann 13. september í ofanverðum Tungnakvíslarjökli. Aðeins einn skjálfti mældist innan Kötluöskjunnar, hinir mældust í og við Tungnakvíslarjökul. Þann 15. september mældist 12 cm. færsla á GPS stöð, sem er staðsett á skriðunni við Tungnakvíslarjökul, á svipuðum tíma og jarðskjálfti mældist á svæðinu.

Jarðvakt