	Veðurstofa Íslands Jarðeðlissvið

Jarðskjálftar 20211004 - 20211010, vika 40

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 5600 jarðskjálftar mældust í liðinni viku með SIL-mælakerfi Veðurstofu Íslands. Það er aðeins færri en í síðustu viku þegar um 6100 skjálftar mældust. Jarðskjálftahrina sem hófst SSV af Keili þann 27. september stendur enn og tilheyra langflestir skjálftar vikunnar þeirri hrinu líkt og í vikunni á undan. Stærsti skjálfti vikunnar mældist 3,6 að stærð og varð þann 5. október SSV af Keili. Alls mældust sjö skjálftar 3,0 eða stærri á því svæði í síðustu viku. Tilkynningar bárust víða af SV-landi og Reykjanesskaga um að fólk hafi orðið vart við þá skjálfta. Stærstu skjálftar á landinu, utan hrinunnar SSV af Keili, voru skjálfti 3,0 að stærð við Öskju þann 9. október og skjálfti 2,7 að stærð vestan við Langavatn á Mýrum. Skjálftinn við Öskju er sá stærsti á svæðinu síðan nóvember 2019. Skjálftavirkni á svæðinu vestan við Langavatn hefur mælst af og til síðan júní á þessu ári, skjálftinn þar í síðustu viku er sá næststærsti sem mælst hefur þar á árinu.

Búið er að fara handvirkt yfir rúmlega 700 skjálfta af 5600 og því er rétt að taka fram að eftir á að fara yfir marga þeirra og eru því ekki teknir fram í þessu vikuyfirliti en gætu komið inn síðar. Óyfirfarnir skjálftar eru smærri skjálftar í hrinunni SSV við Keili, en allir skjálftar á öðrum svæðum hafa verið yfirfarnir.

Suðurland

Tíu jarðskjálftar mældust á Suðurlandsbrotabeltinu í liðinni viku, sá stærsti 1,6 að stærð. Fjórir smáskjálftar mældust á Hengilssvæðinu en það er sami fjöldi og síðustu viku. Enginn skjálfti mældist í Heklu.

Reykjanesskagi

Rúmlega 5400 jarðskjálftar mældust á Reykjanesskaga í síðustu viku, aðeins færri en í síðustu viku þegar þeir voru um 6000. Langflestir skjálftarnir tilheyra hrinu SSV af Keili sem hófst þann 27. september og stendur enn. Stærsti skjálfti vikunnar á því svæði mældist 3,6 að stærð og varð þann 5. október SSV af Keili. Alls mældust sjö skjálftar 3,0 eða stærri á því svæði í síðustu viku, en alls hafa mælst 18 skjálftar yfir þremur að stærð frá því að hrinan hófst. Tilkynningar bárust víða af SV-landi og Reykjanesskaga um að fólk hafi orðið vart við þá skjálfta. Á Reykjanesskaganum mældust einnig skjálftar við Reykjanestá, Kleifarvatn og Bláfjöll en mun færri en á svæðinu við Keili. Ekki hefur gefist tími til þss að fara handvirkt yfir alla þá skjálfta sem mældir hafa verið á svæðinu, en óyfirfarnir skjálftar eru smærri skjálftar. Tveir skjálftar að stærð 1,7 og 2,2 mældust úti á Reykjaneshrygg í síðustu viku.

Norðurland

Á Tjörnesbrotabeltinu mældust rúmlega 20 jarðskjálftar, aðeins færri en í síðustu viku þegar þeir voru um 30. Stærsti skjálftinn í síðustu viku mældist 1,7 að stærð úti fyrir Gjögurtá. Sex smáskjálftar mældust á Kröflusvæðinu og einn við Þeistareyki.

Hálendið

Undir Vatnajökli mældust 18 jarðskjálftar í síðustu viku sem er svipaður fjöldi og síðustu viku. Þar af voru þrír skjálftar í Grímsvötnum, einn skammt norðan við Skaftárkatlana og annar við Esjufjöll. Í Bárðarbunguöskjunni mældust fjórir skjálftar og skammt austan við hana voru átta djúpir skjálftar.

Í Öskju mældust tuttugu skjálftar í síðustu viku, töluvert færri en í vikunni þar á undan þegar þar mældust um eitt hundrað skjálftar en þá stóð yfir hrina dagana 29. og 30. september í SA-hluta Öskju. Stærsti skjálfti vikunnar í Öskju var 3,0 að stærð þann 9. október en hann var staðsettur í NV-hluta kerfisins.

Rúmlega 30 skjálftar mældust á svæðinu í kringum Herðubreið og Herðubreiðartögl sem er svipuð virkni og í síðustu viku.

Þann 7. október var skjálfti 2,7 stærð vestan við Langavatn á Mýrum. Skjálftavirknin á svæðinu hefur mælst af og til síðan júní á þessu ári, skjálftinn þar í síðustu viku er sá næststærsti sem mælst hefur þar á árinu.

Mýrdalsjökull

Tveir skjálftar mældust í Mýrdalsjökli í síðustu viku, báðir 1,7 að stærð, en það er aðeins minni virkni en í síðustu viku þegar rúmlega tíu skjálftar mældust þar. Þrír skjálftar mældust á Torfajökulsöskjunni, sá stærsti 2,3 að stærð þann 10. október.

Jarðvakt