	Veðurstofa Íslands Jarðeðlissvið

Jarðskjálftar 20211018 - 20211024, vika 42

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 600 jarðskjálftar voru staðsettir í vikunni með SIL-jarðskjálftamælakerfi Veðurstofu Íslands. Mesta virknin var milli Keilis og Litla-Hrúts þar sem um 300 skjálftar mældust og þar var einnig stærsti skjálfti á landinu, 2,6 að stærð. Tveir skjálftar voru yfir þremur stigum að stærð, báðir úti á Reykjaneshrygg.

Suðurland

Rólegt var á Hengilssvæðinu en þar mældist um tugur skjálfta, allir um og innan við eitt stig. Um 20 smáskjálftar voru á Suðurlandsundirlendi.

Reykjanesskagi

Hátt í 400 skjálftar mældust á Reykjanesskaganum í vikunni, flestir á svæðinu milli Keilis og Litla-Hrúts, þar sem jarðskjálftahrina hefur verið í gangi frá því í lok september. Mikið hefur dregið úr hrinunni. Þessa viku mældust rúmlega 300 skjálftar, á þessu svæði, miðað við 1100 (sjálfvirkar mælingar) í fyrri viku, þar sem um 600 skjálftar hafa verið handvirkt yfirfarnir. Skjálftarnir eru enn á sama dýpi og áður, um 5km. Stærsti skjálftinn við Keili í þessari viku, var 2,6 að stærð þann 19. október kl. 16:57. Þetta var einnig stærsti skjálfti á landinu. Um 30 litlir skjálftar mældust við Reykjanestá og nokkrir við Kleifarvatn.

Þrír skjálftar mældust á Reykjaneshrygg, tveir þeirra yfir þremur stigum.

Norðurland

Rúmlega 20 jarðskjálftar mældust úti fyrir Norðurlandi, heldur færri en í fyrri viku þegar þeir voru 35. Skjálftarnir dreifðust nokkuð um svæðið. Stærsti skjálftinn var um 10 kílómetra norðaustur af Grímsey, 2,3 að stærð.

Hálendið

Álíka margir skjálftar mældust undir Vatnajökli í þessari viku (16) og þeirri síðustu þegar þeir voru 13. Helmingurinn var við Bárðarbungu og þar var einnig stærsti skjálfinn, 1,9 að stærð. Einn smáskjálfti mældist á djúpa svæðinu suðaustan við Bárðarbungu og tveir á Lokahrygg Tveir smáskjálftar voru einnig við Grímsfjall og í Kverkfjöllum og stakur skjálfti í Kvíárjökli.

Um 40 skjálftar mældust við Öskju, litlu fleiri en í fyrri viku. Flestir voru við austanvert Öskjuvatn. Stærsti skjálftinn var 1,6 að stærð, aðrir um eða undir einu stigi.

Talsvert minni virkni var við Herðubreið og Herðubreiðartögl (20) miðað við fyrri viku þegar þeir voru um 50. Allir skjálftarnir voru um og innan við eitt stig. Tveir smáskjálftar voru norðan við Kollóttudyngju.

Stakur skjálfti var skammt austur af Jarlhettum, 20. október kl. 18:50, 2,0 að stærð.

Mýrdalsjökull

Á annan tug skjálfta mældist í Mýrdalsjökli, flestir innan Kötluöskjunnar. Tveir stærstu skjálftarnir voru 1,7 að stærð, sá fyrri 18. október kl. 06:15 og sá síðari 22. október kl. 08:46. Annar var innan öskjunnar en hinn við Goðabungu.
Um 30 jarðskjálftar voru staðsettir á Torfajökulssvæðinu, nokkru fleiri en í fyrri viku þegar þeir voru þrír. Stærsti skjálftinn var 1,5 við Hrafntinnusker, flestir aðrir undir einu stigi.

Jarðvakt