	Veðurstofa Íslands Jarðeðlissvið

Jarðskjálftar 20211025 - 20211031, vika 43

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 680 jarðskjálftar mældust í liðinni viku með SIL-mælakerfi Veðurstofu Íslands, aðeins fleiri en í fyrri viku þegar um 600 skjálftar mældust. Alls mældust fimm skjálftar yfir 3 að stærð, stærsti skjálftinn var 3,9 að stærð kl. 22:06 þann 28. október rétt norðaustan við Grímsey. Fyrr sama kvöld, kl. 18:37 varð jarðskjálfti af stærðinni 3,6 um 3 km. vestan við Kleifarvatn. Hann fannst á höfuðborgarsvæðinu og síðar um kvöldið fylgdi honum einn skjálfti af stærðinni 3,0. Þann 27. október kl. 01:28 varð skjálfti af stærðinni 3,3 rétt norðan við Hveragerði sem fannst þar. Einnig mældist einn skjálfti á Reykjaneshrygg þann 29. október sem var af stærðinni 3,0.

Um 30 jarðskjálftar mældust í og við Öskju, um tugur skjálfta mældist í Bárðarbungu og rúmur tugur í Grímsvötnum.

Suðurland

Um 25 jarðskjálftar mældust á Suðurlandi í liðinni viku, sá stærsti var 3,3 að stærð þann 27. október kl. 01:28 rétt norðan við Hveragerði. Hann fannst þar. Aðrir skjálftar dreifðust um Suðurlandsbrotabeltið. Einn skjálfti mældist í Innri-Vatnafjöllum sunnan Heklu.

Reykjanesskagi

Um 370 skjálftar mældust á Reykjanesskaga í liðinni viku og var sá stærsti 3,6 að stærð kl. 18:37 þann 28. október um 3 km. vestan við Kleifarvatn. Tæplega 100 skjálftar mældust á sama svæði í kjölfarið, flestir voru undir 2 að stærð en einn af þeim var 3,0 að stærð kl. 23:11 síðar sama kvöld. Hrinan suðvestur af Keili stendur enn yfir en um 180 skjálftar mældust á því svæði og undir Fagradalsfjalli. Flestir skjálftanna voru undir einum að stærð en stærsti skjálftinn var 2,7 að stærð þann 31. október. Norðan Grindavíkur mældust tæplega 40 smáskjálftar. Nokkrir smáskjálftar mældust í nágrenni Bláfjalla.

Tæplega 30 skjálftar mældust á Reykjaneshrygg, sá stærsti var 3,0 að stærð kl. 17:54 þann 29. október.

Norðurland

Á Norðurlandi mældust tæplega 60 skjálftar, sá stærsti var 3,9 að stærð rétt norðaustur af Grímsey. Hann mældist kl. 22:06 þann 28. október og var jafnframt stærsti skjálfti vikunnar. Rúmlega 20 skjálftar mældust á Grímseyjarbeltinu og svipaður fjöldi á Húsavíkur-Flateyjarmisgenginu en þrír skjálftar mældust við Kröflu og fimm við Þeistareyki. Einn skjálfti mældist norður á Kolbeinseyjarhrygg. Hann var 3,1 að stærð.

Hálendið

Rúmlega 120 skjálftar mældust á hálendinu í liðinni viku, flestir norðan Vatnajökuls þar sem rúmlega 90 skjálftar mældust. Í Öskju mældust rúmlega 30 skjálftar, sá stærsti var 1,7 að stærð. Verulega hefur dregið úr landrisi í Öskju. Rúmlega 50 skjálftar mældust við Herðubreið og í Herðubreiðartöglum. Stærsti skjálftinn þar var 2,3 að stærð í vestanverðri Herðubreið. Nokkrir skjálftar mældust á Vikursandi. Tæplega 30 skjálftar mældust í Vatnajökli, allir undir 2 að stærð. Tæpur tugur skjálfta mældist í Bárðarbungu. Við Grímsvötn mældust rúmlega tíu skjálftar.

Einn skjálfti mældist í Þórisjökli.

Mýrdalsjökull

Aðeins 7 skjálftar mældust í Mýrdalsjökli í vikunni, allir af stærðinni 1,0 eða minni. Um 55 jarðskjálftar voru staðsettir á Torfajökulssvæðinu í liðinni viku en þar hafa lágtíðnipúlsar mælst síðustu tvær vikur. Þessi púlsavirkni kemur í hviðum með fleiri og lengri púlsum inn á milli. Erfitt er að staðsetja þessa púlsa og osrök þeirra eru óljós sem stendur.

Jarðvakt