	Veðurstofa Íslands Jarðeðlissvið

Jarðskjálftar 20211115 - 20211121, vika 46

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 980 jarðskjálftar mældust í liðinni viku með SIL-mælakerfi Veðurstofu Íslands, talsvert fleiri en í fyrri viku þegar um 720 skjálftar mældust. Alls mældust sjö skjálftar yfir 3 að stærð, stærsti skjálftinn var 3,9 að stærð kl. 13:21 þann 18. nóvember í Vatnafjöllum sunnan við Heklu. Þann 18. nóvember mældist skjálfti af stærðinni 3,3 í Þrengslunum en þar var hrina þann 18.nóvember. Önnur hrina varð við Tjaldstæðagjá, norðvestur af Einiberjahól þann 21. nóvember en stærsti skjálftinn í þeirri hrinu var 3,5 að stærð.

Suðurland

Rúmlega 200 skjálftar mældust á Suðurlandi í liðinni viku. Flestir þeirra voru hluti af jarðskjálftahrinu sem hófst þann 11. nóvember í Vatnafjöllum sunnan við Heklu. Stærsti skjálftinn var 3,9 að stærð og var hann jafnfram stærsti skjálfti vikunnar en mældist kl 13:21 þann 18.nóvember. Þrír aðrir skjálftar mældust yfir 3 að stærð á þessu svæði. Sjö skjálftar mældust í grend við Heklu og einn á Heklu sjálfri en hann mældist 0.5 að stærð þann 15.nóvember. Aðrir skjálftar dreifuðust um Suðurlandsbrotabeltið.

Reykjanesskagi

Tæplega 600 skjálftar mældust á Reykjanesskaga í liðinni viku. Stærsti skjálftinn var 3,5 að stærð en hann var hluti af hrinu sem stóð yfir í Tjaldstæðagjá norðvestur af Einiberjahól þann 20.nóvember. Rúmlega 300 skjálftar mældust í þeirri hrinu. Um 30 skjálftar mældust í grend við Grindavík og var stærsti skjálftinn 2,9 að stærð þann 17.nóvember. Rúmlega 45 skjálftar mældust á gossvæðinu og var stærsti skjálftin suðvestur af Keili þann 19. nóvember og var hann 2,5 að stærð. Hrina varð í Þrengslunum en þar mældust rúmlega 200 skjálftar, stærstu skjálftarnir mældust þann 18. nóvember og voru þeir báðir 3,3 að stærð. Aðrir skjálftar dreifðust um skagann.

Á Reykjaneshrygg mældist tæplega tugur skjálfta, sá stærsti var 2,7 að stærð.

Norðurland

Tæplega 75 jarðskjálftar mældust á Norðurlandi í vikunni. Um 20 skjálftar mældust á Grímseyjarbeltinu og um 50 á Húsvíkur-Flateyjar misgenginu. Tveir skjálftar mældust á Kolbeineyjarhryggnum en þar var jafnframt stærsti skjálfti norðurlandsins en hann var 2,7 að stærð og var hann þann 15.nóvember klukkan 10:49. Þá mældist einn skjálfti í Skagafirði þann 21.nóvember.

Hálendið

Rúmlega 75 skjálftar mældust á hálendinu í liðinni viku. Undir Vatnajökli mældust tæplega 30 skjálftar. Í Bárðarbungu mældust um 5 skjálftar, sá stærsti var 1,5 að stærð. Nokkrir skjálftar mældust við Skaftárkatlana og fjórir við Grímsfjall en þar var stærsti skjálftinn í Vatnajökli en hann var 1,7 að stærð. Einn djúpur skjálftar mældust austan við Bárðarbungu, einn í Öræfajökli og annar norður af Geirvörtum.

Norðan Vatnajökuls mældust rúmlega 50 skjálftar. Um 20 þeirra voru við Öskju og var sá stærsti 2,4 að stærð, austur af Öskjuvatni. Við Herðubreið og Herðubreiðartögl mældust tæplega 30 skjálftar.

Einn skjálfti mældist í Langjökli og einn á Tindaskaga, suður af Skjaldbreið. Þá mældist einn skjálfti suðaustur af Grjótárvatni og annar noraustur af Bifröst, báðir voru um 2 að stærð.

Mýrdalsjökull

Tæpir átta skjálftar mældust í Mýrdalsjökli í liðinni viku. Stærsti skjálftinn mældist í Tungnakvíslarjökli en hann var 2 að stærð og mældist hann þann 16. nóvember kl. 05:23. Sex smáskjálftar mældust á Torfajökulssvæðinu.

Jarðvakt