	Veðurstofa Íslands Jarðeðlissvið

Jarðskjálftar 20211129 - 20211205, vika 48

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 400 jarðskjálftar mældust í síðustu viku með SIL-mælakerfi Veðurstofu Íslands, aðeins færri en í vikunni þar áður þegar tæplega 450 jarðskjálftar mældust. Stærstu skjálftar vikunnar urðu á Reykjaneshrygg, þann 29. nóvember um 80 km SV af Reykjanestá og í Mýrdalsjökli, þann 30. nóvember, báðir 2,9 að stærð. Á Reykjaneshrygg var nokkur virkni en þar mældust tæplega 30 skjálftar, þar af ellefu yfir 2 að stærð. Í Grímsvötnum var nokkur ísskjálftavirkni í tengslum við jökulhlaup þaðan sem náði hámarki að morgni sunnudagsins 5. desember. Íshellan yfir Grímsvötnum seig um 78 m í tengslum við það jökulhlaup. Nokkur smáskjálftavirkni var á Reykjanesskaga, á svæðinu frá Reykjanestá að Kleifarvatni, í vikunni en þar mældust rúmlega 150 skjálftar.

Reykjanesskagi og Reykjaneshryggur

Rúmlega 150 skjálftar mældust á Reykjanesskaga í síðustu viku, svipað og í vikunni þar á undan þegar um 140 skjálftar mældust. Virknin var mest á svæðinu frá Reykjanestá að Kleifarvatni, en nokkrir smá skjálftar mældust austar á skaganum. Stærsti skjálfti vikunnar á svæðinu var 2,1 að stærð skammt NA við Sýrfell nærri Reykjanestá. Rúmlega 70 smáskjálftar mældust við Fagradalsfjall.

Um 30 skjálftar mældust á Reykjaneshrygg, sá stærsti 2,9 að stærð sem jafnframt einn af stærstu skjálftum á landinu í síðustu viku. Virknin var aðallega á tveimur svæðum, um 30 og 80 km SV af Reykjanestá.

Suðurlandsbrotabeltið

Rúmlega 50 jarðskjálftar mældust á Suðurlandsbrotabeltinu í síðustu viku, nokkuð færri en vikuna þar á undan þegar þeir voru tæplega 100. Áfram mælast flestir skjálftar í Vatnafjöllum, en þeir eru hluti af eftirskjálftahrinu frá því að jarðskjálfti af stærð 5,2 mældist þar þann 11. nóvember. Um helmingur skjálftanna á Suðurlandi var staðsettur í Vatnafjöllum.

Vesturgosbeltið

Tólf skjálftar voru staðsettir á Hengilssvæðinu, sá stærsti 2,1 að stærð skammt norðan við Nesjavallavirkjun. Flestir skjálftanna urðu þó á svæðinu í kringum Ölkelduháls.

Þrír skjálftar mældust í og skammt austan við Langjökul, sá stærsti 1,8 að stærð, og þrír skjálftar við Þórisjökul sem voru á stærðarbilinu 1,8 til 2,6.

Austurgosbeltið

Í Grímsvötnum mældust 24 jarðskjálftar í síðustu viku, flestir í austurhelmingi svæðisins. Líklegast er að flestir skjálftanna séu ísskjálftar í tengslum við jökulhlaup úr Grímsvötnum sem náði hámarki snemma að morgni 5. desember. Stærsti skjálftinn sem mældist þar var 2,0 að stærð. Íshellan yfir Grímsvötnum seig um 78 m á meðan jökulhlaupinu stóð. Að morgni 6. desember varð nokkur jarðskjálftavirkni í Grímsvötnum þar sem stærsti skjálftinn mældist 3,6 að stærð. Gert er ráð fyrir því að sú virkni tengist eldstöðinni en ekki íshreyfingum. Nánar verður fjallað um þessa virkni í næsta vikuyfirliti.

Fimmtán skjálftar mældust í og við Bárðarbunguöskjuna, sá stærsti 2,1 að stærð. Það er svipuð virkni og síðustu viku en þá mældust þar átta skjálftar.

Fimm skjálftar mældust austan við Hamarinn, í nágrenni Skaftárkatlanna. Stærsti skjálftinn þar var 2,1 að stærð skammt norðan við Eystri-Skaftárketilinn.

Einn smáskjálfti af stærð 0,5 mældist í Heklu. Þann 30. nóvember.

Ellefu jarðskjálftar mældust í Mýrdalsjökli, sá stærsti 2,9 að stærð þann 30. nóvember sem jafnframt var einn af stærstu skjálftum á landinu í síðustu viku. Skjálftarnir dreifðust víða um jökulinn.

Fjórir smáskjálftar voru staðsettir víðsvegar á Torfajökulssvæðinu. Nokkur virkni af lágtíðnipúlsum virtist vera þar á svæðinu þann 3. desember enn reyndist ómögulegt að staðsetja nákvæmlega. Svipuð virkni varð þar í lok október og byrjun nóvember.

Öræfajökulsbeltið

Þrír smáskjálftar mældust í Öræfajökli, allir undir einum að stærð, og fjórir skjálftar nærri Esjufjöllum þar sem stærsti skjálftinn mældist 1,3 að stærð.

Norðurgosbeltið

Fimmtán smáskjálftar mældust í og við Öskju, sem er svipuð virkni og í síðustu viku þegar þeir voru 20. Um 20 skjálftar voru staðsettir við Herðubreið og Herðubreiðartögl, nokkuð færri en í síðustu viku þegar þeir voru um 40.

Átta smáskjálftar, sá stærsti 1,3 að stærð. voru staðsettir norður af Ketildyngju, innan sprungusveims Fremri-Náma, þann 2. desember.

Átta skjálftar mældust á Kröflusvæðinu, sá stærsti 1,6 að stærð. Í kringum Þeistareyki var svipuð virkni, en þar mældust sjö skjálftar sá stærsti 1,5 að stærð.

Tjörnesbrotabeltið

Á Tjörnesbrotabeltinu voru 22 jarðskjálftar staðsettir í síðustu viku, sá stærsti 1,5 að stærð skammt norður af Flatey á Skjálfanda. Skjálftavirknin dreifðist nokkuð jafnt á milli Húsavíkur-Flateyjarmisgengisins og Grímseyjarbeltisins.

Jarðvakt