	Veðurstofa Íslands Jarðeðlissvið

Jarðskjálftar 20211206 - 20211212, vika 49

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 380 jarðskjálftar mældust með SIL-mælakerfi Veðurstofu Íslands í vikunni og er það svipaður fjöldi og í síðustu viku. Mesta virknin var á Reykjanesskaga. Fjórir smáskjálftar mældust við Heklu. Um 40 skjálftar mældust á svæðinu við Grímsvötn þar sem Grímsvatnahlaup hafði náð hámarki og var í rénun. Stærsti skjálfti vikunnar var við Grímsfjall M3,6.

Suðurland

Nokkrir smáskjálftar mældust á Hengilssvæðinu. Rúmlega 20 jarðskjálftar voru í Suðurlandsbrotabeltinu. Þar af um tugur við Vatnafjöll og fjórir við Heklu, allir um og innan við eitt stig.

Reykjanesskagi

Tæplega 170 jarðskjálftar mældust á Reykjanesskaga, þar af um helmingur við Sýlingafell og svæðið þar í kring. Laust fyrir klukkan 11, þann 8. desember, varð jarðskjálfti af stærð 3,1 um 3km norðaustur af Grindavík. Tvær tilkynningar bárust um að hann hefði fundist þar. Sama dag, um miðjan dag, hófst smáskjálftahrina við Sýlingafell (skammt norðaustur af Þorbirni) sem stóð fram eftir kvöldi. Á fimmta tug skjálfta mældist á þessum stað. Tæplega 30 skjálftar mældust vestar á skaganum, skammt norður af Sýrfelli, allir litlir. Sami fjöldi var á svæðinu við Fagradalsfjall og hátt í 20 í nágrenni Krýsuvíkur, allir innan við tvö stig.
Fáeinir skjálftar mældust skammt norður af Eldey á Reykjaneshrygg, allir um og innan við tvö stig.

Norðurland

Ríflega 30 skjálftar mældust úti fyrir Norðurlandi, flestir úti fyrir Eyjafirði þar sem stærsti skjálftinn var 2,6. Fáeinir smáskjálftar voru á svæðunum við Þeistareyki og Kröflu.

Hálendið

Um 70 skjálftar voru í Vatnajökli. Flestir (um 40) voru á svæðinu við Grímsvötn þar sem Grímsvatnahlaup hafði náð hámarki og var nú í rénun. Stærsti skjálftinn við Grímsfjall var 3,6 að stærð að morgni 6. desember (hlaupið náði hámarki daginn áður) og annar um svipað leyti sem var 2,3 að stærð. Skjálftarnir minnkuðu eftir því sem leið á vikuna. Um 20 skjálftar voru við Bárðarbungu, stærsti rúm tvö stig. Nokkrir skjálftar mældust á Lokahrygg í nágrenni Skaftárkatla, stærstu um tvö stig.

Um 30 skjálftar mældust við Herðubreið og Herðubreiðartögl, stærsti um tvö stig. Fáeinir smáskjálftar mældust við Öskju.

Við Langjökul mældist um tugur skjálfta, flestir skammt norðaustur af Jarlhettum, þar sem stærsti skjálftinn varð undir miðnætti þann 6. desember, 2,7 að stærð.

Mýrdalsjökull

Nokkrir skjálftar voru í Mýrdalsjökli, allir innan eða við brún Kötluöskjunnar. Stærsti skjálftinn var 2,1 að stærð, þann 9. desember kl. 18:23. Rólegt var á Torfajökulssvæðinu.

Jarðvakt