	Veðurstofa Íslands Jarðeðlissvið

Jarðskjálftar 20220103 - 20220109, vika 01

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 900 jarðskjálftar mældust með sjálfvirku jarðskjálftamælakerfi Veðurstofu Íslands í vikunni, mun færri en vikuna á undan þegar þeir voru um 4700. Af þessum 900 skjálftum hafa um 660 skjálftar verið yfirfarnir handvirkt, óyfirfarnir skjálftar eru smáskjálftar á Reykjanesskaga. Áfram dró úr jarðskjálftahrinunni sem hófst á Reykjanesskaga þann 21. desember síðastliðinn og má segja að henni hafi lokið í þessarri viku. Um 660 skjálftar mældust þó á Reykjanesskaga, flestir í byrjun vikunnar og dró verulega úr virkninni eftir 5. janúar. Virknin dreifðist mest á fjögur svæði, NA af Reykjanestá, N við Grindavík, við Fagradalsfjall og í Móhálsadal milli Trölladyngju og Kleifarvatns. Stærsti skjálftinn á þeim svæðum var 2,5 að stærð í Móhálsadal. Stærsti skjálfti á landinu í vikunni varð að morgni 9. janúar og var 2,8 að stærð staðsettur rúma 10 km vestur af Ok. Sjö smáskjálftar mældust við SV-enda Heklu þann 3. janúar.

Reykjanesskagi og Reykjaneshryggur

Um 660 skjálftar mældust þó á Reykjanesskaga, flestir í byrjun vikunnar og dró verulega úr virkninni eftir 5. janúar. Virknin dreifðist mest á fjögur svæði, NA af Reykjanestá, N við Grindavík, við Fagradalsfjall og í Móhálsadal milli Trölladyngju og Kleifarvatns. Stærsti skjálftinn á þeim svæðum var 2,5 að stærð í Móhálsadal. Segja má því að þeirri jarðskjálftahrinu sem hófst á þessu svæði þann 21. desember hafi lokið seinnipart þessarrar viku. Óvissustigi sem Almannavarnir lýstu yfir í upphafi hrinunnar var aflýst þann 8. janúar.

Á Reykjaneshrygg mældust ellefu skjálftar sem er svipað og í síðustu viku þegar þeir voru þrettán., Flestir voru smáskjálftar nærri Reykjanestá en þrír skjálftar voru staðsettir um 40 km SV við Reykjanestá.

Vesturgosbeltið

Einn skjálfti af stærð 2,5 mældist í sunnanverðum Langjökli þann 6. janúar, en hann var jafnframt næst stærsti skjálftinn á landinu í vikunni. Tveir skjálftar voru staðsettir í Þórisjökli, sá stærri 2,1 að stærð.

Vesturland

Um 30 skjálftar mældust SV við Ok, en þar mældist stærsti skjálfti vikunnar þann 9. janúar og var 2,8 að stærð. Í vikunni á undan voru tíu jarðskjálftar staðsettir á þessu svæði en virkni hefur verið viðvarandi þar síðan um miðjan desember.

Suðurlandsbrotabeltið

Um 30 jarðskjálftar mældust á Suðurlandsbrotabeltinu í vikunni, nokkuð færri en í vikunni þar áður þegar þeir voru rúmlega 80. Smáskjálftavirkni var nokkur í norðurhluta Ingólfsfjalls en þar mældust þrettán skjálftar, en í vikunni á undan mældist skjálfti af stærð 3,0 þar.

Rúmlega 30 jarðskjálftar mældust á Hengilsvæðinu, þar af voru 24 skjálftar sem mældust við Hrómundartind þann 9. janúar, sá stærsti 1,6 að stærð.

Austurgosbeltið

Einn skjálfti mældist í Bárðarbunguöskjunni og tveir undir miðjum Dyngjujökli og þrír við austurjaðar jökulsins. Stakur skjálfti var staðsettur skammt austan við Pálsfjall í SV-verðum Vatnajökli og tveir skjálftar í norðurenda Skeiðarárjökuls. Engin skjálfti mældist í Grímsvötnum í síðustu viku.

Áfram mælist skjálftavirkni í Vatnafjöllum en þar voru fimm sma¿kjálftar staðsettir. Sjö smáskjálftar mældust við SV-enda Heklu þann 3. janúar.

Níu skjálftar mældust í Mýrdalsjökli, sá stærsti 2,0 að stærð þann 9. janúar. Tveir skjálftar voru staðsettir í sunnanverðri Torfajökulsöskjunni einn í norðurhluta hennar.

Norðurgosbeltið

Við Kröflu mældist stakur smáskjálfti en engir skjálftar mældust við Þeistareyki.

Í Öskju mældust 10 skjálftar, sá stærsti 1,6 að stærð, en það er svipuð virkni og í vikunni þar undan. Um tuttugu skjálftar voru staðsettir við Herðubreið og Herðubreiðartögl, sá stærsti 1,2 að stærð.

Tjörnesbrotabeltið

Tæplega 50 skjálftar mældust á Tjörnesbrotabeltinu í vikunni, flestir á Grímseyjarbeltinu, en í síðustu viku mældust þar tæplega 30 skjálftar. Stærstu skjálftarnir þar voru um og yfir tveir að stærð, en fimm slíkir mældust á svæðinu.

Jarðvakt