	Veðurstofa Íslands Jarðeðlissvið

Jarðskjálftar 20220124 - 20220130, vika 04

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 730 jarðskjálftar mældust með jarðskjálftamælakerfi Veðurstofu Íslands í vikunni. Það er nokkuð fleiri en síðustu vikur þegar fjöldi skjálfta hefur verið á milli 500 og 600. Stærstu skjálftar vikunnar mældust 3,5 og 3,3 að stærð um 10 km S við Grímsey þann 29. janúar. Skjálfti af stærð 3,3 varð einnig í Þóreyjartungum þann 25. janúar en þó nokkur virkni er þar enn sem hófst í lok desember 2021. Hátt í 300 jarðskjálftar mældust á Reykjanesskaga í síðustu viku, stærsti skjálftinn þar var 2,7 að stærð við Kleifarvatn.

Nánar er hægt að skoða skjálftavirkni á landinu í Skjálfta-Lísu

Suðurlandsbrotabeltið

Rúmlega 60 jarðskjálftar mældust á Suðurlandsbrotabeltinu, töluvert fleiri en í síðustu viku þegar þeir voru 15. Stærsti skjálftinn þar mældist 2,5 að stærð þann 27. janúar um 7 km NA við Selfoss. Tilkynningar bárust um að skjálftinn hefði fundist þar. Tuttugu smáskjálftar voru staðsettir í Þrengslunum, vestast á brotabeltinu. Áfram mælast stöku smáskjálftar í Vatnafjöllum.

Reykjanesskagi og Reykjaneshryggur

Hátt í 300 jarðskjálftar mældust á Reykjanesskaga og skammt utan við Reykjanestá. Stærsti skjálftinn á svæðinu mældist 2,7 að stærð við Kleifarvatn þann 29. janúar. Rúmlega eitt hundrað skjálftar mældust við Fagradalsfjall, meirihluti þeirra undir 1,0 að stærð en stærsti skjálftinn mældist 2,3 að stærð. Um 90 skjálftar mældust á svæðinu norðan við Grindavík, allir undir tveimur að stærð. Annars dreifðist virknin á skaganum að mestu frá Reykjanesi að Kleifarvatni en nokkrir smáskjálftar mældust í Brennisteins- og Bláfjöllum.

Vesturgosbeltið

Rúmlega tuttugu skjálftar mældust á Hengilssvæðinu í þessarri viku, nokkuð fleiri en í síðustu viku þegar þeir voru sex. Flestir skjálftarnir voru staðsettir skammt vestan við Ölkelduháls en stærsti skjálftinn á svæðinu var staðsettur í Hverahlíð og var 2,2 að stærð.

Tveir smáskjálftar mældust í grennd við Skjaldbreið og tveir í vestanverðum Langjökli.

Vesturland

Jarðskjálftahrina sem hófst seinnipart desember 2021 vestan við Ok í Borgarfirði hélt áfram og mældust um 170 skjálftar þar í síðustu viku, sem er nánast sami fjöldi og í vikunni þar áður. Stærsti skjálftinn á þessu svæði í vikunni var 3,3 að stærð þann 25. janúar og bárust Veðurstofunni tilkynningar um að skjálftinn hefði fundist í nærliggjandi sveitum.

Austurgosbeltið

Fimm jarðskjálftar mældust í norðanverðri Bárðarbunguöskjunni, sá stærsti 2,3 að stærð. Tveir djúpir smáskjálftar voru einnig staðsettir austan við öskjuna.

Fimm smáskjálftar urðu í og rétt sunnan við Grímsvötn, en einnig varð stakur smáskjálfti nærri Gjálp norðan Grímsvatna. Það er svipaður fjöldi skjálfta og í vikunni á undan. Stakur smáskjálfti var líka staðsettur nærri Þórðarhyrnu í sunnanverðum Vatnajökli.

Sex skjálftar, þar af tveir yfir einum að stærð, voru staðsettir á víð og dreif í Torfajökulsöskjunni. Sjö skjálftar voru staðsettir í Kötluöskjunni í Mýrdalsjökli, en þrír þeirra voru rétt yfir einum að stærð. Fjórir skjálftar voru staðsettir í Heklu, sá stærsti 1,0 að stærð.

Norðurgosbeltið

Fimmtán jarðskjálftar voru staðsettir í Öskju, flestir þeirra í austanverðri öskjubrúninni. Stærstu skjálftarnir þar voru 2,4 og 2,2 að stærð. Rúmlega tuttugu skjálftar voru staðsettir við Herðubreið og Herðubreiðartögl og stærsti skjálftinn þar var 2,3 að stærð.

Sex smáskjálftar mældust á Kröflusvæðinu og tveir í nágrenni Þeistareykja.

Tjörnesbrotabeltið

Nokkur virkni var á Tjörnesbrotabeltinu í vikunni, en þar mældust rúmlega nítíu skjálftar og þar á meðal stærsti skjálfti vikunnar sem var 3,5 að stærð staðsettur sunnan við Grímsey. Virknin var mest í tveimur þyrpingum annars vegar NA við Grímsey og hinsvegar S við eynna. Í þyrpingunni sunnan við Grímsey mældist einnig næst stærsti skjálfti vikunnar sem var 3,3 að stærð. Virkni í þeirri þyrpingu var dagana 29. til 30. janúar. Önnur virkni á brotabeltinu dreifðist á austurhluta Grímseyjarbeltisins, Húsavíkur-Flateyjarmisgengið og Eyjafjarðardjúp.

Jarðvakt