	Veðurstofa Íslands Jarðeðlissvið

Jarðskjálftar 20220207 - 20220213, vika 06

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 870 jarðskjálftar mældust með SIL-jarðskjálftamælikerfi Veðurstofunnar í liðinni viku, heildur fleiri en í vikunni á undan þegar um 790 skjálftar voru staðsettir. Stærsti jarðskjálfti vikunnar mældist 3,2 að stærð á Hellisheiði, kl. 23:50 þann 13. febrúar, úti á Reykjaneshrygg mældist annar skjálfti af sömu stærð um 200km suðvestur af landi. Hrinan vestan við Ok hélt áfram í liðinni viku og mældust þar tæplega 120 skjálftar, sá stærsti af stærð 2,9 þann 7. febrúar kl. 08:52. Um þrír tugir jarðskjálfta mældust norðaustan við Grímsey á Grímseyjarbeltinu í skammvinnri hrinu þann 7. febrúar og mældist stærsti skjálftinn þar 2,5 að stærð.

Suðurland

Tæplega 60 jarðskjálftar mældust á Suðurlandi í liðinni viku. 5 skjálftar mældust á Hengilssvæðinu, rúmur tugur skjálfta í Þrengslunum og 4 skjálftar á Hellisheiði, þar mældist stærsti skjálfti vikunnar af stærð 3,2 kl. 23:50 þann 13. febrúar. 7 skjálftar mældust í Brennisteinsfjöllum, en aðrir skjálftar dreifðust eftir Suðurlandsbrotabeltinu. Enginn skjálfti mældist við Heklu.

Reykjanesskagi

Rúmlega 310 jarðskjálftar mældust á Reykjanesskaga í vikunni. Sá stærsti var 2,5 að stærð rétt við Núpshlíðarháls, þann 14. febrúar kl. 06:04. Virknin dreifðist um skagann, oft í litlum þyrpingum smáskjálfta. Ein þeirra var rétt austan við Sandfell en um 35 jarðskjálftar voru staðsettir þar 9 til 10. febrúar, sá stærsti mældist 2,2 að stærð. Um 20 skjálftar mældust úti fyrir landi, um helmingur þeirra skammt vestur af Reykjanestá, einn skjálfti af stærð 3,2 mældist um 200 km frá landi.

Norðurland

Um 200 jarðskjálftar mældust á og úti fyrir Norðurlandi í vikunni. Allflestir þeirra, um 160 talsins í smáskjálftahrinu sunnarlega í Öxarfirði 12. og 13. febrúar, en stærsti skjálftin í þeirri hrinu mældist 1,5 að stærð. Um 30 jarðskjálftar voru staðsettir norðaustan við Grímsey á Grímseyjarbeltinu í skammvinnri hrinu þann 7. febrúar og mældist stærsti skjálftinn þar 2,3 að stærð. Á Húsavíkur-Flateyjar misgenginu mældust um tveir tugir skjálfta. Við Kröflu mældust 5 skjálftar og við Þeystareyki mældist einn.

Hálendið

Hrinan vestan við Ok hélt áfram í liðinni viku og mældust þar tæplega 120 skjálftar, sá stærsti af stærð 2,9 þann 7. febrúar kl. 08:52. Tveir skjálftar mældust í norðanverðum Hofsjökli, sá stærri 2,0 að stærð. Á norður hálendinu við Öskju og Herðubreið mældust 84 jarðskjálftar, þar af mældust 2 skjálftar yfir 2,0 að stærð þann 9. febrúar. Sá fyrri kl. 04:36 af stærð 2,2 suðvestan við Herðubreið, sá seinni kl. 06:27 af stærð 2,3 í Öskju.

Í Vatnajökli mældust um 3 tugir skjálfta, rúmur tugur í Bárðarbungu sá stærsti 2,4 að stærð þann 13 febrúar kl. 01:44. Tveir smáskjálftar af stærð 1,3 mældust í Grímsvötnum. 2 skjálftar mældust við Eystri Skaftárketilinn, stærri mældist 2,0 að stærð. Við Vestari Skaftárketillinn mældist 1 skjálfti af stærð 1,3. Við Hamarinn mældust 2 skjálftar sá stærri 1,8 að stærð. Í Öræfajökli mældust 3 jarðskjálftar stærsti 1,3 að stærð.

Mýrdalsjökull

Fjórir skjálftar mældust í Mýrdalsjökli í vikunni í miðri Kötluöskjunni. Stærsti af stærð 1,1. Einn smáskjálfti mældist á Torfajökulssvæðinu einnig 1,1 að stærð. Nánar er hægt að skoða skjálftavirkni á landinu í Skjálfta-Lísu

Náttúruvársérfræðingur á vakt