	Veðurstofa Íslands Jarðeðlissvið

Jarðskjálftar 20220228 - 20220306, vika 09

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 430 jarðskjálftar mældust með SIL-jarðskjálftamælakerfi Veðurstofunnar í liðinni viku, um 130 fleiri en vikuna á undan. Stærsti skjálftinn mældist 3,2 að stærð þann 05. mars kl. 06:51 við Kolbeinsey, tveir aðrir skjálftar yfir þremur að stærð mældust einnig þar. Stærsti skjálfti á landi var 3,0 að stærð við Herðubreið, þann 3. mars. Um helmingur skjálftanna í vikunni mældust á Reykjanesskaga. Enginn skjálfti mældist í Heklu.

Suðurland

Á Hengilssvæðinu mældust átta skjálftar og fimm norður af Ingólfsfjalli. Á Suðurlandsbrotabeltinu mældust um 20 skjálftar á víð og dreif, þar af fjórir í Vatnafjöllum. Stærsti skjálftinn var 2,3 að stærð, þann 6. mars kl. 08:35 austur af Raufarhóli. Enginn skjálfti mældist í Heklu í vikunni.

Reykjanesskagi

Rúmlega 230 skjálftar mældust á Reykjanesskaga, sem eru mun fleiri en í liðinni viku, þegar 150 skjálftar mældust. Stærsti skjálftinn mældist 2,9 að stærð, þann 28. febrúar kl. 10:57, við Kleifarvatn. Mesta virknin var við Þorbjörn, norður af Grindavík. Annars var virknin dreifð við Borgarfjall, norðvestur af Eldvarpahrauni og við Krýsuvík. Þrír smáskjálftar mældust á Reykjaneshrygg, flestir nálægt Reykjanestá, sá stærsti 1,9 að stærð.

Norðurland

Rúmlega 60 skjálftar mældust á Norðurlandi í vikunni, þar af um 20 austur af Grímsey, sá stærsti 2,6 að stærð við Grímsey. Tæplega 15 skjálftar mældust við Hrísey, sá stærsti 2,1 að stærð og 13 skjálftar mældust í mynni Eyjafjarðar, sá stærsti 1,8 að stærð. Átta smáskjálftar mældust í Öxarfirði. Einn smáskjálfti mældist við Kröflu og þrír við Bæjarfjall.

Hálendið

Tæplega 70 jarðskjálftar mældust á hálendinu, sá stærsti 3,0 að stærð, þann 3. mars kl. 14:53 í hrinu við Herðubreið. Í Vatnajökli mældust um 30 skjálftar, þar af tveir í Bárðarbunguöskjunni og var stærsti skjálftinn 2,7 að stærð, þann 4. mars kl. 02:00. Tveir smáskjálftar mældust á djúpa svæðinu. Átta smáskjálftar mældust í Grímsvötnum, sá stærsti 1,2 að stærð. Þrír skjálftar mældust í Öræfajökli, sá stærsti 2,2 að stærð, kl. 16:20. Nokkrir smáskjálftar mældust milli Hamarsins og Skaftárkatlanna. Fjórir smáskjálftar mældust við Kverkfjöll. Norðan við Vatnajökul mældust tæplega 30 skjálftar, þar af einn við Öskju og annars við Herðubreið og Herðubreiðartögl. Stærsti skjálftinn var 3,0 að stærð, þann 3. mars kl. 14:53 norður af Herðubreið í smá hrinu. Undir Geitlandsjökli mældust fjórir skjálftar, sá stærsti 2,2 að stærð. Rólegt var vestur af Ok, þar sem þrír smáskjálftar mældust.

Mýrdalsjökull

Tíu jarðskjálftar mældust í Mýrdalsjökli, nokkrir innan Kötluöskjunnar, sá stærsti 1,5 að stærð. Flestir skjálftar mældust norður af Vík. Enginn skjálfti mældist í Eyjafjallajökli og einn smáskjálfti mældist við Landmannalaugar.

Jarðvakt