	Veðurstofa Íslands Jarðeðlissvið

Jarðskjálftar 20220307 - 20220313, vika 10

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 300 jarðskjálftar mældust með SIL-jarðskjálftamælakerfi Veðurstofunnar í síðustu viku, nokkuð færri en í vikunni þar áður þegar þeir voru tæplega 430. Stærsti skjálftinn mældist 2,6 að stærð um 10 km NNA við Grímsey þann 7. mars. Næst stærsti skjálfti vikunnar var staðsettur í Mýrdalsjökli og mældist 2,4 að stærð þann 10. mars. Dálítil virkni var nærri Grímsey en þar mældust tæplega 50 skjálftar í vikunni þar af fjórir yfir 2,0 að stærð. Áfram er nokkur virkni á Reykjanesskaga, en á svæðinu frá Reykjanestá að Kleifarvatni mældust rúmlega 100 skjálftar þar sem þrír stærstu skjálftarnir voru 1,8 að stærð.

Nánar er hægt að skoða skjálftavirkni á landinu í Skjálfta-Lísu

Suðurland

Á Hengilsssvæðinu mældust níu skjálftar í þessarri viku sem er svipuð virkni og í vikunni þar áður. Skjálftarnir voru dreifðir um svæðið en stærsti skjálftinn var staðsettur skammt vestan við Ölkelduháls en sá mældist 1,6 að stærð. Á Suðurlandsbrotabeltinu mældust 34 skjálftar, aðeins fleiri en í síðustu viku þegar þeir voru um 20. Meirihluti skjálftanna voru staðsettir í Ölfusi um 5 km S við Hveragerði en þar mældist þyrping smáskjálfta þann 13. mars. Aðrir skjálftar dreifðust víðsvegar um brotabeltið. Enginn jarðskjálfti mældist í Heklu.

Reykjanesskagi

Rúmlega 100 skjálftar mældust á Reykjanesskaga í síðustu viku, nokkuð færri en vikunni á undan þegar rúmlega 230 skjálftar mældust þar en svipaður fjöldi og í vikunni þar áður. Þrír stærstu skjálftarnir á svæðinu voru um 1,8 að stærð, en tveir þeirra voru staðsettir nærri Kleifarvatni og sá þriðji við Keili. Virknin einskorðaðist nánast bara við svæðið frá Reykjanestá að Kleifarvatni en utan þess mældust þrír smáskjálftar í nágrenni Bláfjalla.

Þrír skjálftar mældust útá Reykjaneshrygg um 8 km SV af Reykjanestá, um það bil miðja vegu milli Eldeyjar og lands. Þeir urðu allir þann 12. mars og voru á stærðarbilinu 1,4 - 1,8.

Norðurland

Rúmlega 90 skjálftar mældust á Tjörnesbrotabeltinu í vikunni, nokkuð fleiri en í vikunni áður þegar þar mældust um 60 skjálftar. Flestir þeirra voru í tveimur þyrpingum nærri Grímsey en þar mældust tæplega 50 skjálftar, þar af stærsti skjálfti vikunnar sem mældist 2,6 að stærð um 10 km NNA við Grímsey þann 7. mars og fjórir aðrir skjálftar af stærð 2,0 eða stærri. Þess utan dreifðist virknin nokkuð jafnt á milli Grímseyjarbeltisins og Húsavíkur-Flateyjarmisgengisins. Tveir skjálftar mældust í Eyjafjarðardjúpi og fimm skjálftar nærri Hrísey í Eyjafirði.

Á Kröflusvæðinu mældust þrír skjálftar þar sem sá stærsti var 1,8 að stærð. Engin skjálfti mældist nærri Þeistareykjum.

Hálendið

Fjórir smáskjálftar mældust í og við Öskju en í vikunni á undan varð þar einungis einn skjálfti. Í nágrenni við Herðubreið voru tólf skjálftar staðsettir og tveir smáskjálftar við Herðubreiðarfjöll norðan Herðubreiðar.

Engin skjálfti varð í Bárðarbungu en einn smáskjálfti mældist í Dyngjujökli og annar í Holuhrauni. Átta skjálftar urðu austan við Hamarinn og mældist stærsti skjálftinn 1,4 að stærð. Fjórir skjálftar, allir nærri 1,0 að stærð, mældust í Grímsvötnum dagana 12. og 13. mars. Stakur skjálfti af stærð 1,2 mældist þann 12. mars í Kverkfjöllum. Auk þess mældust þrír skjálftar í vikunni rúma 7 km VSV við Grímsvötn. Tíu smáskjálftar mældust í ofanverðum Skeiðarárjökli, flestir þann 11. mars. Tveir smáskjálftar mældust einnig vestur af Vatnajökli, um miðja vegu milli Þórisvatns og Tungnárjökuls.

Mýrdalsjökull

Sex skjálftar mældust í Mýrdalsjökli, þar af næst stærsti skjálfti vikunnar sem mældist 2,4 að stærð og varð þann 10. mars. Sá skjálfti var staðsettur í norðvestanverðri Kötluöskjunni. Einn smáskjálfti mældist í Eyjafjallajökli og annar í Reykjadölum vestan Torfajökuls.

Jarðvakt