	Veðurstofa Íslands Jarðeðlissvið

Jarðskjálftar 20220314 - 20220320, vika 11

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 400 jarðskjálftar mældust með SIL-jarðskjálftamælakerfi Veðurstofunnar í síðustu viku, sem þriðjungi fleiri en í síðustu viku en á pari við þar síðustu viku. Síðustu fimm vikur hefur vikuleg virkni verið á bilinu 300-560 skjálftar. Stærsti skjálftinn mældist 3,0 að stærð tæpa 2 km SV við Djúpavatn á Reykjanesskaga þann 17. mars. Töluverð hrinuvirkni var í vikunni í NV-verðum Þorbirni frá hádegi 18. mars og fram á morgun 19. mars. Um 150 skjálftar mældust í þeirri hrinu, flestir mjög litir að stærð en þó 5 skjálftar um 2 að stærð. Einnig var nokkuð grunn skjálftavirkni rétt austur af Selfossi í vikunni og varð skjálfta af stærð 1,7 vart í bænum að kvöldi 19. mars kl 23:02. Af annarri markverðri virkni má telja um 15 skjálfta í austanverðum Skeiðarárjökli og einn skjálfta, 1,6 að stærð, í Örnólfsdal inn af Þverárhlíð í Borgarfirði og annar, 1,4 að stærð, í austanverðum Langjökli um 4 km vestur af Hvítárvatni. Önnur virkni var fremur hefðbundin.

Suðurland

Á Hengilsssvæðinu mældust tveir skjálftar í þessarri viku. Á Suðurlandsbrotabeltinu mældust 22 skjálftar, aðeins færri en í síðustu viku þegar þeir voru ríflega 30 talsind. Meirihluti skjálftanna voru staðsettir rétt tæpa 2 km austur af Selfossi þar mældist þyrping smáskjálfta 19. og 20. mars. Aðrir skjálftar dreifðust víðsvegar um brotabeltið. Enginn jarðskjálfti mældist í Heklu.

Reykjanesskagi

Um þrír fjórðu af heildarvirkni síðustu viku eða um 270 skjálftar mældust á Reykjanesskaga og rétt úti á Reykjaneshrygg. Stærstur hluti virkninnar var í hrinu frá hádegi 18. mars og fram á morgun 19. mars við Þorbjörn eða ríflega 150 skjálftar. Flestir skjálftanna voru smá skjálftar undir 1,0 að stærð en um 5 skjálftar mældust um 2 að stærð. Stærsti skjálfti vikunnar var af stærð 3,0 um 2km SV af Djúpavatni. Um 12 skjálftar mældust nærri Fagradalsfjalli og gosstöðvunum, ríflega 30 skjálftar mældust nærri Krísuvík og við Vigdísarvelli. Önnur virkni var nokkuð dreifð um skagann. Fimm skjálftar mældust útá Reykjaneshrygg innan við 15 km frá Reykjanestá.

Norðurland

Á Tjörnesbrotabeltinu mældust rétt rúmlega 50 skjálftar. Ber þar helst að nefna 13 skjálfta austur af Grímsey, 15 skjálfta í Öxarfirði, 4 skjálfta í þyrpingu um 7 km SA af Flatey í Skjálfanda og 10 skjálfta í mynni Eyjafjarðar. Önnur virkni var nokkuð dreyfð.

Tveir skjálftar mældust við Bæjarfjall, fimm við Kröflu og einn í Námaskarði.

Hálendið

Á Vatnajökli mældust ríflega 20 skjálftar, þar af voru flestir í austan verðum Skeiðarárjökli eða 15 talsins. Einn skjálfti mældist við Grímsvötn, einn við vestari Skaftárketil, einn í Hamrinum, einn vestur af Hábungu og einn austur af Bárðarbungu.

Við Öskju mældust 9 skjálftar, flestir við austanverðan bakka Öskjuvatns. Nærri Herðubreið og Herðubreiðartöglum mældust 11 skjálftar.

Á Vesturlandi var einn skjálfti staðsettur, 1,6 að stærð, í Örnólfsdal inn af Þverárhlíð í Borgarfirði og annar, 1,4 að stærð, í austanverðum Langjökli um 4 km vestur af Hvítárvatni.

Mýrdalsjökull og Torfajökull

Níu skjálftar mældust í og við Mýrdalsjökul, þar af fimm í Kötluöskju. Allir skjálftarnir voru um 1 að stærð. Sá skjálfti var staðsettur í norðvestanverðri Kötluöskjunni. Á Torfajökulssvæðinu mældust 3 skjálftar og var sá stærsti 1,8 að stærð.

Nánar er hægt að skoða skjálftavirkni á landinu í Skjálfta-Lísu

Jarðvakt