	Veðurstofa Íslands Jarðeðlissvið

Jarðskjálftar 20220404 - 20220410, vika 14

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Suðurland

Rúmlega 50 jarðskjálftar mældust á Suðurlandi í vikunni og var virknin frekar dreifð um svæðið. Á Hengilsvæðinu mældust sextán smáskjálftar og 24 á suðurlandsbrotabeltinu. Í Vatnafjöllum mældust tólf skjálftar, sá stærsti var 2,1 að stærð þann 7. apríl kl. 13:41 rétt suður af fremri Vatnafjöllum.

Reykjanesskagi

Um 280 jarðskjálftar mældust á Reykjanesskaga í liðinni viku, færri en vikuna á undan þegar þeir voru um 250 talsins. Virknin dreifðist að venju um hefbundin svæði, tuttugu skjálftar í grennd við Sýrfell, 60 við Þorbjörn, 100 í suður- og norðurhluta Fagradalsfjalls í bergganginum og um 100 skjálftar við Núphlíðarháls og Kleifarvatn. Stærsti skjálftinn á skaganum mældist 2,5 að stærð þann 6. apríl kl. 13:40 um 3,5 km austur af Kleifarvatni. Sautján jarðskjálftar mældust um 5 km SV af Reykjanestá þann 10. apríl þar sem stærsti skjálftinn mældist 2,6 að stærð. Fjórir skjálftar mældust svo töluvert lengra út á Reykjaneshrygg og voru þeir allir undir 3,0 að stærð.

Norðurland

Rúmlega 120 jarðskjálftar mældust á Norðurlandi í vikunni, svipaður fjöldi og vikuna á undan. Á Grímseyjarbeltinu mældust um 85 jarðskjálftar, þar af 60 skjálftar sem voru staðsettir um 8 km NA af Grímsey og voru allir undir 2,0 að stærð. Við Húsavík mældust þrír smáskjálftar og á utanverðum Skjálfanda mældust fjórtán smáskjálftar. Vestast á Húsavíkur-Flateyjarmisgenginu og í Eyjafjarðarálnum mældust tólf skjálftar og sá stærsti var 2,3 að stærð. Um tuttugu jarðskjálftar mældust norður af landi á Kolbeinseyjarhrygg, flestir í hrinu þann 6. apríl þar sem að stærsti skjálftinn mældist 3,3 að stærð kl. 15:13. Við Þeistareyki mældust fimm smáskjálftar, stakur skjálfti af stærð 1,2 mældist á Reykjaheiði og tveir við Kröflu.

Hálendið

Í Herðubreið og Herðubreiðartöglum mældust níu skjálftar undir einum að stærð. Átta skjálftar mældust við Öskju og tólf á Vikursandi. Stakur smáskjálfti mældist í Trölladyngju. Um 10 km NV af Eiríksjökli mældist skjálfti af stærð 1,6 þann 6. apríl og um 10 km NA af Langjökli mældist stakur skjálfti þann 10. apríl og var það upphaf af jarðskjálftahrinu sem er nú enn í gangi.

Um 40 jarðskjálftar mældust undir Vatnajökli í liðinni viku, fleiri en vikuna á undan þegar þeir vorum um 30 talsins. Í Bárðarbungu mældust fimm skjálftar undir tvemur að stærð, sex smáskjálftar mældust á djúpa svæðinu í bergganginum og stakur skjálfti undir Dyngjujökli og í Kverkfjöllum. Í Grímsvötnum mældust þrettán jarðskjálftar, stærsti 1,5 að stærð þann 9. apríl kl. 4:39. Tveir skjálftar mældust við Vestari Skaftárketilinn og tveir við Hamarinn, sá stærri 1,8 að stærð. Fjórir smáskjálftar mældust í Öræfajökli og tveir í Skaftafellsjökli.

Mýrdalsjökull

Sex smáskjálftar mældist í Kötluöskjunni í vikunni, þrír á Torfajökulssvæðinu og þrír við Herðubreiðarháls.

Jarðvakt