	Veðurstofa Íslands Jarðeðlissvið

Jarðskjálftar 20220606 - 20220612, vika 23

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 1200 jarðskjálftar mældust með SIL sjálfvirku jarðskjálftamælikerfi Veðurstofu Íslands í vikunni. Þetta eru mun færri enn í siðustu viku, þegar 2600 skjálftar mældust. Af þeim hafa rúmlega 800 skjálftar verið yfirfarnir. Stærsti skjálfti vikunnar var 3,0 að stærð, þann 8. júní, rétt vestur af Borgarfjalli. Skjálfti 2,9 að stærð mældist við Svartsengi sama dag. Langmesta virkni vikunnar var á Reykjanesskaga, sér í lagi við Þorbjörn. Viðvarandi skjálftavirkni hefur verið á Reykjanesskaga síðastliðinn mánuð sem tengist landrisi við Svartsengi en nýjustu GPS mælingar og gervihnattamyndir sýna að landris hefur nú stöðvast í bili. Skjálftavirknin hefur þó haldið áfram. Ekki mældust skjálftar við Heklu í vikunni.

Suðurland

Á Suðurlandi mældust um 35 skjálftar, á víð á dreif um Suðurlandið. Stærsti skjálftinn mældist 1,9 að stærð, kl. 15:11 þann 11. júní í Vatnafjöllum.

Reykjanesskagi

Tæplega 900 jarðskjálftar mældust á Reykjanesskaga í vikunni, þar af hafa um 600 jarðskjálftar verið handvirkt yfirfarnir þegar þetta er ritað. All flestir skjálftarnir mældust við Svartsengi og Þorbjörn. Nýjustu Gps mælingar sýna að landris hafi stöðvast á þessu svæði en jarðskjálftavirknin heldur áfram.

Um 40 skjálftar hafa mælst umhverfis Kleifarvatn, sá stærsti 2,8 að stærð rétt norður af Hrútafelli. Tæplega 20 skjálftar mældust í sjó út fyrir Reykjanestá, á Reykjaneshrygg. Sá stærsti mældist 2,7 að stærð þann 10. júní, kl. 00:59.

Norðurland

Tæplega 70 skjálftar mældust úti fyrir Norðurlandi í vikunni, mun færri enn í siðustu viku, þegar 280 skjálftar mældust. Stærsti skjálftinn var um 2,2 að stærð, um 20 km ASA af Grímsey og er hann jafnframt stærsti skjálfti vikunnar á Norðurlandi. Mesta virknin var á Grímseyjarbeltinu og í Axarfirði. Fáir jarðskjálftar voru á Húsavíkur-Flateyjarmisgenginu, sá stærsti 1,7 að stærð.

Einn smáskjálfti mældist við Kröflu og átta við Bæjarfjall.

Hálendið

Tæplega 130 jarðskjálftar hafa verið staðsettir á hálendinu í vikunni. Þar af voru um 50 sem mældust í Vatnajökli. Sjö jarðskjálftar mældust í Bárðarbungu, flestir innan öskjunnar, sá stærsti 2,6 að stærð, þann 6. júní. Þetta var lika stærsti skjálftinn á hálendinu í vikunni. Um 20 smáskjálftar mældust á djúpa svæðinu í Vatnajökli. Við Grímsfjall mældust níu skjálftar, sá stærsti 1,4 að stærð, þann 11. júní og fjórir smáskjálftar mældust í kringum Skaftárkatlana. Einn smáskjálfti mældist í Kverkfjöllum og tíu smáskjálftar mældust í Skeiðarárjökli. Tveir skjálftar mældust í Þórisjökli og Geitlandsjökli þann 11. og 7.júní, 1,9 og 2,4 að stærð. Einn litill skjálfti mældist í Hofsjökli og tveir skjálftar vestan við Ok, sá stærsti 1,5 að stærð.

Um 15 smáskjálftar mældust við Herðubreið og Herðubreiðartögl og 50 við Öskju, flestir í austanverðum öskjubarminum, sá stærsti 2,6 að stærð, þann 11. júní kl. 15:40.

Mýrdalsjökull

Í Mýrdalsjökli mældust fimm smáskjálftar, flestir utan öskjunnar. Tveir smáskjálftar mældust í Eyjafjallajökli og þrír á Torfajökulssvæðinu, sá stærsti 1,7 að stærð, þann 12. júní.

Nánar er hægt að skoða skjálftavirkni á landinu í Skjálfta-Lísu

Jarðvakt