	Veðurstofa Íslands Jarðeðlissvið

Jarðskjálftar 20220620 - 20220626, vika 25

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 810 jarðskjálftar mældust með SIL-kerfi Veðurstofu Íslands í liðinni viku. Af þeim hafa um 430 skjálftar verið yfirfarnir. Stærsti skjálfti vikunnar var 4,6 að stærð kl. 22:12 þann 23. júní í Langjökli. Hann fannst víða á suðvesturhorni landsins. Stuttu síðar, kl. 22:29, mældist skjálfti á sama stað af stærðinni 3,7. Þann 26. júní mældist skjálfti af stærðinni 3,0 á svipuðum slóðum. Þann 20. júní kl. 21:24 varð skjálfti af stærðinni 3,3 á Reykjaneshrygg.

Suðurland

Rúmlega 40 jarðskjálftar mældust á Suðurlandi í liðinni viku. Af þeim hafa um 20 verið yfirfarnir, allir undir 2 að stærð. Skjálftarnir dreifðust um Hengilssvæðið og Suðurlandsundirlendið. Tveir skjálftar mældust í Vatnafjöllum.

Reykjanesskagi

Um 350 skjálftar mældust á Reykjanesskaga í liðinni viku og búið er að yfirfara um 190 af þeim. Stærsti skjálftinn var 2,5 að stærð þann 21. júní við Vesturháls vestan Kleifarvatns. Nokkur virkni var norðan við Grindavík, einnig í nágrenni Reykjanestáar og Kleifarvatns.

Um 30 skjálftar mældust á Reykjaneshrygg í vikunni, sá stærsti var 3,3 að stærð kl. 21:24 þann 20. júní. Hann var hluti af um 20 skjálfta hrinu sem var þetta kvöld um 14 km frá landi.

Norðurland

Tæplega 70 skjálftar mældust á Tjörnesbrotabeltinu í síðustu viku en búið er að yfirfara rúmlega 40 þeirra. Flestir skjálftanna mældust rétt suðaustan við Grímsey. Þar var stærsti skjálftinn 2,5 að stærð þann 25. júní.

Við Kröflu mældust tveir skjálftar og fjórir við Þeistareyki.

Vesturland

Rúmlega 150 jarðskjálftar mældust á Vesturlandi í vikunni sem leið, af þeim hafa rúmlega 90 verið yfirfarnir. Stærsti skjálftinn var 4,6 að stærð þann 23. júní kl. 22:12 í vestanverðum Langjökli. Hann fannst víða á suður- og vesturhluta landsins; vestur í dali og austur á Hellu. Stuttu seinna, kl. 22:29, varð skjálfti á sömu slóðum af stærðinni 3,7. Hann fannst í Borgarfirði. Um 70 skjálftar mældust þar fyrsta sólarhringinn hrinunnar. Þann 26. júní varð svo skjálfti á sama stað af stærðinni 3,0. Nokkrir skjálftar hafa mælst í Þórisjökli og austan við Langjökul.

Hálendið

Í Vatnajökli mældust tæplega 20 skjálftar. Tveir skjálftar mældust í Bárðarbungu en tæplega tugur djúpra skjálfta austan við hana. Einn skjálfti mældist í Grímsvötnum, tveir á Lokahrygg og einn í Öræfajökli. Einn skjálfti mældist í Tungnafellsjökli.

Norðan Vatnajökuls mældust rúmlega 20 skjálftar. Stærsti skjálftinn var 2,5 að stærð þann 22. júní í norðanverðri öskjubrún Öskju.

Mýrdalsjökull og Torfajökulssvæðið

Tæpur tugur skjálfta mældist í Mýrdalsjökli í vikunni. Sá stærsti var 2,4 að stærð þann 25. júní. Tæplega 25 skjálftar mældust í vestanverðri Torfajökulsöskjunni og var sá stærsti 2,0 að stærð.

Nánar er hægt að skoða skjálftavirkni á landinu í Skjálfta-Lísu

Jarðvakt