	Veðurstofa Íslands Jarðeðlissvið

Jarðskjálftar 20220704 - 20220710, vika 27

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 690 jarðskjálftar mældust með SIL-mælakerfi Veðurstofu Íslands í vikunni og hafa þeir allir verið yfirfarnir. Þetta eru mun færri skjálftar en í síðustu viku þegar um 1190 jarðskjálftar mældust. Munar þar mestu að mun færri jarðskjálftar mældust á Reykjanesskaga auk þess sem töluvert hvassviðri var í vikunni sem hafði mögulega áhrif á næmni kerfisins til að mæla smáskjálfta. Stærsti skjálfti vikunnar var 3,2 að stærð þann 4. júlí á Reykjaneshrygg en þrír aðrir skjálftar mældust 3 að stærð í vikunni, tveir á Reykjaneshrygg og einn í Kötlu. Engar tilkynningar bárust um að þeir hafi fundist í byggð. Þrír smáskjálftar mældust í Heklu og sjö í Grímsvötnum.

Suðurland

Tæplega 50 jarðskjálftar mældust á Suðurlandi í liðinni viku, svipaður fjöldi og í vikunni á undan. Skjálfarnir dreifðust um Hengilssvæðið og Suðurlandsundirlendið og voru allir undir tveimur að stærð. Þrír skjálftar mældust í Heklu, sá stærsti 1,1 að stærð.

Reykjanesskagi

Um 415 jarðskjálftar mældust á Reykjanesskaga í vikunni, mun færri en í síðustu viku þegar um 730 jarðskjálftar mældust þar. Stærsti skjálftinn var 2,7 að stærð vestan við Kleifarvatn. Skjálftarnir dreifðust víða um skagann, en smá hrinur urðu við Rauðhól og Kleifarvatn, en töluverð virkni var einnig norður af Grindavík og við Fagradalsfjall.

Tæplega 60 jarðskjálftar mældust á Reykjaneshrygg, sá stærsti 3,2 að stærð þann 4. júlí kl 08:39 og var hann jafnframt stærsti skjálfti vikunnar. Tveir aðrir skjálftar, þrír að stærð, mældust 5. og 6. júlí. Flestir skjálftarnir mældust í smá hrinum sem urðu 4 júlí og 6-7. júlí um 37 km suðvestur af Reykjanestá.

Norðurland

Tæplega 60 jarðskjálftar mældust á Tjörnesbrotabeltinu í vikunni, mun færri en í síðustu viku þegar tæplega 180 skjálftar mældust. Um 40 jarðskjálftar mældust á Grímseyjarbeltinu, sá stærsti 1,9 að stærð. Fimm skjálftar mældust á Húsavíkur-Flateyjar misgenginu, sá stærsti 1,7 að stærð og sjö smáskjálftar mældust í Eyjafjarðardjúpi á svipuðum slóðum og hrinan í síðustu viku.Tveir smáskjálftar mældust við Miklavatn í Fljótum. Fjórir skjálftar mældust við Kröflu, sá stærsti 1,8 að stærð og einn norður af Bæjarfjalli.

Hálendið

Tæplega 40 jarðskjálftar mældust undir Vatnajökli í vikunni, mun færri en í síðustu viku þegar um 60 skjálftar mældust þar. Sjö skjálftar mældust í Bárðarbungu, sá stærsti 2,3 að stærð. Sjö skjálftar mældust við Grímsvötn, sá stærsti 1,8 að stærð. 16 skjálftar mældust í vestanverðum Vatnajökli, þar af fjórir við Hamarinn og var sá stærsti 2 að stærð, en aðrir mun minni. Einn smáskjálfti mældist í Skeiðarárjökli og tveir í Öræfajökli. Einn skjálfti mældist í Dyngjujökli

Norðan Vatnajökuls mældust rúmlega 30 jarðskjálftar, allir undir 2 að stærð. Átta skjálftar mældust við Öskju og rúmlega 20 við Herðurbreið og Herðubreiðartögl. Einn smáskjálfti mældist norðan við Tungnafellsjökul og einn við Trölladyngju.

Fimm skjálftar mældust í Langjökli, fjórir á svipuðum slóðum og skjálftarnir í síðustu viku og einn í Geitlandsjökli. Stærsti skjálftinn var 1,8 að stærð. Einn smáskjálfti mældist í norðanverðri Skriðu og einn suður af Lágafelli.

Mýrdalsjökull

Rúmlega 20 jarðskjálftar mældust undir Mýrdalsjökli í vikunni, allir innan Kötluöskjunnar. Stærsti skjálftinn var 3 að stærð 10. júlí kl 16:50. Flestir skjálftarnir urðu í smá hrinu sem hófst 10 júlí. Þann dag bárust Veðurstofunni fregnir af mikilli brennisteinslykt við Múlakvísl. Þrír smáskjálftar mældust í Torfajökulssöskjunni.

Jarðvakt