	Veðurstofa Íslands Jarðeðlissvið

Jarðskjálftar 20220711 - 20220717, vika 28

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni mældust 619 jarðskjálftar með SIL mælakerfi Veðurstofu Íslands og hafa þeir allir verið yfirfarnir. Þetta eru álíka margir skjálftar og í vikunni á undan. Tveir skjálftar mældust yfir þremur að stærð; 3,4 og 3,3, og urðu þeir báðir morguninn 12. júlí um 2 km norðaustur af Sýrfelli. Ein tilkynning barst um að þeir hafi fundist í Reykjanesbæ. Í Heklu mældust 6 smáskjálftar og 26 skjálftar mældust í Kötluöskjunni, allir minni en 2,5 að stærð.

Suðurland

Ríflega 50 jarðskjálftar mældust á Suðurlandi í liðinni viku, svipaður fjöldi og í vikunni á undan. Skjálfarnir dreifðust um Hengilssvæðið og Suðurlandsundirlendið og mældust allir nema einn skjálfti undir 2 að stærð. 6 skjálftar mældust í Heklu, sá stærsti 1,6 að stærð.

Reykjanesskagi

381 jarðskjálfti mældust á Reykjanesskaga í vikunni, heldur færri en vikuna á undan. Tveir skjálftar mældust yfir þremur að stærð; 3,4 og 3,3, og urðu þeir báðir morguninn 12. júlí um 2 km norðaustur af Sýrfelli á Reykjanesi. Ein tilkynning barst um að þeir hafi fundist í Reykjanesbæ.
Skjálftavirknin dreifðist víða um skagann, en áberandi skjálftastaðir voru um 3-4 km NNA af Reykjanesvita, 2 km NA af Sýrfelli, við Svartsengi, Þorbjörn og Eldvörð, Fagradalsfjall, vestan við Kleifarvatn og miðja vegu milli Brennisteinsfjalla og Kleifarvatns.

Reykjaneshryggur

Einir 17 skjálftar mældust á Reykjaneshrygg samanborið við 60 jarðskjálfta vikuna á undan. Stærsti skjálftinn mældist 2,4 að stærð.

Norðurland

Tæplega 50 jarðskjálftar mældust á Tjörnesbrotabeltinu í vikunni, aðeins færri en í síðustu viku. Einir 37 jarðskjálftar mældust á Grímseyjarbeltinu, allir innan við 2 að stærð, flestir í þyrpingum annarsvegar um 10 km austan við Grímsey og hinsvegar um 13 km vestan við Kóparsker. Sex skjálftar mældust á Húsavíkur-Flateyjar misgenginu, allir innan við 1 að stærð. Níu smáskjálftar mældust á hefðbundum stöðum við Kröflu og Bæjarfjall, um eða innanvið 1 að stærð.

Hálendið

Í heildina mældust 77 skjálftar á hálendinu. Um 30 skjálftar mældust í og við Vatnajökul. Aðeins einn skjálfti 0,8 að stærð mældist í Grímsvötnum. Þrír skjálftar mældust í Bárðarbungu, sá stærsti 2,6 að stærð. Í Öræfajökli mældust 5 smáskjálftar, allir minni en 1,1. Á Lokahrygg mældust 7 skjálftar, sá stærsti rétt við Eystri Skaftárketil, 2,4 að stærð.

Mýrdalsjökull

Skjálftar, 26 talsins, mældust innan Kötluöskjunnar, allir innanvið 2,5 að stærð.

Borgarfjörður og Vestra gosbeltið

Tveir skjálftar mældust nærri Grjótavatni, en þar hafa skjálftar mælst af og til í vetur. Þeir voru undir 2 að stærð. Níu skjálftar í og norðan Langjökuls mældust, sá stærsti 2,5 að stærð. Einn skjálfti mældist í Lundareykjadal þann 15. júlí 2,0 að stærð.

Jarðvakt