	Veðurstofa Íslands Jarðeðlissvið

Jarðskjálftar 20220725 - 20220731, vika 30

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Jarðskjálftahrina hófst í ganginum norðaustan við Geldingadali fyrir hádegið þann 30. júlí og hefur staðið síðan. Fjórir skjálftar á stærðarbilinu 4,0-4,4 mældust í ganginum við Litla-Hrút og Kistufell. Þetta kvikuinnskot hefur ollið spennubreytingum í kring sem hefur framkallað stærri svonefnda gikkskjálfta. Sá stærsti þeirra varð þann 31. júlí kl. 17:48 af stærð M5,4 með upptök um 3 km norðnorðaustur af Grindavík. Allir stærstu skjálftarnir hafa fundist vel víða um Suðvestanvert landið. Á milli 3 og 4 þúsund skjálftar mældust í hrinunni fram til loka vikunnar. Skjálfti af stærð 4,2 mældist þann 29.7. kl. 22:58 með upptök undir sunnanverðri Kötluöskjunni.

Suðurland

Um 60-70 jarðskjálftar mældust á Suðurlandi. Stakir skjálftar höfðu upptök við Þrengsli, norðan Hveragerðis og sunnan við Skarðsfjall. Um 10 smáskjálftar mældust af og til undir Vatnafjöllum, sá stærsti 1,2 að stærð. Tæplega 40 smáskjálftar voru í smáhrinu í Flóanum austan við Selfoss dagana 28. og 29. júlí. Sá stærsti mældist 1,8 að stærð þann 29. kl. 09:51 og var jafnframt sá stærsti á Suðurlandi í vikunni.

Reykjanesskagi

Um morguninn þann 30. júli hófst skjálftahrina í ganginum norðaustan við Geldingadali. Hún jókst verulega um og upp úr hádeginu og hefur staðið síðan. Rúmlega 30 skjálftar yfir 3 að stærð mældust í ganginum og fjórir um og yfir 4 að stærð. Þann 30. júlí mældist kl. 14:02 M4 við Kistufell og kl. 16:52 M4,4 og kl. 20:48 M4,3 við Litla-Hrút og þann 31.7. kl. 04:06 M4,2 einnig við Litla-Hrút. Vegna þessa kvikuinnskots verður spennubreyting aðallega suðvestan og norðaustan við ganginn sem framkalla svonefnda gikkskjálfta á þeim svæðum utan við ganginn. Í allt framkölluðust um 30 svona gikkskjálftar frá svæði vestan við Þorbjörn og austur að Kleifarvatni. Stærsti svona gikkskjálfti og sá eini yfir M4 varð þann 31.7. kl. 17:48 að stærð M5,4 með upptök um 3 km norðnorðaustur af Grindavík. Allir stærstu skjálftarnir fundust vel víða um Suðvestanvert landið. Um 3-4 þúsund skjálftar mældust á svæðinu í sjálfvirka skjálftaúrvinnslu kerfinu fram til loka vikunnar.

Norðarlega á Reykjaneshrygg mældust 5 skjálftar, sá stærsti 2,7 að stærð með upptök við ELdey.

Norðurland

Úti fyrir Norðurlandi á svonefndu Tjörnesbrotabelti mældust um 30 jarðskjálftar. Flestir þeirra áttu upptök á Grímseyjarbeltinu frá Grímsey og inn í Öxarfjörð. Tveir stærstu skjálftarnir þar voru um 2,1 að stærð, annar austan við Grímsey en hinn norður af Tjörnesi. Um 10 skjálftar mældust á svonefnu Húsavíkur-Flateyjarmisgengi, allir vestan við Flatey á Skjálfanda. Stærsti skjálftinn var fyrir mynni Eyjafjarðar um 2 að stærð. Einnig mældust 3 skjálftar norður á Kolbeinseyjarhrygg.

Hálendið

Tæplega 10 skjálftar voru undir Vatnajökli. Þar af 3 á Lokahrygg, sá stærsti M2 við Vestari-Skaftárketilinn. Tveir skjálftar á stærðarbilinu 1,7-1,9 voru við suðvesturbrún Grímsvatnaöskjunnar. Einnig voru stakir skjálftar undir Skeiðarárjökli og Síðujökli.

Við Öskju og Herðubreið mældust um 20 skjálftar. Upptök þeirra voru við Herðubreið og við suðaustanverða Öskju. Stærsti skjálftinn var 1,3 að stærð við Herðubreið.

Í grennd við Langjökul voru 6 skjálftar. Einn við Þórisjökul og annar norðan við Hveravelli. Svo voru 3 skjálftar við Sandvatns og einn norðaustan þess, sá stærsti 1,4 að stærð.

Einn skjálfti af stærð 1,1 mældist á Mýrum, norðan við Grjótárvatn á Snæfellsnesi.

Mýrdalsjökull

Undir Mýrdalsjökli voru tæplega 20 skjálftar, allir aðallega undir sunnanverðri Kötluöskjunni. Stærsti skjálftinn mældist þann 29. júli kl. 22:58 af stærð 4,2 með upptök sunnarlega í öskjunni, austan við sigkatla (16 og 18) sem þar eru.

Einn smáskjálfti var við suðvestanverðan Eyjafjallajökul að stærð 0,7.

Um 5 skjálftar voru undir Torfajökulsöskjunni, bæði vestarlega í öskjunni og suðaustan við Hrafntinnusker. Stærð þeirra flestra er um 1,1.

Jarðvakt