	Veðurstofa Íslands Jarðeðlissvið

Jarðskjálftar 20220801 - 20220807, vika 31

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni mældust um 9500 jarðskjálftar með SIL mælakerfi Veðurstofu Íslands og hafa um 700 jarðskjálftar verið yfirfarnir. Þetta eru heldur fleiri skjálftar en í vikunni á undan þegar um 5200 skjálftar mældust. Þetta skýrist einna helst vegna hrinunnar sem hófst á Reykjanesskaganum þann 30.júlí og eldgosi í kjölfarið þann 3.ágúst vestur af Meradalahnúkum, en eftir að eldgos hófst fór skjálftavirknin minnkandi. Stærsti skjálfti vikunnar varð þann 2.ágúst og mældist hann 5 að stærð rétt vestur af Kleifarvatni. Alls mældust 15 skjálftar yfir 4 að stærð en þeir dreifðu sér allt frá vestur af Þorbirni að Kleifarvatni. Þá mældust 61 skjálfti milli 3-4 að stærð. Frá því gosið hófst hefur aðeins einn skjálfti mælst yfir 4 að stærð en hann varð þann 7.ágúst, vestur af Kleifarvatni.

Suðurland

Tæplega 20 jarðskjálftar mældust á Suðurlandi íliðinni viku. Sem er heldur færri ení vikunni á undan þegar að 66 skjálftar mældust. Þá voru um 7 á Hengilssvæðinu og tveir íHeklu og 2 umhverfis Heklu. Stærsti skjálftinn mældist 1.4 að stærð þann 6.ágúst í Heklu.

Reykjanesskagi

Tæplega 9400 skjálftar mældust á Reykjanesskaga í vikunni, heldur fleiri en í vikunni á undan þegar um 5000 skjálftar mældust. En hrina hófst þann 30.júlí vegna kvikuinnskots frá vestur af Meradalahnúkum í att að Keili. Þann 3. ágúst varð síðan eldgos á sprungu vestur af Meradalahnúkum. Þá mældust 15 skjálftar yfir 4 að stærð, sá stærsti mældist 5 að stærð þann 2.ágúst klukkan 02:27 vestur af Kleifarvatni. Skjálftavirknin dreyfðist um skagann en þó nokkrir mældust vestur af Þorbirni, vestur af Kleifarvatni og við gosstöðvarnar. Eftir að eldgos hófst hefur hægst töluvert á skjálftavirkninni. Þá mældust tveir skjálftar í Brennisteinsfjöllum, þrír í Bláfjöllum og 10 skjálftar í kringum Hlíðarvatn.

Reykjaneshryggur Tæplega 5 skjálftar mældust á Reykjaneshrygg, sá stærsti reyndist 2.3 að stærð.

Norðurland

Tæplega 40 jarðskjálftar mældust á Tjörnesbrotabeltinu í vikunni. Einir 27 jarðskjálftar mældust á Grímseyjarbeltinu flestir austan við Grímsey. Stærsti skjálftinn þar var 2,2 að stærð þann 7.ágúst. Aðeins fjórir skjálftar mældust á Húsavíkur-Flateyjar misgenginu, allir innan við 2 að stærð. Þá mældust 5 skjálftar út á Kolbeineyjarhrygg sá stærsti 2.8 að stærð.

Tveir smáskjálftar mældust við Kröflu, einn norðaustur af Reykjahlíð og einn norðvestur af Akureyri við Moldhaugnaháls en hann reyndist 1.6 að stærð.

Hálendið

Í heildina mældust um 50 skjálftar á hálendinu. Um 10 skjálftar mældust í og við Vatnajökul. Í Bárðarbungu mældust einn skjálfti norðanlega í öskjunni en hann var 2.3 að stærð. Þá mældust 10 skjálftar við Grímsfjall, stærsti skjálftinn mældist 3.7 að stærð þann 2.ágúst. Einn skjálfti mældist í Öræfajökli.

Norðan Vatnajökuls mældust um 35 jarðskjálftar, sá stærsti 1.8 að stærð. Í heildina mældust 12 skjálftar við Öskju, 8 við Herðubreið og 13 á Hafursstaðaheiði um 20 km norðvestur af Öskjuvatni.

Tveir skjálftar mældust á suðvestur landgrunni um 50 km frá Höfn, sá stærri reyndist 2.5 að stærð.

Mýrdalsjökull

Rúmlega 7 skjálftar mældust í Mýrdalsjökli, flestir innan öskjunnar. Stærsti skjálftinn var 2.3 að stærð þann 2.ágúst klukkan 00:23. Þá mældist einn skjálfti suðvestur af Álftavatni.

Einn skjálfti mældist í Hofsjökli þann 4.ágúst og reyndist hann 2.2 að stærð og annar í Langjökli þann 6.ágúst og reyndist hann 1.3 að stærð.

Jarðvakt