	Veðurstofa Íslands Jarðeðlissvið

Jarðskjálftar 20220808 - 20220814, vika 32

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni mældust um 900 jarðskjálftar með SIL mælakerfi Veðurstofu Íslands og hafa um 700 jarðskjálftar verið yfirfarnir. Þetta eru mun færri skjálftar en í vikunni á undan þegar um 9500 skjálftar mældust. Fækkunin skýrist einna helst af því að eftir að eldgos hófst þann 3.ágúst vestur af Meradalahnúkum, hefur dregið verulega úr skjálftavirkni á Reykjanesskaganum þar sem kvika er nú ekki lengur að troða sér í jarðskorpuna með tilheyrandi aflögun. Stærsti skjálfti vikunnar varð 13. ágúst á Reykjaneshrygg og var hann 3,1 að stærð. Einn annar skjálfti var yfir 3 að stærð og átti hann sér stað 11. ágúst við Kleifarvatn og var 3,0 að stærð.

Suðurland

25 skjálftar mældust á Suðurlandi í síðustu viku. 9 skjálftar voru á Hengilssvæðinu og í Ölfusi, 4 í Vatnafjöllum og aðrir skjálftar dreifðu sér um Suðurlandsbrotabeltið. Stærsti skjálftinn varð 9. ágúst, 2,2 í Skarðsfjalli, en þessari stærð ber að taka með fyrirvara þar sem skjálftinn var aðeins mældur á fáum skjálftastöðvum.

Reykjanesskagi

Á Reykjanesskaga mældust rúmlega 500 skjálftar í vikunni, mun færri en vikuna á undan þegar um 9400 skjálftar mældust. Skjálftarnir dreifa sér um skagann en mesta virknin er annarsvegar í kvikuganginum við Fagradalsfjall, á milli Litla-Hrúts og Keilis, og hinsvegar við Kleifarvatn. Aðrar minni hrinur urðu rétt norðan við Sýrfell, í Sandvík og við Sundhnúkagígaröðina. Einnig mældust skjálftar austan við Brennisteinsfjöll og á Heiðinni há. Eldgos er enn í gangi við Merardalahnúka sem skýrir fækkun skjálfta á svæðinu.

Reykjaneshryggur Einn skjálfti yfir 3 að stærð mældist á Reykjaneshrygg í vikunni. Hann varð 13. ágúst og var 3,1. Lítil hrina með um 12 skjálftum varð 10. ágúst vestur af Reykjanestá. Stærsti skjálftinn í þeirri hrinu var 2,4.

Norðurland

34 jarðskjálftar mældust á Tjörnesbrotabeltinu í vikunni, flestir á Grímseyjarbrotabeltinu. Allir skjálftarnir voru undir 2 að stærð. Aðeins sjö skjálftar mældust á Húsavíkur-Flateyjar misgenginu og einn í Eyjafjarðarál. Einn skjálfti mældist úti fyrir Skagafirði. Þá mældist einn skjálfti úti á Kolbeineyjarhrygg, 2,5 að stærð.

Þrír smáskjálftar mældust við Kröflu og tveir við Þeistareyki.

Hálendið

Í heildina mældust um 50 skjálftar á hálendinu. Það er svipað og í síðustu viku. Átta skjálftar mældust við Langjökul á nokkuð mismunandi svæðum: við Geitlandsjökul, Bláfell og á Hveravöllum. 10 skjálftar mældust í Vatnajökli, allir undir 2 að stærð. Þrír skjálftar voru í Grímsvötnum, tveir í Bárðarbungu, tveir við Skeiðarárjökul, einn í Kverkfjöllum og einn í Öræfajökli.

Fyrir norðan Vatnajökul var mest virkni í Öskju, við Herðubreið og Ytri-Dyngjufjöll. Stærsti skjálftinn var 2,1 að stærð við Ytri-Dyngjufjöll.

Einn skjálfti mældist á suðvestur landgrunni um 50 km frá Höfn og var hann 2,4 að stærð. Einn skjálfti mældist vestur á Mýrum 11. ágúst og var hann 1,3 að stærð.

Mýrdalsjökull

Sjö skjálftar mældust í Mýrdalsjökli, flestir innan öskjunnar. Stærsti skjálftinn var 2,4 að stærð þann 13.ágúst. Fimm skjálftar mældust á Torfajökulssvæðinu, sá stærsti 2,1 þann 13. ágúst.

Jarðvakt