	Veðurstofa Íslands Jarðeðlissvið

Jarðskjálftar 20220829 - 20220904, vika 35

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 580 jarðskjálftar mældust með SIL mælakerfi Veðurstofu Íslands í vikunni, heldur færri en vikuna á undan þegar um 650 jarðskjálftar mældust. Munar þar mestu um færri skjálfta á Reykjanesskaga. Mesta virknin mælist þó áfram á Reykjanesskaga en þar mældust rúmlega 360 skjálftar og dreifðist viknin í þyrpingar. Stærsti skjálfti vikunnar var 3,8 að stærð þann 3. september og var hann hluti af hrinu á Kolbeinseyjarhrygg 3-4. september. Alls mældust átta skjálftar yfir þremur að stærð í hrinunni. Stærsti skjálftinn á landi var 2,7 að stærð í Móhálsadal á Reykjanesskaga þann 29. ágúst kl 12:57. Í Heklu mældist einn skjálfti sem var 2,0 að stærð, við Grímsvötn mældust 11 skjálftar en enginn skjálfti mældist í Bárðarbungu.

Suðurland

Tæplega 30 jarðskjálftar mældust á Suðurlandi í vikunni, svipaður fjöldi og í síðustu viku. Flestir skjálftarnir mældust á Suðurlandsbrotabeltinu, þar af 11 í smá hrinu við Raufarhólshelli þann 3. september. Stærsti skjálftinn var 1,5 að stærð. Fjórir smáskjálftar mældust við Hengilinn og einn skjálfti af stærð 2,0 mældist í Heklu.

Reykjanesskagi

Rúmlega 360 jarðskjálftar mældust á Reykjanesskaga, heldur færri en í vikunni á undan þegar rúmlega 420 skjálftar mældust. Stærsti skjálftinn var 2,7 að stærð, en alls mældust fjórir skjálftar yfir tveimur að stærð. Skjálftarnir dreifðust um skagann í þyrpingum; rúmlega 50 skjálftar mældust kringum Reykjanestá, rúmlega 20 austur af Sýlingarfelli, um 150 milli Fagradalsfjalls og Keilis, sá stærsti 2,1 að stærð, rúmlega 30 í Móhálsadal, en þar mældist stærsti skjálfti vikunnar á landi, 2,7 að stærð þann 29. ágúst kl 12:57. Tæplega 20 skjálftar mældust við Kleifarvatn, einn við Brennisteinsfjöll og 16 við Kerlingarhnúk. 40 jarðskjálftar mældust á Reykjaneshrygg í vikunni, sá stærsti 2,1 að stærð.

Norðurland

Rúmlega 30 jarðskjálftar mældust á Tjörnesbrotabeltinu í vikunni, 14 á Húsavíkur-Flateyjar misgenginu og 15 á Grímseyjarbeltinu. 32 jarðskjálftar mældust á Kolbeinseyjarhrygg í hrinu sem varð þar 3-4. september. Stærsti skjálftinn mældist 3,8 að stærð þann 3. september kl 19:17 og var hann jafnframt stærsti skjálfti vikunnar. Alls mældust átta skjálftar yfir þremur að stærð í hrinunni, allir þann 3. september. Tveir smáskjálftar mældust í Fljótunum. Sex skjálftar mældust við Kröflu, allir undir einum að stærð.

Hálendið

Í heildina mældust tæplega 70 jarðskjálftar á Hálendinu í vikunni sem eru töluvert fleiri en vikuna á undan. Rúmlega 20 jarðskjálftar mældust undir Vatnajökli, enginn skjálfti mældist í Bárðarbungu, 11 skjálftar mældust við Grímsvötn, sá stærsti 2,1 að stærð 30. ágúst. Fjórir skjálftar mældust austur af Hamrinum, þar af einn nærri sitthvorum Skaftárkatlinum, sá stærsti 2,1 að stærð. Fjórir smáskjálftar mældust í Öræfajökli.

Tæplega 30 jarðskjálftar mældust við Öskju, flestir við austanverða öskjuna, sá stærsti 1,8 að stærð. Sex skjálftar mældust við Herðubreið og Herðubreiðartögl.

Fimm jarðskjálftar mældust í Langjökli, þar af þrír við Geitlandsjökul. Fjórir skjálftar mældust suður af Langjökli, milli Hagavatns og Sandvatns, sá stærsti 1,6 að stærð. Einn skjálfti mældist við Grjótárvatn á Vesturlandi, 1,9 að stærð þann 1. september.

Mýrdalsjökull

Þrír skjálftar mældust í Mýrdalsjökli, allir innan Kötluöskjunnar og var sá stærsti 1,5 að stærð. Einn skjálfti mældist í Eyjafjallajökli, 1,2 að stærð. Þrír skjálftar mældust á Torfajökulssvæðinu, sá stærsti 1,9 að stærð.

Jarðvakt