	Veðurstofa Íslands Jarðeðlissvið

Jarðskjálftar 20221017 - 20221023, vika 42

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 2520 jarðskjálftar mældust með SIL mælakerfi Veðurstofu Íslands í síðustu viku, mikið fleiri en vikuna á undan þegar um 900 jarðskjálftar mældust. Af þeim hafa um 980 jarðskjálftar verið yfirfarnir. Munar þar mestu um hrinu sem hófst við Herðubreið 22. október, en einnig heldur áfram að skjálfa á Reykjanesi og við Grímsey. Stærsti skjálfti vikunnar var 4,1 að stærð og mældist hann í hrinu við Herðubreið 22. október, en þetta er stærsti skjálfti sem hefur mælst þar frá upphafi mælinga árið 1991. Skjálftinn fannst á Norðurlandi. Alls mældust 11 aðrir skjálftar af stærðinni 3 eða stærri í vikunni, en þeir voru við Herðubreið, Grímsey, Sýlingafell á Reykjanesi og á Reykjaneshrygg. Meiri virkni var á öllum svæðum samanborið við vikuna á undan, nema undir Mýrdalsjökli. 20 skjálftar mældust í Grímsvötnum og fimm í Heklu.

Suðurland

Rúmlega 60 jarðskjálftar mældust á Suðurlandi í vikunni, mun fleiri en í vikunni á undan þegar um 20 skjálftar mældust. Skjálftarnir voru nokkuð dreifðir um Suðurlandsundirlendið, sá stærsti 1,6 að stærð. Fimm smáskjálftar mældust við Hengilinn og fimm í Heklu, sá stærsti 1,2 að stærð.

Reykjanesskagi

Rúmlega 330 jarðskjálftar mældust á Reykjanesskaga í vikunni, þar af eru rúmlega 290 yfirfarnir. Þetta eru töluvert fleiri skjálftar en í síðustu viku þegar tæplega 240 jarðskjálftar mældust. Stærsti skjálftinn var 3,1 að stærð 23. október kl 09:59 austan við Sýlingafell. Annar skjálfti 3,0 að stærð mældist í Brennisteinsfjöllum 21. október. Virknin var nokkuð dreifð um skagann, en tæplega 50 skjálftar mældust vestan við Sýrfell, rúmlega 40 vestan við Þorbjörn, rúmlega 20 austan við Sýlingafell og átta skjálftar mældust við Brennisteinsfjöll.

Um 180 jarðskjálftar mældust á Reykjaneshrygg í vikunni, sá stærsti 3,5 að stærð 17. október kl 07:55. Alls mældust sex aðrir skjálftar yfir 3 að stærð í hrinu þann 17. október um 48 km suðvestur af Reykjanestá. Alls mældust um 120 skjálftar í hrinunni.

Norðurland

Um 550 jarðskjálftar mældust á Tjörnesbrotabeltinu í vikunni, þar af eru um 340 jarðskjálftar yfirfarnir. Langflestir, eða rúmlega 520 mældust á Grímseyjarbeltinu. Þetta er mun meiri virkni en í síðustu viku þegar um 310 jarðskjálftar mældust á svæðinu. Stærsti skjálftinn var 3,8 að stærð þann 19. október kl 10:26 um 13 km norður af Grímsey. Annar skjálfti 3,3 að stærð varð seinna sama dag, en þann 17. október varð skjálfti 3,0 á sama stað. Mesta virknin er nú norðnorðaustur af Grímey, en einnig er enn töluverð virkni suðaustur af eynni eins og verið hefur síðustu vikur. Rúmlega 30 jarðskjálftar mældust í Öxarfirði.

Mun rólegra var á Húsavíkur-Flateyjar misgenginu í vikunni, en þar mældust tæplega 20 smáskjálftar. Tæplega tugur skjálfta mældist á Norðurlandi, þar af fjórir smáskjálftar við Kröflu.

Hálendið

Alls mældust rúmlega 1370 jarðskjálftar á hálendinu í vikunni, mikið fleiri en í síðustu viku þegar um 120 jarðskjálftar mældust þar. Munar þar langmestu um hrinu sem hófst við Herðubreið 22. október, en alls mældust um 1270 jarðskjálftar þar í vikunni, þar af eru tæplega 140 yfirfarnir. Hrinan hófst að kvöldi 22. október með skjálfta sem var 3,1 að stærð kl 21:56, en kl 23:11 varð jarðskjálfti 4,1 að stærð, sem var jafnframt stærst skjálfti vikunnar. Þetta er stærsti skjálfti sem hefur mælst á svæðinu frá upphafi mælinga árið 1991. Hrinan er staðsett um 4 km norður af Herðubreið. Stærsti skjálftinn fannst í byggð á Norðurlandi. Tæplega 20 jarðskjálftar mældust við Öskju í vikunni, sá stærsti 1,8 að stærð.

Tæplega 50 jarðskjálftar mældust undir Vatnajökli í vikunni, mun fleiri en í síðustu viku þegar þeir voru um 35. Mesta virknin var í Grímsvötnum en þar mældust 20 jarðskjálftar, sá stærsti 2,9 að stærð 20. október kl 13:34. Tveir smáskjálftar mældust við Hamarinn og einn við Vestari-Skaftárketilinn. Níu skjálftar mældust í Bárðarbungu, sá stærsti 1,3 að stærð. Sex skjálftar mældust á djúpa svæðinu suðaustur af Bárðarbungu þar sem oft mælast djúpir skjálftar. Tveir smáskjálftar mældust við Kverkfjöll, einn suðvestur af Esjufjöllum og þrír í Öræfajökli.

Sex skjálftar mældust við Langjökul, þar af tveir norðaustan við jökulinn, einn í Vestari-Hagafellsjökli og einn í Eystri-Hagafellsjökli.

Mýrdalsjökull

Tæplega 20 jarðskjálftar mældust í Mýrdalsjökli í vikunni, heldur færri en vikuna á undan þegar rúmlega 30 skjálftar mældust. Flestir skjálftarnir mældust innan Kötluöskjunnar, sá stærsti 2,1 að stærð.

Fimm skjálftar mældust á Torfajökulssvæðinu, sá stærsti 1,6 að stærð.

Jarðvakt