	Veðurstofa Íslands Jarðeðlissvið

Jarðskjálftar 20221205 - 20221211, vika 49

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 550 jarðskjálftar mældust með SIL mælakerfi Veðurstofu Íslands í liðinni viku, mun færri en í vikunni á undan þegar um 735 jarðskjálftar mældust. Munar þar mestu um minni virkni við Herðubreið og Herðubreiðartögl, en þar hefur verið töluverð virkni síðustu vikur. Heldur meiri virkni var á Reykjanesskaga samanborið við síðustu viku, en virkni var svipuð á flestum öðrum svæðum. Enginn skjálfti mældist yfir þremur að stærð í vikunni. Stærsti skjálfti vikunnar var austan við Flatey á Skjálfanda þann 10. desember og var hann 2,8 að stærð. Sex skjálftar mældust í Grímsvötnum og tíu í Kötlu, en enginn í Heklu.

Suðurland

Rúmlega 30 jarðskjálftar voru staðsettir á Suðurlandi í vikunni, svipaður fjöldi og í síðustu viku. Þar af voru 14 skjálftar á Hengilssvæðinu, sá stærsti 1,6 að stærð. 15 smáskjálftar voru dreifðir um Suðurlandsbrotabeltið. Enginn skjálfti mældist í Heklu í vikunni.

Reykjanesskagi

Tæplega 150 jarðskjálftar mældust á Reykjanesskaga í vikunni, mun fleiri en vikuna á undan þegar tæplega 90 jarðskjálftar mældust þar. Stærsti skjálftinn var 2,2 að stærð við Reykjanestá, en þar mældust 36 skjálftar. 15 smáskjálftar mældust við Þorbjörn, um tugur austur af Sýlingarfelli, rúmlega 30 milli Fagradalsfjalls og Keilis, tuttugu milli Vestur- og Austurháls og rúmlega tugur við Kleifarvatn. Sex skjálftar mældust norðaustan við Brennisteinsfjöll og einn suður af Bláfjöllum.

Á Reykjaneshrygg mældust 25 jarðskjálftar, svipaður fjöldi og í vikunni á undan, sá stærsti 2,1 að stærð.

Norðurland

Rúmlega 40 jarðskjálftar mældust á Tjörnesbrotabeltinu í vikunni, heldur fleiri en í síðustu viku þegar rúlega 30 skjálftar mældust þar. Mesta virknin var á Grímseyjarbeltinu, 36 skjálftar, sá stærsti 2,6 að stærð. Fjórir skjálftar mældust á Húsavíkur-Flateyjar misgenginu, sá stærsti 2,8 að stærð norðaustur af Flatey 10. desember kl 13:45 og var hann jafnframt stærsti skjálfti vikunnar. Þrír smáskjálftar mældust við Eyjafjarðarál.

Sex smáskjálftar mældust norður af Bæjarfjalli, þrír á Kröflusvæðinu og tveir við Reykjahlíð.

Hálendið

Á hálendinu öllu mældust tæplega 290 jarðskjálftar í vikunni, færri en í vinunni á undan þegar tæplega 340 skjálftar mældust þar. Rúmlega 30 jarðskjálftar mældust undir Vatnajökli, svipaður fjöldi og í síðustu viku. Stærsti skjálftinn var 2,7 að stærð 7. desember í Bárðarbungu, en alls mældust sjö skjálftar í Bárðarbungu í vikunni. Einn djúpur skjálfti mældist á svæðinu suðaustur af Bárðarbungu þar sem oft mælast djúpir skjálftar. Sex skjálftar mældust í Grímsvötnum, sá stærsti 1,5 að stærð. Tveir smáskjálftar mældust við Hamarinn og sex í Öræfajökli, allir undir einum að stærð.

Tveir smáskjálftar mældust í kvikuganginum undir og fyrir framan Dyngjujökul. Ellefu smáskjálftar mældust norðaustur af Kverkfjöllum, allir undir 0,3 að stærð og flestir djúpir. Tíu skjálftar mældust við Öskju, sá stærsti 2,1 að stærð. Tæplega 50 jarðskjálftar mældust við Herðubreið, mun færri en vikuna á undan þegar rúmlega 90 skjálftar mældust þar, sá stærsti 2,5 að stærð. Um 180 jarðskjálftar mældust við Herðubreiðartögl, heldur færri en í vikunni á undan þegar rúmlega 200 skjálftar mældust þar. Stærsti skjálftinn var 2,2 að stærð.

Þrír skjálftar mældust í vestanverðum Langjökli, sá stærsti 2,0 að stærð. Einn skjálfti mældist rétt vestur af jöklinum, rétt suðvestan við Flosavatn, 1,5 að stærð. Fimm skjálftar mældust suður af Langjökli, í Lambahrauni, sá stærsti 1,7 að stærð.

Mýrdalsjökull

Tíu skjálftar mældust undir Mýrdalsjökli í vikunni, svipaður fjöldi og vikuna á undan. Allir skjálftarnir voru innan Kötluöskjunnar, sá stærsti 2,1 að stærð 11. desember.

Einn skjálfti mældist í sunnanverðum Eyjafjallajökli 5. desember og var hann 2,0 að stærð. Enginn skjálfti mældist á Torfajökulssvæðinu.

Jarðvakt