	Veðurstofa Íslands Jarðeðlissvið

Jarðskjálftar 980615 - 980621, vika 25

Til að prenta kortið má nota postscript

Í vikunni hafa verið staðsettir um 760 atburðir, þar af um tugur sprenginga í Geldinganesi og við Sandafell. Ég er ekki búinn að fara yfir alla þá skjálfta sem staðsettir voru sjálfvirkt sunnudaginn 21.6. en þá var töluverð virkni í grennd við Hrómundartind.

Suðurland

Nokkuð jöfn virkni var á Hengilssvæðinu fyrri hluta vikunnar, um 100 skjálftar á dag, flestir á sömu slóðum og stóri skjálftinn 4. júni (í viku 23). Að kveldi föstudagsins 20. júní hófust hrinur á tveimur stöðum, um 2 km NNA af Hrómundartindi og nærri Villingavatnsselfjalli, um 2 km ASA af Hrómundartindi. Mikið dró úr virkninni eftir að skjálfti um 3.2 að stærð varð nærri Kyllisfelli kl. 09:57 þann 21. júní. Skjálftinn fannst a.m.k. í Grafningi, Grímsnesi, á Laugarvatni og í Biskupstungum.

Nokkrir stakir smáskjálftar urðu í skjálftabeltinu á Suðurlandi.

Í Þverárhlíð í Borgarfirði varð skjálfti, 1.8 að stærð, kl. 09:23 laugardaginn 20.6. Upptök skjálftans eru um 10 km NV af Húsafelli á svipuðum slóðum og skjálftarnir 1974. Þá varð þarna skjálftahrina sem stóð í meira en tvo mánuði. Stærsti skjálftinn í þeirri hrinu var um 5.5 að stærð.

Norðurland

Rólegt var úti fyrir Norðurlandi þessa vikuna.

Hálendið

Skjálftahrina varð nærri Grímsvötnum að kveldi þann 15.6. og fundust fimm skjálftanna á Grímsfjalli. Sá stærsti var um 2 að stærð og er hann sýndur á kortinu. Töluverð óvissa er í staðsetningunni.

Sigurður Th. Rögnvaldsson