	Veðurstofa Íslands Jarðeðlissvið

Jarðskjálftar 20061204 - 20061210, vika 49

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Afar rólegt var í vikunni. Um helgina gekk hvassviðri yfir landið sem olli því að færri skjálftar mældust þá en ella. Í allt voru 99 atburðir staðsettir, þar af tvær staðfestar sprengingar (á framkvæmdasvæði við Kárahnjúkavirkjun og við Múlakvísl). Þar að auki voru að öllum líkindum 11 sprengingar til viðbótar staðsettar, þær eru þó óstaðfestar enn sem komið er.

Suðurland

Reykjanesskagi

Fáir skjálftar mældust á Reykjanesskaganum þessa vikuna. Þó varð hrina smáskjálfta við Sandsskeið. Hún hófst að kvöldi 7. desember og stóð fram á aðfararnótt 9. desember og voru 16 skjálftar staðsettir á þessu tímabili.

Þá voru fjórir skjálftar staðsettir úti á Reykjaneshrygg, sá stærsti var að stærð ML=2.65.

Norðurland

Lítið var um virkni úti fyrir Norðurlandi í vikunni. Flestir skjálftarnir sem mældust á þeim slóðum urðu á Grímseyjarmisgenginu.

Hálendið

Þrír litlir skjálftar mældust norðan við Herðubreið í vikunni og einn í suðausturjaðri Öskju. Einn skjálfti mældist við Grímsfjall og fimm aðrir í Vatnajökli eða við jaðar hans: einn austur af Hamrinum, tveir norðaustan í Bárðarbungu, einn í jökuljaðrinum við Kistufell og einn rétt norðaustur af Kistufelli.

Mýrdalsjökull

Níu skjálftar voru staðsettir undir vesturjaðri Mýrdalsjökuls í vikunni, þar af náðu 4 stærðinni tveimur og yfir (ML>=2).

Sigurlaug Hjaltadóttir