	Veðurstofa Íslands Jarðeðlissvið

Jarðskjálftar 20090427 - 20090503, vika 18

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 300 skjálftar mældust í vikunni auk 17 sprenginga eða ætlaðra sprenginga. Nokkrir skjálftar náðu stærðinni þremur. Stærsti skjálfti vikunnar varð laust fyrir kl. 3 aðfararnótt miðvikudagsins 29. apríl, um 5 km SSA af Skálafelli á Hellisheiði. Stærð hans var 3,9 og bárust tilkynningar af því að hann hefði fundist í nærliggjandi byggðarlögum og alla leið vestur á Seltjarnarnes og Álftanes.

Suðurland

Rúmlega 80 jarðskjálftar mældust á Hengilssvæðinu og í Ölfusi. Stærsti skjálfti vikunnar, af stærðinni 3,9 varð laust fyrir kl. 3 aðfararnótt miðvikudagsins 29. apríl, um 5 km SSA af Skálafelli á Hellisheiði.Tilkynningar bárust af því að hann hefði fundist í nærliggjandi byggðarlögum og alla leið vestur á Seltjarnarnes og Álftanes. Upp úr klukkan 9 þann 28. apríl varð skjálfti af stærð 2,3 um 3 km norðan við Hveragerði og fannst hann þar vel. Á Kross-sprungunni mældust tæplega 50 skjálftar og voru þeir allir litlir. Nokkrir smáskjálftar mældust auk þess annars staðar á Suðurlandi.

Reykjanesskagi

Á Reykjanesskaga mældust 20 skjálftar, flestir við Kleifarvatn. Stærsti skjálftinn var 2 stig. Á Reykjaneshrygg mældust sjö skjálftar. Fjórir þeirra urðu á bilinu frá því laust fyrir og þar til rétt eftir kl. 23 þann 30. apríl. Stærsti skjálftinn var 2 stig.

Norðurland

Tæplega 100 skjálftar mældust á og úti fyrir Norðurlandi. Um 30 voru í Öxarfirði og var sá stærsti 2,4 stig. Sami fjöldi varð austan- og norðaustan Grímseyjar og var sá stærsti 3,2 að stærð og varð um 5 km austan byggðarinnar í Grímsey. Um 15 km sunnan eyjunnar urðu tveir skjálftar með stuttu millibili og voru þeir tæplega og rúmlega 3. Einn skjálfti varð við Jan Mayen og var hann 3,3 að stærð.

Hálendið

Í Vatnajökli mældust tæplega 70 skjálftar víðsvegar um jökulinn. Allir undir tveimur að stærð. Tveir ísskjálftar voru í Skeiðarárjökli. Á svæðinu norðan Vatnajökuls mældust 36 skjálftar, þar af rúmlega 20 norðan Upptyppinga. Allir voru skjálftarnir litlir. Tveir smáskjálftar mældust vestur af Okinu á svipuðum slóðum og vikurnar tvær á undan.

Mýrdalsjökull

Þrír skjálftar mældust í Mýrdalsjökli í vikunni, tveir innan og við öskjuna og einn við Goðabungu. Einn skjálfti varð í Eyjafjallajökli og fimm á Torfajökulssvæðinu. Stærsti skjálftinn var 2 að stærð á Torfajökulssvæðinu.

Sigþrúður Ármannsdóttir