	Veðurstofa Íslands Jarðeðlissvið

Jarðskjálftar 20111226 - 20120101, vika 52

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rétt tæplega 200 jarðskjáfltar voru staðsettir í síðustu viku ársins 2011. Vikan var fremur tíðindalítil og langflestir skjálftarnir sem voru undir M_L 2 að stærð. Stærstu skjálftarnir, M_l 2,0 og 2,1, urðu 65 km norður af Kolbeinsey rétt fyrir miðnætti að kvöldi 28. desember.

Suðurland

Langflestir skjálftarnir sem mældust á Suðurlandi urðu undir Húsmúla, 43 talsins, langflestir undir einum að stærð en sá stærsti mældist M_L 1,5. Eru þetta heldur færri skjálftar en mælst hafa síðustu vikur. Þá greindust fjórir skjálftar nærri Nesjavöllum, einn nærri Klambragili og einn við Ölkelduhás. Nokkrir jarðskjáfltar mældust norðan í Ingólfsfjalli, á Hestvatnssprungu (frá 21.júní 2000) og einn rétt vestur af Selsundssprungu, austast í brotabeltinu.

Reykjanesskagi

Aðeins níu skjálftar mældust á Reykjanesskaga: í Brennisteinsfjöllum, við sunnanvert Kleifarvatn, við Fagradalsfjall og 4-5 km NA Grindavíkur, sá stærsti, M_l 1,9, varð nærri Grindavík. Einn skjáflti mældist um 5 km NNV af Geirfugladrangi.

Norðurland

Samtals voru 24 skjálftar staðsettir á eða úti fyrir Norðurlandi. Þar af urðu þrír skjálftar á Þeistareykja-Kröflu svæði og einn í Fljótunum.

Hálendið

Einn skjálfti greindist við Högnhöfða og einn í austanverðum Hofsjökli. Skjálftavirknin sem mældist í Vatnajökli dreifðist víða, og urðu skjálftar NA af Esjufjöllum, við Grímsvötn, Hamarinn, Bárðarbungu/Kistufell, Kverkfjöll og við Þórðarhyrnu. Samtals voru fimm skjálftar staðsettir á Herðubreiðar-Upptyppingasvæði.

Mýrdalsjökull

Ríflega 60 skjálftar mældust í Mýrdalsjökli, og dró því nokkuð úr virkni þar miðað við síðustu vikur. Þar af urðu 13 þeirra vestan Goðabungu, tveir við Hafursárjökul og 45 innan öskjunnar. Fimmtán skjálftar greindust á Torfajökulssvæði.

Sigurlaug Hjaltadóttir og Þórunn Skaftadóttir