	Veðurstofa Íslands Jarðeðlissvið

Jarðskjálftar 20120827 - 20120902, vika 35

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 340 jarðskjálftar mældust með SIL kerfi Veðurstofu Íslands í vikunni frá 27. ágúst til 2. september 2012. Stærstu skjálftarnir voru staðsettir í Bláfjöllum (4,6 að stærð þann 30. ágúst kl. 11:59) og norðaustan Fagradalsfjalls á Reykjanesskaga (3,1 að stærð þann 1. september kl. 16:33). Í tengslum við smáhlaup úr vestari Skaftárkatlinum mældust nokkrir ísskjálftar undir suðvestanverðum Vatnajökli. Fremur róleg skjálftavirkni var undir Mýrdalsjökli.

Reykjanesskagi

Fimmtudaginn 30. ágúst kl. 11:59 mældist jarðskjálfti að stærð 4,6 í Bláfjöllum á tæplega 6 km dýpi. Hann fannst vel á höfuðborgarsvæðinu og víðar á suðvesturlandi. Rúmlega 80 eftirskjálftar hafa fylgt í kjölfar hans. Stærsti eftirskjálftinn var 2,2 að stærð og eftirskjálftarhrina hélt áfram um helgina. Upptök skjálftanna er á þekktri jarðskjálftasprungu milli Bláfjallaskála og Vífilsfells.

Laugardaginn þann 1. september kl. 16:33 mældist jarðskjálfti um 8 km norðaustan við Grindavík, í nágrenni Fagradalsfjalls. Hann var 3,1 að stærð og átti upptök á tæplega 7 km dýpi. Rúmlega 50 eftirskjálftar hafa fylgt, allir minni en 2,5 að stærð.

Að auki voru nokkrir smáskjálftar staðsettir í nágrenni Kleifarvatns og einn á Reykjaneshrygg, allir minni en 1,5 stig.

Suðurland

Um 50 smáskjálftar mældust á Suðurlandi. Þar af voru rúmlega 15 staðsettir á þekktum sprungum á Ölfussvæðinu og um 30 í nágrenni Hengils og við Húsmúla. Allir voru þeir minni en 2,0 að stærð.

Mýrdalsjökull

Jarðskjálftavirkni var fremur róleg undir Mýrdalsjökli. Bara 12 smáskjálftar mældust inni Kötluöskjunni og tæplega 20 skjálftar voru staðsettir í nágrenni Goðalands. Stærsti skjálftinn var 2,2 að stærð. Nokkrir smáskjálftar mældust undir Hafursárjökli sunnan við Kötluöskjuna og einn í Torfajökli.

Hálendið

Í tengslum við smáhlaup úr vestari Skaftárkatlinum mældust um 10 ísskjálftar undir suðvestanverðum Vatnajökli og um 5 jarðskjálftar við vestari Skaftárketilinn og var stærsti jarðskjálftinn þar 2,7 stig. Nokkrir smáskjálftar voru staðsettir við Bárðarbungu og í Kverkfjöllum. Í byrjun vikunnar mældist smáhrina í vestanverðum Langjökli og var stærsti skjálfti þar 1,8 að stærð. Um 5 smáskjálftar voru staðsettir í nágrenni Öskju og Herðubreiðar.

Norðurland

Tæplega 25 jarðskjálftar áttu upptök á Húsavíkur- og Grímseyjarbeltinu. Stærsti skjálftinn var 2,9 að stærð, sunnudaginn þann 2. september kl. 15:25 og átti upptök um 10 km norðvestan við Mánáreyjar. Flestir skjálftar voru staðsettir í Öxarfirði. Nokkrir smáskjálftar mældust á Þeistareykjum og í Kröfluöskjunni, allir minni en 1,2 að stærð.

Martin Hensch