	Veðurstofa Íslands Jarðeðlissvið

Jarðskjálftar 20120910 - 20120916, vika 37

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni mældust 200 skjálftar með SIL-mælakerfi Veðurstofunnar. Jarðskjálftahrina var á Reykjaneshrygg, önnur út af Siglufirði og aukin virkni vestan Geitafells á Reykjanesskaga.

Suðurland

Á Hengilssvæðinu mældist tæpur tugur smáskjálfta, flestir við Húsmúla á Hellisheiði. Álíka fjöldi mældist í Ölfusi og nokkrir á sprungunum á Suðurlandsundirlendinu.

Reykjanesskagi

Upp úr miðnætti á sunnudegi hófst jarðskjálftahrina um það bil 10 kílómetrum vestsuðvestan Geirfugladrangs á Reykjaneshrygg. Þrjátíu eftirskjálftar fylgdu í kjölfarið, nokkrir yfir þremur að stærð. Hrinan stóð fram á morgun en nokkrir skjálftar höfðu orðið á þessum stað fyrr í vikunni og eins mældust nokkrir síðar á sunnudeginum. Klukkan 19:39 á miðvikudagskvöldið varð skjálfti rúmlega fjórum kílómetrum vestan Grindavíkur og annar tveimur mínútum síðar. Sá seinni var 2,5 að stærð og fannst í Grindavík. Sjö skjálftar mældust skammt vestan Geitafells á Reykjanesskaga, flestir snemma laugardagsmorguns. Þessir skjálftar voru nokkru sunnar en þeir sem mældust í jarðskjálftahrinunni í Bláfjöllum 30. ágúst. Annars staðar á Reykjanesskaga var frekar rólegt.

Norðurland

Rúmlega 50 skjálftar mældust í Tjörnesbrotabeltinu, þar af um 30 í hrinu syðst í Eyjafjarðarál, um 25 kílómetra norðnorðaustur af Siglufirði, sem stóð með hléum frá föstudagsmorgni og út vikuna. Stærsti skjálftinn var tæp þrjú stig. Tæpur tugur smáskjálfta mældist í Öxarfirði og sinn hvor skjálftinn við Kröflu og Þeistareyki.

Hálendið

Rólegt var í Vatnajökli en einungis fjórir smáskjálftar mældust þar og einn í Tungnafellsjökli. Á svæðinu norðan Vatnajökuls var einnig lítil virkni. Fjórir smáskjálftar mældust undir austanverðri Öskju og nokkrir við Herðubreið og Herðubreiðartögl.

Mýrdalsjökull

Tæplega 30 smáskjálftar mældust í Mýrdalsjökli, flestir í vesturjöklinum við Goðabungu. Nokkrir smáskjálftar mældust á Torfajökulssvæðinu og einn við Skjaldbreið sunnan Langjökuls.

Sigþrúður Ármannsdóttir