	Veðurstofa Íslands Jarðeðlissvið

Jarðskjálftar 20180305 - 20180311, vika 10

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 550 jarðskjálftar voru staðsettir með SIL-mælakerfi Veðurstofunnar í vikunni, heldur færri en í fyrri viku. Engar hrinur urðu í vikunni. Minni virkni var á Norðurlandi í þessari viku en þeirri síðustu. Svipaður fjöldi skjálfta varð í Bárðarbungu miðað við vikuna á undan en litlu fleiri í Öræfajökli og Kötlu. Stærsti skjálfti vikunnar varð 6. mars kl. 17:08, 2,6 að stærð, um 17 kílómetra austur af Grímsey.

Suðurland

Rúmlega 20 skjálftar voru staðsettir á Hengilssvæðinu og í Ölfusi, stærsti rétt undir tveimur stigum en aðrir mun minni. Um tugur skjálfta mældist um helgina (10. og 11. mars) um 9 kílómetra vestsuðvestur af Hestfjalli. Stærsti skjálftinn, á þeim slóðum, varð 11. mars kl. 02:01, 2,3 að stærð, aðrir voru um og innan við eitt stig. Rúmlega 30 jarðskjálftar mældust austar á Suðurlandsundirlendi, allir litlir. Einn smáskjálfti mældist skammt vestur af Heklu þann 10. mars.

Reykjanesskagi

Á annan tug skjálfta mældist á Reykjanesskaga og -hrygg, litlu færri en í fyrri viku. Allir skjálftarnir voru innan við tvö stig að stærð.

Norðurland

Rúmlega 100 jarðskjálftar mældust úti fyrir Norðurlandi, talsvert færri en í liðinni viku. Mesta virknin var á Grímseyjarbeltinu líkt og undanfarnar vikur en hrinunni, sem verið hefur austan og norðan Grímeyjar síðustu vikur, virðist nú að mestu lokið. Stærsti skjálftinn á Norðurlandi varð 6. mars kl. 17:08 um 17 kílómetra austur af Grímsey, 2,6 að stærð og var það jafnframt stærsti skjálfti vikunnar. Tæplega 30 jarðskjálftar mældust í Öxarfirði, allir innan við tvö stig.
Um tugur smáskjálfta mældist á svæðunum við Kröflu og Þeistareyki.
Nokkrir skjálftar urðu þann 8. mars langt norður á Kolbeinseyjarhrygg.

Hálendið

Rúmlega 200 jarðskjálftar mældust undir Vatnajökli, litlu færri en í liðinni viku. Svipaður fjöldi skjálfta mældist í Bárðarbungu (um 50) og í síðustu viku. Í þessari viku var mesta virknin í sunnanverðri Bárðarbungu. Stærsti skjálftinn varð 6. mars kl. 10:08, 2,5 að stærð. Á annan tug djúpra smáskjálfta varð á svæði þar sem gangurinn beygir til norðurs og um 30 smáskjálftar í bergganginum undir og framan við Dyngjujökul.
Um 70 skjálftar mældust undir Öræfajökli, sá stærsti varð síðdegis (17:33) þann 6. mars, 1,8 að stærð. Flestir aðrir voru undir einu stigi.
Um 50 skjálftar voru staðsettir á svæðinu norðan Vatnajökuls, þar af um 20 við Öskju en aðrir við Herðubreið og Herðubreiðartögl. Nokkrir skjálftar voru um og yfir einu stigi að stærð, aðrir minni.

Mýrdalsjökull

Tæplega 30 jarðskjálftar mældust undir Mýrdalsjökli, litlu fleiri en í fyrri viku. Flestir skjálftarnir urðu innan Kötluöskjunnar. Stærsti skjálftinn varð 10. mars kl. 01:02, 2,3 að stærð, flestir aðrir voru undir einu stigi.
Nokkrir skjálftar mældust á Torfajökulssvæðinu. Stærsti skjálftinn varð þann 10. mars kl. 01:00, 1,9 að stærð og varð hann um tveimur mínútum fyrir stærsta skjálftann í Kötlu.

Jarðvakt