	Veðurstofa Íslands Jarðeðlissvið

Jarðskjálftar 20180423 - 20180429, vika 17

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 520 jarðskjálftar voru staðsettir með SIL-mælakerfi Veðurstofunnar í vikunni, talsvert fleiri en vikuna á undan þegar um 360 jarðskjálftar mældust. Stærsti skjálfti vikunnar var 3,8 að stærð í Bárðarbungu 29. apríl kl 16:13. Rúmlega 50 jarðskjálftar mældust í hrinu á Húsavíkur-Flateyjar misgenginu 24. apríl. Mun meiri virkni var í Öræfajökli í vikunni samanborðið við fyrri viku. Einnig var meiri virkni í Kötlu og Báðarbungu en í fyrri viku. Einn skjálfti mældist við Heklu.

Suðurland

Rúmlega 50 jarðskjálftar mældust á Suðurlandi í vikunni. Um 10 skjálftar mældust á Hengilssvæðinu, allir undir tveimur að stærð. Um 20 skjálftar mældust á Suðurlandundirlendinu, þar af tíu smáskjálftar á sprungu sem kennd er við stóran skjálfta, 1896e. Nokkrir smáskjálftar voru staðsettir í Þrengslum og einn skjálfti mældist í norðvestanverðri Heklu 23. apríl, 1,4 að stærð. Einn skjálfti 2,5 að stærð mældist 4 km norðan við Surtsey 24. apríl kl 08:14.

Reykjanesskagi

Um 50 jarðskjálftar mældust á Reykjanesi í vikunni. Flestir, eða 20 skjálftar mældust í hrinu 27. og 28. apríl við Vigdísarvelli, allir undir tveimur að stærð. Tveir skjálftar, um tveir að stærð, mældust á Reykjaneshrygg, um 95 km suðvestur af Reykjanestá.

Norðurland

Rúmlega 100 jarðskjálftar urðu úti fyrir Norðurlandi í vikunni, töluvert fleiri en í liðinni viku. Mesta virknin var á Húsavíkur-Flateyjar-misgenginu, tæplega 70 jarðskjálftar. Flestir þeirra, eða rúmlega 50, mældust í jarðskjálftahrinu 24. apríl um 14 km norðvestur af Fjörðum. Stærsti skjálfti hrinunnar var 2,0 að stærð kl 13:57 og var hann jafnframt stærsti skjálftinn á Norðurlandi í vikunni. Rúmlega 30 jarðskjálftar mældust á Grímseyjarbeltinu, allir undir tveimur að stærð. Sex smáskjálftar mældust við Kröflu og einn skjálfti mældist í Skagafirði, 1,3 að stærð.

Hálendið

Um 200 jarðskjálftar mældust undir Vatnajökli í vikunni, um helmingi fleiri en vikuna á undan. Rúmlega 50 skjálftar mældust í Bárðarbungu í vikunni, heldur fleiri en vikuna á undan. Stærsti skjálftinn var 3,8 að stærð 29. apríl kl 16:13, en hann var einnig stærsti skjálfti vikunnar. Sex djúpir skjálftar mældust á svæði austan Bárðarbungu þar sem gangurinn beygir til norðurs en þar eru djúpir skjálftar algengir. Rúmlega 30 smáskjálftar mældust í bergganginum undir og fyrir framan Dyngjujökul. Átta smáskjálftar mældust við Hamarinn og 13 við Grímsfjall. Rúmlega 70 jarðskjálftar mældust í Öræfajökli í vikunni, mun fleiri en vikuna á undan. Stærsti skjálftinn var 2,0 að stærð 23. apríl kl 04:55. Níu smáskjálftar mældust við Tungnafellsjökul. Rúmlega 20 smáskjálftar mældust við Öskju og um 40 við Herðubreið og Herðubreiðartögl. Þrír skjálftar mældust suður af Langjökli.

Mýrdalsjökull

20 jarðskjálftar voru staðsettir undir Mýrdalsjökli í vikunni, helmingi fleiri en í fyrri viku. Þar af mældust 16 skjálftar innan Kötluöskjunnar, sá stærsti 2,1 að stærð. Þrír smáskjálftar mældust við Goðabungu og einn smjáskjálfti norðaustan við öskjuna. Þrír smáskjálftar mældust á Torfajökulssvæðinu, töluvert færri en vikuna á undan.

Jarðvakt